E to’alua Faipule mai le maota o sui na tete’e i le taimi na faitau fa’atolu ai suiga i tulafono mo le aso o le palota, e aofia ai le fa’asa lea ona toe faia ni BBQ pe toe fa’atutu fo’i ni faleie i nofoaga e i ai fale palota.

Mai le palota e 13-2 na pasia ai e le maota o sui le tulafono i le vaiaso nei, e na o le afioga i le ali’i faipule mai Pago Pago ia Va’amua Henry Sesepasara ma Fetui Fetu Jr na palota leai, e ui e to’atele faipule sa latou fa’aalia lo latou le lagolagoina o le tulafono i le taimi na fesiligia ai e le Komiti o Tulafono a le maota o sui le Komesina o Palota e fa’atatau i le tulafono lenei.

Na taua e ni isi o faipule i le taimi o le iloiloga, o le faia o BBQ i le aso o le palota, o se tu ma aga lea ua masani ai sui tauva aemaise ai o le atunu’u, i le o atu lea e fai le ekisi ma le fa’amoemoe a mae’a, ona maua lea o sina taumafataga e fo’i ma le tagata i le aiga.

Toeititi fa’afa ona taua e le afioga i le ali’i faipule ia Fatulegae’e Palepoi Mauga i le taimi o le iloiloga, “lona le lagolagoina” o lenei tulafono, peita’i sa fautuaina o ia e le Komesina o Palota ia Tuaolo M. Fruean, e le tatau ona vave vave sona finagalo e tete’e i le tulafono, ona o lo o i ai isi fo’i vaega taua o le tulafono e tatau ona ia lagolagoina.

O se tasi o mataupu na to’atele faipule na latou fesiligia, o le vaega lea e fa’asa ai ona toe ofo atu ni meaalofa i tagata palota ao lumana’i ai le palota, ona o lo o manino i lalo o le tulafono lea faiga, o ni faiga e fa’atosina ai tagata palota.

Na fesili le tamaitai faipule ia Vui Florence Vaili Saulo ia Tuaolo, pe fa’apefea le tagata palota o lona itumalo lea ua sulu atu ia te ia mo se fesoasoani tau tupe, e totogi ai le pili a lona aiga, po o le taimi fo’i na te tuuina atu ai se meaalofa tupe i lana faifeau e pei ona ia masani ai i le tele o taimi, pe ono avea lea gaioiga ma itu e molia ai o ia i lona faia o ni gaioiga fa’atosina ao lumana’i le palota.

Na fa’amanino e le tofa Tuaolo e fa’apea, e le mafai ona ia taliina le fesili a le faipule, ina ne’i avea sana tali ma auala e ta’ina ai finagalo o sui mamalu, ae na o le fa’amasinoga fo’i e mafai ona ia taliina le fesili lea.

Na fa’atepa e Tuaolo afioga i faipule i le fa’aiuga a le fa’amasinoga o lo o taua i totonu o le tulafono, lea e fa’auigaina ai e le fa’amasinoga gaioiga faapea o faiga fa’atosina.

O le to’atele o faipule sa latou taua le tulaga lea, o le ofoina atu o taumafa i le aso o le palota, o se gaioiga e talafeagai ona faia e sui tauva, o le latou tali atu lea i tagata palota o itumalo taitasi, peita’i e talitonu fo’i ni isi o sui faipule, o suiga o le tulafono lea ua tuuina mai e le Ofisa o Palota, ua talafeagai mo le tulaga faigata ma le pagatia ua i ai le tamaoaiga, ae o se auala fo’i e fesoasoani ai i sui tauva ina ia fa’a taugofie faiga palota i le lumana’i.