O le aso ananafi na tu’uina atu ai e le afioga i le alii kovana ia Lolo Matalasi Moliga sana tusi i ta’ita’i o le Fono Faitulafono, e fa’ailoa atu ai se tulafono ua ia fuafua e fa’aulu ina ia fa’aopoopo ai tupe maua a tagata litaea i masina ta’itasi i le maualuga e 0.5%.

Na taua e Lolo i lana tusi, o le siitaga mo tagata litaea a le atunuu (COLA), o le a mafai ona fesoasoani ai i le tulaga ua i ai le tamaoaiga o le atunu’u i le taimi nei, ma fesoasoani ai i le tausiga o latou aiga mo aso fai soo.

Sa ia taua fo’i e fa’apea, o lenei laasaga o se auala lea e momoli atu ai le agaga faafetai a le malo atoa ai ma le aloaia o le latou tautua, mo tausaga e tele sa latou galulue ai mo le manuia o le faigamalo a Amerika Samoa.

Saunoa Lolo e fa’apea, o le siitaga mo tagata litaea, o se faaiuga ua faia ina ua tasi se finagalo o le Komiti Faafoe o le Litaea, e faia se siitaga i lalo o le vaega e taua o le ‘Cost of Living Adjustment - COLA’ mo le maualuga e 0.5%.

O i latou uma lava na amata litaea i le aso 1 Oketopa 2012 ma luma mai, o le a agava’a i lalo i lenei siitaga, ma ua fa’amoemoe e tatau ona amata a latou siitaga i le aso 1 Oketopa 2014.

A o sauni atu ai e fuafua siitaga mo le COLA e pei ona saunoa Lolo, ua mafai fo’i ona maua i ripoti le tulaga malosi ma mautu o teugatupe a le litaea o lo o i ai, e fesoasoani ai i le fa’atupeina o le siitaga lenei.

Na faaiu le tusi a le alii kovana i lona talosagaina lea o ta’ita’i o le fono, ina ia ave la latou lagolago mo le pasiaina o lenei tulafono e fesoasoani ai i tagata litaea a le malo.

Ina ua fesiligia e le Fono Faitulafono le Teutupe ia Ueligitone Tonumaipe’a i le masina na te’a nei, e faatatau i teugatupe a le litaea, na taua ai e le molimau i luma o le maota o sui tulaga malosi ma lelei o teugatupe a le litaea o lo o i ai.

O Tonumaipe’a na tofia e le alii kovana e avea ma totino o le Komiti Fa’afoe o le Litaea, e sui tulaga i le teutupe muamua a le malo ua tuumalo, le susuga ia Falema’o Dr. Phil Pili.

Saunoa le teutupe e fa’apea, e taua tele le inivesi o tupe a le litaea i fafo ina ia mafai ai ona maua mai ni isi vaega tupe fa’aopoopo e fesoasoani ai i le tupu i luga o le teugatupe.