E 46 tausaga o se alii faipisinisi mai Tafuna ua tuuaia nei e le malo o Amerika Samoa, i lona faia lea o ni uiga mataga i le niece a lona to’alua e 16 tausaga le matua, e aofia ai lona faamalosia o le tamaitai o loo aafia la te faiaiga, faapea ai ma lona faia i ai o isi amioga mataga, lea e taua i le gagana Samoa, o le “amio valea”, na tatalaina i tua i le aso Lulu na te’a nei, ina ua ia totogiina le tupe na faatulaga e le faamasinoga e tatala ai o ia i tua mai le toese.

E le gata ua tatalaina nei i tua lea alii mai le toese talu ona taofia ai mo ni nai aso, ae ua ia teena ina foi tuuaiga a le malo faasaga ia te ia, ina ua tulai i luma o le faamasinoga maualuga i le vaiaso nei.

O nisi o tuutuuga ua tatala ai i tua le ua molia e aofia ai le faasa lea ona ia toe taumafai e faafesootai le tamaitai o loo aafia i lenei mataupu.

O le tamaitai loia ia Sharron Rancourt o loo tulai mo le alii faipisinisi, ae o le tamaitai loia sili lagolago ia Camille Philippe o loo tulai mo le itu a le malo i lenei mataupu.

O moliaga faasaga i le ua molia e aofia ai lona faamalosia o se teineititi la te faiaiga, faia o uiga faa Sotoma i se teineititi, tagofia o itutinosa o se teineititi e le o sona to’alua, atoa ai ma lona faia o ni gaioiga e ono lamatia ai le saogalemu o se fanau laititi.

E le o mafai ona faalauiloa e le Samoa news le igoa o le ula lea, ona o puipuiga lava i le ono mafai ona iloa atu ai ma le igoa o le teineititi o loo aafia i lenei mataupu, e faamalulu atu ai ia i latou o loo talosaga mai ina ia faailoa atu le igoa o le alii faipisinisi.

O le faalavelave e pei ona tuuaia ai le alii faipisinisi lenei, na tulai mai i le va o Iuni ma Iulai 2012, ma tuuina atu ai loa i le alii leoleo su’esu’e ia Det. Poutoa I’amanu Jr le suesueina o lenei mataupu i le aso 30 Aokuso 2012.

Na taua e le teineititi o loo aafia i le alii leoleo e faapea, o le faalavelave lenei na tulai mai ina ua faatoa tasi le vaiaso talu ona latou nonofo ma lona aunty, (o le toalua lea o le alii faipisinisi), ma lona toalua (le ua molia) i lo latou fale i se taimi o le masina o Iuni.

Na taua e le tamaitai o loo aafia le faateia o ia ina ua oso atu le ua molia i totonu o lona potu ma taoto atu i ona tafatafa i luga o lona moega, ma taumafai e sogi atu ia te ia.

O le isi vaiaso na sosoo ai ma le vaiaso lea e pei ona taua i faamaumauga a le faamasinoga, na toe alu ai le ua molia i totonu o le potu o le teineititi o loo aafia, ma ia tatala i ona lavalava (tulou) ae fai i ai uiga mataga, seia oo lava i lona faamalosia o le teineititi la te faiaiga.

O le isi faalavelave na tulai mai i se taimi e latalata i le taimi na tupu ai le faalavelave lona lua, ina ua o le ua molia ma le tamaitai o loo aafia i le faleoloa, lea na tuu atu ai e le ua molia le ki o le ofisa i le tamaitai na aafia.

Na faamatala e le tamaitai na aafia i leoleo e faapea, ina ua tuu atu e le ua molia le ki o le ofisa ia te ia, sa alu loa ma tatala le ofisa ma le faamoemoe e ki moli, peitai ao tau tago atu e ki moli, na te’i ina ua aveese e le ua molia lona lima ae una’i atu o ia i totonu o le ofisa ae tapuni le faitoto’a, ma toe faamalosi ai foi o ia e le ua molia la te faiaiga i le aso lea.

O le faalavelave mulimuli na tulai mai i le taeao o le aso 29 Aokuso i totonu o le faleoloa, ina ua faatonu e le ua molia le tamaitai na aafia, la te faia ni uiga faa Sotoma ma Komoro, poo amioga faapaupau a’o le’i alu i le aoga i lea taeao.

Na faailoa e le tamaitai na aafia i leoleo sa fesiligia o ia e faapea, e le mafai ona ia taofia le alu atu o le ua molia ma faamalosi o ia, e aofia ai ma le taoto atu i ona luga, ona o ia o se tagata lapo’a toe mamafa.

Sa ia taua foi lona manao e ta’u i lona aunty le mea o loo tupu, peitai sa fai atu le ua molia ia te ia, e aua ne’i ona ta’uina i lona aunty ne’i ita ia te ia, pe tago fo’i fasioti o ia.

E tusa ai ma faamaumauga a le faamasinoga e pei ona tuuaia ai le ua molia, o loo taua ai se faamatalaga a le tamaitai na aafia i leoleo e faapea, e faatolu i le faafa i le vaiaso ona tulai mai gaioiga i le va o le ua molia ma le tamaitai na aafia, talu mai le uluai taimi na faatoa alu atu ai le tamaitai na aafia ma nonofo ma le ua molia ma lona toalua i lo latou aiga.