[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea ua toe aga’i atu ai Kati i le fale talimalo lea na nonofo ai matua o Mena, e saili po o galue ai pea le tamaitai lea ua masalomia i le fa’alavelave.]

Na ona taunu’u lava o le ali’i i le fale talimalo, savali sa’o loa i le vaega e oka ai mea inu malolosi ma oka ai loa ana ipu uaina e lua, ona toe savali lea i le laulau ua ia filifilia e nofo ai ma saofa’i ai loa e fa’atali ai le taunu’u ane o ana mea inu, e lei umi ae savali atu loa le tamaitai e avatu ana meainu, ma te’i ai Kati ina ua ia vaaia o le tamaitai tonu lava lea na ia tuu atu le telefoni ia te ia i le aso ua te’a e talanoa ai, lea lava o lo o faigaluega i le fale talimalo, e le i toe faatali le alii ae ua faaali loa ona uiga tausaafia e faatosina atu ai le tamaitai ia te ia, ma ia tauanauina ai le tamaitai e alu atu la te laulau, faitalia ia ma faatau ana mea inu ma se la taumafataga.

Ua aga’i atu i le lua itula talu ona talanoa Kati ma le mafine lea, ma ua amata fo’i ona vevela mai faiga a le ipu uaina lea o lo o fefiloi ma taumafataga e pu pu ai le evaga, ae o le taimi lea, ua uma ona polomisi Kati i le tamaitai, o laua e momoe i le fale talimalo i le aso lea, ua uma fo’i ona ia totogiina le potu faapitoa mo laua, e leai la se mea e popole ai fua. Na lilo i le maula lea, o le la talanoaga atoa lea o lo o pu’e e le tama i ana masini faapitoa, ona o lo o masalomia o ia i lona fesoasoani i faiga faatupu fa’alavelave, pe tusa o le 5 itula talu ona talanoa Kati ma le mafine lea i le vaega o lo o faatau ai le ‘ava malosi, ae manatu loa le ali’i ua tatau ona fa’apuupuu le po, ua tatau ona aga’i atu i le potu mo sina malologa, ae o le taimi fo’i lea ua ova le ‘ona o le tamaitai, ona la savavali atu ai loa lea i le potu lea ua totogi e fa’amautu ai mo le po, ae na te’i le tamaitai ina ua ia vaaia o potu pito sili ona taugata lea ua la aga’i atu i ai ma le tagata lenei, ona fautua lea o le tamaitai ia Kati, afai o ia o se tagata milione, e tatau ona fa’aeteete ina ne’i osofa’i o ia e tagata o le latou vaega o lo o galulue ai i totonu o le fale talimalo.

Na toe fesili Kati i le tamaitai po o le a le uiga o lana fa’amatalaga e fa’atatau i tagata fa’atupu fa’alavelave, ae na tali le tamaitai, “O le fale talimalo lenei o lo o pulea e le tagata e igoa ia Tomasi Jr, o le atali’i lea o le ali’i faipisinisi mai Enelagi e igoa ia Tomasi lea na fasiotia e ni tagata i ni nai masina e lei mamao atu i totonu lava o lana fale talimalo, lea la ua malaga mai isi sa galulue i le fale talimalo i Enelagi e galulue iinei, e fesoasoani i le pisinisi atoa ai ma le faaauauina o faiga e pei o le ave faamalosi o tagata e nonofo iinei”, o le tala lea a le tamaitai na matua te’i ai Kati, peita’i sa taumafai pea le alii e faaleano i le faamatalaga lea. “O ai la oe ao ai fo’i lea e te faigaluega ai”, o le fesili lea a Kati i le tamaitai, ae o le taimi lea matua ona ai lava le tamaitai ua tau le mafai fo’i ona talanoa.