O le aso Faraile na te’a nei na pasia ai e le maota maualuga a le Senate le pili na tuuina mai e le faigamalo a Lolo ma Lemanu, e talosagaina ai se suiga i tulafono tau Femalagaaiga, ina ia mafai ai ona fa’aleleia pepa mo le silia i le to’a 3,700 tagata mai fafo o lo o nonofo fa’asolitulafono i le atunu’u.

Mai le palota e 13-1 na pasia ai e le Senate lenei tulafono taufa’aofi, e na o le afioga i le ali’i senatoa ia Galea’i M. Tu’ufuli na palota leai, peita’i na saunoa le afioga i le ali’i senatoa ia Laolagi Fonoti Savali Vaeao, talosia, o le a avea le pasia e le fono o lenei tulafono taufa’aofi ma itu e mafai ai e le ofisa o femalagaaiga ona fa’amalosi tulafono tau femalagaiaga a le teritori, ma taofia ai le mae’a o le isi 10 tausaga ae toe talosaga mai fo’i le faigamalo i le Fono mo se isi mataupu fa’apenei.

O le fa’aiuga a le senate e pasia ai lenei tulafono taofaaofi, na faia lea ina ua mae’a se iloiloga sa valaau e le Komiti o Mataupu Tau Tulafono a le Senate, lea na molimau ai le Loia Sili e fa’atatau i le tulafono lenei.

Saunoa le alii loia sili ia Talauega Eleasalo Ale e fa’apea, o le silia i le to’a 3,000 tagata o lo o taua i totonu o le pili e manaomia le fia fa’aleleia o a latou pepa nofomau, o lo o latou maua le avanoa e agava’a ai i tautua a le malo e pei o le falema’i ma aoga, ae leai se latou sao o lo o tuu mai i le malo e pei o le tipi lea o lafoga e fesoasoani ai i le atina’e ma le tamaoaiga o le malo.

E le o i latou uma nei o tagata na malaga mai i pemita ma nonofo faasolitulafono ai i le atunuu, o ni isi o i latou nei ua leva ona faaulu a latou talosaga mo pepa nofomau, ma ua tele tausaga o nonofo faatali, o isi fo’i sa i ai a latou I.D ma maua le avanoa e faigaluega ai i le atunuu, peita’i ua le mafai ona toe fa’afou a latou I.D ona ua malaga i fafo ma le atunuu a latou sponsor, ma ua toe poloaina i latou e saili ni isi a latou sponsor.

O le agaga o afioga i senatoa e pei ona latou faaalia i le taimi o le iloiloga, e le tatau ona toe tula’i mai lenei faafitauli i le lumana’i, o le toatele o tagata nonofo faasolitulafono e aumau i le teritori.

O se tasi o popolega na faailoa e afioga i alii senatoa i le loia sili, o le maua atu ai e tagata ua tausala i solitulafono i lalo o le polokalame a le Amnesty, ae na faamanino e Talauega i luma o le komiti e faapea, e le o tagata uma ua lesitala i le Amnesty e agavaa i le polokalame, ae muamua ona iloilo e le komiti agavaa ma faamaumauga a i latou nei, ina ia mautinoa e agavaa i latou i lalo o taiala o lo o manaomia.

Ua maea ona faia le iloiloga a le maota o sui i le mataupu lenei, ma o lo o faatali sa latou faaiuga e tusa ai o lenei tulafono taufaaofi.