O le po o le aso Faraile na sei mavae atu nei na faapaleina ai le tamaitai lalelei o Janine Nicky Tuivaiti e avea ma Tausala Lalelei fou o Samoa i le fale taalo a le malo i Tuanaimato.

O le faapaleina o se tamaitai lalelei ma le atamai e avea ma Tausala Lalelei o Samoa atonu o se mea e tupu i tausaga taitasi. Peitai o le po o le aso Faraile na tea nei, na manumalo ai i le pale se tamaitai Samoa na soifua mai ma tuputupu a’e i Aotearoa i Niu Sila, ma o le taimi muamua ua oo mai ai i le atunuu na tupuga mai ai ona tua’a, na malaga mai e tauva ma manumalo ai i le pale o le Tausala Lalelei o Samoa!

Peitai na saunoa lea tamaitai aga filemu a e faafofoga i lana faasamoa e pei lava o se tamaitai na soifua mai i Samoa, ma ia faafetaia le alofa o le Atua mo le malosi na ia maua e tauva ai. Na ia faafetaia foi le tina o lona tina sa gafa ma le tausiga o ia faapea le faatonutonuina o ia i tu ma aganuu faasamoa, o se faiga e le faigofie pe a e alala i se atunuu e tautatala ai tagata i le gagana Peretania i taimi uma.

“Ua ou lagona le faagaeetia ma le faatauvaa ina ua filifilia au e fai ma amepasa mo Samoa i lenei po,” o a Janine lea. “E fia momoli atu lau faafetai i lau sponsor o le Thomsen’s Bridal Couture, o au uo aemaise lou aiga,” o lana saunoaga lea. O se faaaloaloga aupito i tele lenei ua ou maua i le alofa o le Atua.”

O lea tamaitai e 20 tausaga o lona soifua ma o lo o aoga faaloia nei o ia i le Iunivesete o Aukilani ma e sau o ia mai afioaga o Faleasiu-uta ma Levi, Falelatai. Na ia faaalia, le tele o lagona eseese e faigata ona faamatala sa ia faalogoina ina ua taunuu ma vaai i nuu sa soifua mai ai ona matua, aemaise o le vaai atu i laufanua sa tamomoe solo ai ona matua ao laiti.

Fai mai a ia, na te fia faalauiloaina Samoa i le lalolagi atoa, o se nofoaga matagofie e malolo ma tafafao mai i ai.

Sa matua faatumulia le fale taalo a le malo sa faia lea tauvaga i le po o le aso Faraile na tea nei, ae sa i ai sina tamai faaletonu i le amataga ina ua motusia faafuasei le eletise. Peitai sa sologa manuia mea uma ina ua toe ola mai.

O le tamaitai sa tulaga lua o Rezettakahealani Eric Mulitalo, lea sa lagolagoina e le Penina Day Spa, sa mate le toatele i lena po, o le a sola ma le pale ona o le lelei saunia o ana folasaga/ma le aga malie ae ma’ai le mafaufau. Na manumalo o ia i le faatalanoaga (Best Interview), o le faailoga e fai i palota i luga o upega tafailagi (Miss Internet), o le laei aupito i manaia na gaosia i se faiga faaleaganuu (Best Traditionally Inspired Attire), o le vaega o ie lavalava (Best Sarong) ma le puletasi aupito i manaia (Best Puletasi).

Peitai o aga faatamalii ma le mamalu a Janine ma lana gaoi faamaliuliu na tosina ai mafaufau o faamasino. Na manumalo o ia i le faailoga mo le tamaitai e aupito i lalelei i ata, ma le taleni (Best Talent), lea sa ia lagiina ai le vii o le saolotoga a Samoa. Na matua maofa le au maimoa i le manaia o le siufofoga o Janine ma sa faalogoina le patipati ae faatoa afa le vii o le fu’a!

Ina ua maea le faaaliga ma ua maea ona faapaleina o ia, sa ia toe faaalia i le au tusitala lona agaga fia fesoasoani i le faalauiloaina lea o Samoa i le lalolagi atoa o se nofoaga matagofie mo tafaoga ma malologa. Fai mai a ia, o le a ia galue vavalalata ma le ofisa o Turisi faapea ofisa eseese a le malo aemaise le atunuu lautele.

Ina ua fesiligia o ia pe ua oo muamua i Amerika Samoa, sa tali o ia e leai, ae ua ia faalogo o se nofoaga manaia tele.

“Ua tuai ona oo mai le tauvaga mo le sueina o le Tausala Lalelei o le Pasefika lea e faia i Tutuila sei ou asiasi atu ai i le teritori,” o le saunoaga lea a Janine. “E i ai foi ou aiga, le aiga o Ieli i Aua out e fia asiasi i ai.”

FAAIUGA O LE TAUVAGA MISS SAMOA:

Manumalo: Miss Thomsen’s Bridal Couture, Janine Nicky Tuivaiti

Tulaga Lua: Miss Penina Day Spa, RezettaKahealani Eric Mulitalo

Tulaga Tolu: Miss Lavashe Couture, Talosaga Tautai

Tulaga Fa: Miss La Lelei Sewing Shop, Le’emo Aoina Tupu

Faailoga Faameaalofa: Miss The Edge Cocktail Lounge, Miriama Fiu Aioese and Liss Treasure Island Gift Shop, Helena Darlene Ainu’u

Faailoga a le Ofisa o Turisi: Miss La Lelei Sewing Shop, Le’emo Aoina Tupu

Tamaitai Aga Tausaafia (Miss Personality): Miss The Edge Cocktail Lounge, Miriama Fiu Aloese