Na fa’aalia e le Teutupe a le malo ia Ueligitone Tonumaipe’a i luma o le Komiti o le Paketi a le maota o sui i le taeao ananafi, lona lagolagoina o se tulafono taufaaofi e sii ai totogi o le kovana ma le lutena kovana, mai le $125,000 ma le $100,000.

Saunoa Tonumaipe’a e fa’apea, talu mai le tolu tausaga ua mavae, ua lelei lava tulaga i tupe ao a le malo, mai le 5% e o o atu i le 20% le maualuga, na te iloa fo’i ma mautinoa, e gafatia e tupe o le lotoifale ona fa’atupe le siitaga i totogi e pei ona fuafuaina.

Na fesiligia e le sui fofoga fetalai ia Talia Fa’afetai Iaulualo le mataupu e fa’atatau i alauni tupe lea e maua e le kovana ma lona faletua pe afai e mae’a le taimi la te nofoia ai le nofoa i le taitaiina o le malo, e pei ona i ai le 60% o le totogi o le kovana e avea ma alauni tupe mo ia pe a alu ese ma le nofoa, ae 30% o lona totogi e maua e lona faletupe pe afai e maliu le sa avea ma kovana.

O popolega o le afioga a Talia, afai nei ae pasia le siitaga o le totogi o le kovana i le $125,000 mo se fa’ata’ita’iga, o le a sii fo’i i luga le alauni tupe na te maua mai le 60% o lona totogi, e fa’apena fo’i i lona faletua.

Na talosaga Talia pe le mafai ona fai se suiga i pasene o alauni tupe, ina ia suia pasene mo le kovana i le 50%, ae 25% mo le faletua o le alii kovana, ae na fautua le Teutupe, e sili pe a taoto ai pea i le tulaga o lo o i ai le tulafono mo le taimi nei, atonu o se isi tausaga o i luma ona toe faia lea i ai o ni isi suiga, e fuafua lava i le tulaga e i ai le tamaoaiga o le atunuu.

Na taumafai le afioga i le alii faipule ia Fetui Fetu Jr e fa’atu lana mau e suia ai fuainumera e sii ai totogi o le kovana ma le lutena kovana, i le $160,000 mo le kovana ae $120,000 mo le lutena kovana, peita’i o lea mau e le i aloaia e le komiti.

Na fesili Fetu Jr i le Teutupe, pe gafatia e tupe lotoifale ona fa’atupe siitaga i totogi  e pei ona ia taumafai e fa’atu ai le mau, ae na tali le Teutupe, e gafatia e tupe lotoifale ona fa’atupe siitaga i totogi o ta’ita’i o le malo, pau le tulaga e ono tula’i mai ai, e ono taofia ai e le malo ni isi ana galuega sa fuafua e fa’ataunuu, ona o le manatu e fa’asao le tupe e totogi ai le kovana ma le lutena kovana.

Na taua foi e le teutupe le tatau lea ona i ai se isi paketi faaopoopo mo le ofisa o le kovana pe afai e pasia le tulafono lenei, e fesoasoani ai i le faatupeina o le pili mo totogi o le kovana ma le lutena kovana.

Ina ua fesiligia le teutupe pe i ai se aafiaga o tautua a le ofisa o le kovana, po o ni tagata faigaluega foi pe afai ae pasia le tulafono lenei ma aloaia, na tali le teutupe na te le iloaina, pau le tulaga o lo o ia iloa, e mafai e tupe a le malo o lo o maua faalotoifale ona faatupe le siitaga e pei ona taua i le tulafono.

Talu ai e le i maua se tasi o le komiti pe valaaulia se molimau mai le Ofisa o le alii kovana e molimau i le tulafono taufaaofi lenei, e pei ona saunoa i ai le afioga i le alii faipule ia Taotasi A. Soliai, ua toe tolopo ai se fa’aiuga a le komiti i le tulafono taufaaofi seia aulia le taeao nei.

O popolega e pei ona saunoa Taotasi, ina nei avea siitaga o totogi o le kovana ma le lutena kovana e a’afia ai ni isi o tagata faigaluega i luga o le ofisa o le kovana, po o ni isi fo’i o tautua ma auaunaga o lo o ofoina atu mo le atunu’u, ona o le manatu e fa’asao se vaega tupe e tali ai le tulafono, o le mafua’aga lena sa ia talosagaina ai se molimau mai le ofisa o le kovana, na te fa’amalamalama le tulaga sa’o o le tupe e faatupe ai le siitaga o totogi.

O le isi tulaga na taua e Taotasi, ina nei pasia e le fono le tulafono taufaaofi lenei, ao lea ua latalata i le taimi e amata ai le tausaga tupe fou, ae le o i ai foi se vaega tupe o faatulaga e faatupe ai siitaga i totogi.

Ae na faamalamalama e le afioga ia Maugaoalii Leapai Tusipa Anoai, o le isi lea faipule e toalua i ai sui na faaulufaleina le tulafono taufaaofi lenei, e le o i ai se taimi e faatapulaa e tatau ona aloaia ai le tulafono o taua i le pili, lona uiga, o lo o tatala le taimi e mafai ai ona fa’amalosi le tulafono, e mafai lava fo’i ona fa’atoa fa’amalosi ma aloaia i ni isi tausaga o i luma.

Saunoa Fetu Jr e fa’apea, sa i ai fo’i le pili na pasia a le maota i ni nai tausaga ua mavae atu, e sii ai le totogi o le kovana ma le lutena kovana, ae ina ua oo atu i luga o le ofisa o le kovana le pili, sa teena mai ai.

I le talitonuga o le alii faipule mai Manu’a, tusa lava pe teena mai e le kovana le tulafono taufaaofi lenei, ae o le itu taua ua silasila le kovana i se finagalo o le fono.