Ua fa’aalia e ni isi o le atunu’u o lo o agava’a i fa’amanuiaga i lalo o le polokalame o le “American Samoa Nutrition Assistance Program - ASNSP), po o le “Food Stamp” e pei ona lauiloa ai lo latou agaga fa’afetai i le Fa’atonusili ma le Ofisa, ona o ponesi ta’i $90 lea ua fa’amanuiaina ai latou i lenei masina.

Na fa’amatala e ni isi o lo o agava’a i le polokalame a latou ponesi lea ua faamoemoe e amata tufatufaina i le taeao nei, “o se fa’aola totoga mo nai aiga lima vaivai”, ae na fa’aigoa e isi lea fa’amanuiaga, “o se fesoasoani tele lea mo latou aiga”.

Na taua e le tina matua o Vineula Lafaele mai Aua lona faafetaia o le ofisa i lenei fesoasoani ua maua e i latou o lo o agava’a i le polokalame mo lenei masina, o le a fesoasoani tele ai i ni isi o manaoga o le aiga.

“Talosia ae faaauau pea ona maua ni nai faamanuiaga pupuu faapenei i le lumana’i, ina ia mafai ai ona fesoasoani i nai o matou aiga lima vaivai”, o le saunoaga lea a le tina matua o Vineula.

Na taua e le Fa’atonusili o le Matagaluega o Tautua ma Alagamanuia Lautele ia Taeaoafua Dr. Meki Solomona i le Samoa News i le po o le aso Faraile na te’a nei, a o le i tu’u va’a ese atu mo Hawaii e fa’apea, o faamanuiaga ua tuuina atu mo i latou uma o lo o agava’a i lalo o le polokalame, o se vaega laititi lea ua mafai ona fesoasoani atu le matagaluega i nai aiga o le atunuu.

“O le agaga atoa o le matagaluega, ia maua pea ni fa’amanuiaga faapenei mo nai o tatou tagata, e ala mai i polokalame o lo o fesoasoani mai ai le feterale ia Amerika Samoa, talosia ia aoga lenei ponesi faatauvaa i nai o tatou aiga”, o le saunoaga lea a le ali’i fa’atonusili.

I se pepa o fa’amatalaga sa tuuina mai e le matagaluega i le vaiaso na te’a nei, sa latou fa’amalamalama mai ai le uiga tonu o lenei ponesi fa’aopoopo.

Saunoa Taeaoafua e fa’apea, o lenei ponesi e na o le tasi lava le taimi e maua ai, ina ua talia e le Matagaluega o Fa’atoaga a le fetarale le fa’amatu’uina mai o lenei ponesi.

O lenei ponesi ua mafai ona fa’atupe mai i vaega tupe na totoe o le polokalame e le i fa’aaogaina mo le tausaga tupe lenei 2014.

O le ponesi e $90 e pei ona fuafua le tufatufaina atu i le taeao nei, o le a aofia mai ma pepa taumafa mo le masina o Setema.

E tusa ai ma faamaumauga ua tuuina mai e le ASNAP, e tusa ma le to’a 4,100 le aofa’i o le atunuu o lo o agava’a i lalo o lenei polokalame, ma e tusa ma le ta’i $139 o lo o maua e le tagata i le masina, fuafua lava i tupe maua a le tagata i le masina.