TETE’E HYMIE SEFO I TUUAIGA A LE MALO

O le masina fou lea ua faatulaga e faia ai le uluai iloiloga o le mataupu faasaga ia Hymie Sefo, ina ua ia teena tuuaiga a le malo faasaga ia te ia i le taeao ananafi, ina ua tulai i luma o le faamasinoga maualuga mo le taimi muamua.

O tuuaiga faasaga ia Sefo na afua mai i le faalavelave lea na osofai ma talepe ai e nisi le faleoloa o FJP Kruse Inc i Leone, ma gaoia ai ni pusa teutupe sa i totonu o le ofisa o le faleoloa.

O lo o tuuaia Sefo i moliaga e aofia ai le talepe fale i le tulaga muamua, taupulepule e faatino le solitulafono o le talepe fale, faapea ai ma le moliaga o le gaoi.

O loo taofia pea i le toese le ua molia ina ua le mafai ona ia totogiina le $30,000 ua faatulaga e le faamasinoga e tatala ai o ia i tua.

MAE’A POLOKA A LEOLEO

O le amataga o le vaiaso nei na maea aloaia ai le poloka a le Matagaluega o le Puipuiga o le Saogalemu Lautele, lea na amata mai i le ogatotonu o le masina na te’a nei mo le umi e tolu vaiaso.

O lea tautua faapitoa a le Matagaluega o Leoleo sa faamalosia ai tulafono mo le vaavaaia o ave taavale onana i luga o le alatele. I le faaiuga o le vaiaso na te’a nei, e silia i le toa 30 i latou na taofia e leoleo i le falepuipui i Tafuna, ona o tuuaiga e aofia ai le ave taavale ‘ona, faatupu vevesi i nofoaga faitele ma aiga, tagofia o le ava malosi ae le’i atoa le 21 tausaga, atoa ai ma le mataituina lea o faleoloa ma pisinisi o loo latou faatauina atu le ava malosi i fanau laiti.

I le faaiuga la o le tautua faapitoa a le matagaluega i le vaiaso nei, na mafai ai ona maua ni ripoti i nisi o faleoloa ua aga’i i ai suesuega, ona o tuuaiga i lo latou faatauina atu lea o le ava malosi i fanau laiti.

E leai ni faalavelave matuia na tutupu i le aso malolo na te’a nei, sei vagana ai lava i latou na taofia ona o le faatupu vevesi i nofoaga lautele, faapea ai totonu o aiga.

Na taua e le tamaitai loia sili lagolago ia Camille Philippe, lea o loo tulai mo le malo i le faamasinoga faaitumalo, e toatele i latou na taofia ma tuuaia i le ave taavale ‘ona, peitai e le o mafai ona maua atoa se aofaiga o i latou na taofia ma tuuaia talu ona amata mai le poloka a leoleo.

“O nisi foi o i latou sa taofia i le 3 vaiaso ua tuana’i atu ma tuuaia i le ave taavale ‘ona, o loo se’i a latou laisene ave taavale, o loo faanofovaavaaia foi i latou i lalo o poloaiga a le faamasinoga.

TITO MALAE

O le alii lea o loo tuuaia i lona faaoo lea o ni manu’a tuga i se isi alii e ala i lona togiina lea o ia i le ma’a, ua molia nei e le malo i le moliaga mamafa o le faaoolima i le tulaga lua, lea e mafai ona faasala ai se tasi i le toese mo le umi e le silia ma le 5 tausaga, pe faasala foi i le salatupe e le silia i le $5,000, pe afai ae faamaonia e le faamasinoga lenei solitulafono.

O le moliaga ua tuuaia ai Tito Malae na tulai mai i Iliili i le masina na te’a nei, ina ua tulai mai se feeseeseaiga i lo la va ma le alii ua manu’a, ma i’u ai loa i lona tu’iina o le ulu o lea alii i le maa ma togafitia ai o ia i le falemai, lea na manaomia ai filo e 12 e tau su’i ai lona manu’a, e pei ona taua i faamaumauga a le faamasinoga.

E $5,000 le tupe ua faatulaga e le faamasinoga e totogi ona faatoa mafai lea ona tatala Malae i tua, e faatalitali ai taualumaga o lana mataupu o loo faagasolo i le taimi nei.