... i fa’alavelave mata’utia

O le vaveao o le aso Tofi na te’a nei na faia ai se savaliga a ni isi o matagaluega a le malo atoa ai ma sui o faalapotopotoga tumaoti i le atunuu, e fa’ailoa ai lo latou lagolagoina o le ofo atu o fesoasoani mo i latou na aafia lagona ma mafaufau i faalavelave matuia na aafia ai le atunuu ma le lalolagi, i le taimi tonu na faamanatu ai le atoaga o le 13 tausaga, talu ona tuana’i le fa’alavelave mata’utia na a’afia ai le laumua i Uosigitone, ina ua osofa’i e le au fa’atupu fa’alavelave i le aso 11 Setema 2001.

E le gata na lagolagoina e sui matagaluega ma faalapotopotoga tumaoti i le atunuu lenei fa’amoemoe, ae sa fa’aalia fo’i lo latou agaga lagolago e ala i le fa’apipi’i solo o lipine lanu samasama ma le lanu viole e fa’ailoa ai lo latou lagolagoina o lenei fa’amoemoe.

Na taua e le sui fa’atonusili o le Matagaluega o Tupulaga Talavou, Tina ma Tamaitai ia Tapumanaia Galu Satele le taua tele o lenei polokalame, ua mafai ai ona tutu faatasi ni isi o matagaluega a le malo e lagolago lenei polokalame.

Na taua e ni isi o i latou na auai i le savaliga i le vaveao pe tusa o le 5:30, o le taua o le polokalame lenei, ua fa’ailoa atu ai i tagata na aafia mafaufau ma lagona i faalavelave matautia na tutupu i Amerika Samoa ma le Iunaite Setete, e le o tuu lafoaia i latou i taimi pagatia o le olaga.

“E le gata o le vaiaso lenei e faamanatu ai le 13 tausaga talu ona tuana’i le fa’alavelave na aafia ai le laumua i Uosigitone, ae o le masina foi lenei o lo o faamanatu ai le galu lolo na aafia ai Amerika Samoa i le 2009”, o le molimau lea a se tasi o tagata faigaluega a le malo na auai i lenei savaliga.

E le gata na faapipii lipine i pou moli ma vaega eseese o le alatele, ae sa faailoa foi le lagolago e ala i laei sa ofu e le to’atele na auai i le polokalame.

Na molimauina e le lalolagi i luga o televise le aloaia e le malo o Amerika i se sauniga faapitoa sa faia i le laumua i Uosigitone, soifua o ona tagatanuu uma na maliliu i le fa’alavelave na tula’i mai i le 2001.