SILIA 1,900 UA MALILIU I LE ‘EBOLA’

Talu mai le aso ananafi, e silia i le to’a 1,900 tagata mai vaega eseese o Aferika i Sisifo ua maliliu i le fa’ama’i oti o le ‘Ebola’, ma le silia i le to’a 3,500 ua fa’amaonia le a’afia ai. Ae o se tala fiafia mo sitiseni e toalua mai Amerika lea na aafia, ua toe manuia i laua ma ua toe mafuta atu nei i o la aiga, e aofia ai le alii fomai o Dr. Kent Brently lea na fesoasoani i tagata mama’i i Aferika ae a’afia atu ai o ia i le gasegase, ma le faletua o Nancy Whitebol lea fo’i na aafia mai i Aferika ao fesoasoani i tagata mama’i. I se ripoti na faasalalauina e le Faalapotopotoga o le Soifua Maloloina i le lalolagi (WHO), sa taua ai le fa’aauau pea ona aafia ma maliliu tagata i Aferika, ona o le mata’utia o le fa’ama’i oti o le ‘Ebola’.

MASALOMIA LE AUAI O SITISENI AMERIKA I LE VAEGA A LE ‘ISIS’

Ua fa’aalia i ni ripoti le i ai o ni masalosaloga mai le vaega suesuega o le FBI a Amerika, i le i ai lea o ni sitiseni Amerika o lo o fesoasoani i taumafaiga a le vaega fa’atupu fa’alavelave mai Suria lea ua mata’utia ana faiga i le taimi nei, le vaega a le ‘ISIS’. O ia masalosaloga mai le FBI ua mafai ona mapuna a’e, ona o le poto o lo o mafai ai e le ISIS ona faasalalau a latou ata i luga o upega o fesootaiga, e aofia ai ata i le fasiotiina o ni alii tusitala Amerika se to’alua ia James Foley ma Steven Sotloff, ma ua masalomia ai loa le i ai o se vaega a le alii o Ahmad Abousamra i nei taumafaiga uma. O Abousamra o se sitiseni o Amerika, ae tupuga mai i Suria. O le tausaga e 2009 na amata tau saili mai ai e le FBI o ia, ina ua masalomia lona fesoasoani e lagolago faiga faaterorisi. Na aoga Abousamra i le Iunivesite o Northeastern ma maua ai lona faailoga tikeri i masini komipiuta, ma o lo o masalomia lona fa’aaoga o lea tomai e fesoasoani ai i vaega fa’atupu fa’alavelave.

FA’AMAONIA MOLIAGA I LE ALI’I SA AVEA MA KOVANA

O le vaiaso nei na ta’usala ai e se vaega iloilo iuga le alii sa avea ma Kovana o le setete o Virgina faatasi ai ma lona to’alua, ona o faiga taufaasese ma faiga fa’aalatua sa la faia ao avea i laua ma taitai o lea setete. E 11 moliaga ua tausala ai le alii o Bob McDonnell ae o lona toalua o Maurene e 9 moliaga ua tausala ai, ona o tuuaiga e afua ai meaalofa ma tupe sa la maua mai i se tagata fai pisinisi.  O se tasi o itu mataina i lenei mataupu, e le gata ua nofosala le ulugalii ae ua manino ai foi ma le faamuta aloaia o le la faaipoipoga mo le umi e 38 tausaga.

AMATA ONA MAUA E OBAMA TAMA LEAGA A OSAMA

Talu mai lava le oti o le taitai a le vaega faatupu fa’alavelave o le al-Qaeda ia Osama bin Laden, o lo o fa’aauau pea ona faaumatia e vaega au faapitoa a le malo tele o Amerika isi tama faamoemoeina a le alii o Osama, e pei ona fasiotia ai i le aso ananafi le taitai o le isi vaega faatupu faalavelave i Somali, le ‘Al-Shabaab’, le alii o Ahmed Godane. Na ona faamaonia lava e vaega au a Amerika o le vaega tonu o Somali o lo o lafi ai le alii o Godane, faatulaga loa ma osofaiga a ana va’alele fa’apitoa ua taua o le ‘drone’ e fesoasoani i vaega au faapitoa na latou faatinoina le osofaiga ma fasiotia ai se tasi o fili ua tele tausaga o tau sailia mai.