Ua i luma o le Maota o Sui  se I’ugafono Malilie Fa’atasi a le maota, e talosagaina ai le afioga i le alii kovana ia Lolo Matalasi Moliga, ina ia toe fa’aauau le faaopoopoina o siitaga o totogi fa’aletausaga a tagata faigaluega tumau a le malo, lea ua tele o tausaga o taofia pea e lei toe faia.

O le agaga o lenei iugafono pe afai ae pasia, ia amata atu i le tausaga tupe fou 2015 ona toe faaopoopo siitaga i totogi o tagata faigaluega a le malo.

Na taua e le Teutupe a le malo ia Ueligitone Tonumaipea i se iloiloga sa faia i luma o le maota o sui i le masina na te’a nei e fa’apea, e mafai lava ona faia faaopoopoga i totogi o tagata faigaluega tumau a le malo, ae fuafua lava i se saunoaga mai le alii kovana, o ia fo’i lea sa faia le fautuaga ina ia taofia le toe faia o faaopoopoga o siitaga o totogi atoa ai ma le taofia o le toe faa faigaluegaina o ni isi tagata faigaluega fou.

I le tino o lenei iugafono o lo o taua ai e faapea, o le taumafai ina ia taofia tulaga o tupe faaalu a le malo, na faia ai e le alii kovana se fautuaga ina ia taofia le toe faia o faaopopoga o totogi mo tagata faigaluega i le 2013, ae foliga mai i ripoti i tulaga o tupe a le malo, o lo o atagia ai le alu alu pea i luga o tupe ao a le malo, ma o lo o faaopoopo pea ana tupe maua faalotoifale e le o faaitiitia.

I le iloiloina o le paketi a le malo mo le tausaga tupe fou 2015, na atagia mai ai le toe faia o se folafolaga, o le a toe faaauau siitaga faaopoopo i totogi o tagata faigaluega a le malo, ma ua atagia mai ai le toe foi atu o tupe maua a le malo i se tulaga lelei.

O le faaopoopo pea o siitaga i totogi o tagata faigaluega, o se tasi lea o fuafauga sa faia mai e le malo i taimi ua tea, e ala lea i le maea ona iloilo lelei o tulaga i auaunaga ma tautua a tagata faigaluega, e le gata i lea, o se auala lea e faafiafia ai nai tagata faigaluega ma faaosofia ai le naunau e faatino galuega lelei mo le malo.

E talitonu afioga i faipule sa faaulufaleina lenei iugafono, talu ai o tulaga lelei ua maitauina i tupe maua ma tupe ao a le malo i le taimi nei, ua alaga tatau ai ona toe faaauau le faaopoopoga i totogi o tagata faigaluega tumau a le malo.

Ina ua fesiligia e faipule le alii teutupe i se tulaga tonu ua i ai tupe maua a le malo i le taimi nei, na taua ai e Uelinitone Tonumaipea e fa’apea, ua aga’i atu i le 20% le maualuga o le tulaga ua i ai le siitia o tupe ao a le malo

I le taimi na iloilo ai e le komiti soofaatasi a le fono le paketi a ni isi o matagaluega a le malo, na fesiligia ai e ni isi o senatoa ma faipule le mafuaaga e taofi ai le toe faafaigaluegaina o tagata faigaluega atoa ai ma le siitaga i totogi, ao lea lava e faa faigaluega e le malo tagata i lalo o konekarate i ni totogi maualuluga.

Toeititi o faipule uma sa auai i le iloiloga na fesiligia ai e le maota o sui le teutupe, na finagalo e tatau ona toe fautuaina le kovana ina ia toe faaauau loa siitaga i totogi a tagata faigaluega a le malo, lea ua ova i le ta’i 4 tausaga o taofia mai.

Na talosaga faipule i le teutupe ina ia fautua i le kovana, ua tatau ona toe tatala le tulaga sa ia taofia, ina ia toe agavaa nai tagata faigaluega a le malo, aemaise lava ia i latou e maualalo le tamaoaiga o latou aiga i siitaga o totogi mo le tausaga tupe fou 2015.

O lenei iugafono sa faaulufaleina e afioga i alii faipule ia Larry Sanitoa, Taotasi Archie Soliai, ma Vailoata Eteuati Amituana’i.