Na taua e le ali’i loia fautua ia Marcellus T. Uiagalelei i le fa’amasinoga Maualuga ananafi e fa’apea, so o se ituaiga fa’asalaga fa'a falepuipui e fa’asala ai e le fa’amasinoga le ali’i o Eric Naiuli o Afono, e le mafai e lea fa’asalaga ona toe fa’afo’i mai ai le soifua o le tagata ua ma’imau, pe mafai fo’i ona foia ma fofo ai manu’a aemaise ai o le tiga o lo o fetaia’i ma le to’alua o le ali’i ua maliu, ona o le gaioiga fa’atamala sa faia e le ali’i ua molia.

O ananafi na fa’asala ai e le fa’amasinoga maualuga le ali’i o Naiuli e taofia i le toese i Tafuna mo le umi e 9 masina, o se tasi lea o tuutuuga o lana nofovaavaaia e 5 tausaga, ina ua ta’usala o ia i le solitulafono mamafa o lona fa’atamala fa’aletulafono ua mafua ai ona o o le maliu i se tasi tagata, e mafua mai i le fa’alavelave lea na ia fa’ao’olima ai i se ali’i mai Afono lava i le amataga o le tausaga nei, mulimuli ane ai maliu lea ali’i ona o se manu’a tuga sa a’afia ai lona ulu, e mafua mai ina ua tu’i o ia e Naiuli ma pau ai i lalo ma a’afia ai lona ao.

Na finau le to’alua a le ali’i ua molia i le Ofisa Nofova’ava’aia, ina ia fa’asala Naiuli i le fa’asalaga pito mamafa o lo o fa’atulaga mai e le tulafono.

I lalo o le tulafono, e 5 tausaga le maualuga e mafai ona faasala ai Naiuli i le falepuipui, e tusa ai o le solitulafono o le vaega D lea ua ta’usala ai o ia.

O le aso Faraile na te’a nei na fa’atulaga e lau ai le fa’asalaga a le ua molia, ae na toe tolopo mai e le fa’amasinoga i le aso ananafi, ona o le finagalo o ali’i fa’amasino, ia maua se avanoa e fesiligia ai ma fa’atalanoa le faletua o le ali’i ua maliu, e tusa ai o lenei fa’alavelave, ona e le i maua e le Ofisa nofovaavaaia le avanoa e fa’atalatalanoaina ai le latou itu e tusa ai o lenei mataupu.

E ui i le talosaga a le faletua o le alii ua maliu ina ia fa’asala Naiuli i le fa’asalaga pito maualuga, peita’i na taua e le alii loia ia Uiagalelei e fa’apea, e tatau foi ona silasila le fa’amasinoga i ifoga e lua sa faia e le aiga o Naiuli, lea sa talia uma e le aiga o le ali’i ua maliu.

“O le mea moni, e le mafai e se fa’asalaga e tuuina mai e le fa’amasinoga ona aveese ai le manu’a ma lagona mafatia o lo o feagai ma le faletua o le ali’i ua maliu”, o le saunoaga lea a Uiagalelei, ma ia talosagaina ai le fa’amasinoga ina ia fa’asala Naiuli i se fa’asalaga nofovaavaaia, ia mafai ai ona alu o ia i tua e saili sana galuega ma fesoasoani ai i le toe totogiina o ni tupe e poloa’i e le fa’amasinoga o ia e toe totogi i le to’alua ma le aiga o le ali’i ua maliu.

O le itu na lelei ai le mataupu lenei, e le i finau le loia a le malo ia Tiffany Oldfield i le fa’amasinoga mo se fa’asalaga pito mamafa, ae sa ia talosagaina le fa’asalaga o Naiuli i le umi e 20 masina i le toese i Tafuna, o se tasi lea o tuutuuga o lana nofovaavaaia e 5 tausaga.

Sa ia poloaina fo’i le tatau lea ona toe totogi e le ua molia tupe sa totogi e le aiga mo le pili o le falema’i, atoa ai ma le tuuina atu o se sala tupe ia te ia.

Na taua e le to'alua o le ali'i ua maliu i lana molimau i luma o le fa'amasinoga maualuga i le vaiaso na te'a nei, e ui sa faia e le aiga a le ali'I ua molia ifoga e lua ma talia e le aiga a lona to'alua, ae o le taimi lava na ia toe vaaia ai foliga o Naiuli i totonu o le potu fa'amasino, na toe fafagu mai ai lagona tiga o lo o feagai ma ia i le mea leaga sa faia e lenei ali'i i lona to'alua.

Na tau le mafai ona molimau le tina i luma o le faamasinoga i le maligi tele o ona loimata, ao ia taumafai e faamatala le aafiaga lea ua aafia ai lona aiga i le taimi nei, ina ua motusia le latou mafutaga ma lona toalua, o le sa faalagolago i ai latou ma lana fanau i le tausiga o le aiga aemaise ai o tupe maua.

Na fa'ai'u le fa'amatalaga a le tina i lona talosagaina lea o le fa'amasinoga, ina ia fa'asala Naiuli i le fa'asalaga pito maualuga o lo o fa'atulaga mai e le tulafono.

Na umi se taimi na malolo ai le faamasinoga ao iloilo e ali’i fa’amasino sa latou fa’asalaga e tusa ai o lenei mataupu, ae ina ua mae’a,  na saunoa ai le alii faamasino sili ia Michael Kruse e fa’apea, o se tasi o itu o lo o mamafa i le manatu o le fa’amasinoga, o le talosaga a le to’alua a le ali’i ua maliu, e le o fesoasoani atu le aiga o lona to’alua ia te ia talu lava ona maliu lona to’alua, e tausi o ia ma lana fanau.

Na taua e Kruse se vaega o le ripoti a le Ofisa Nofovaavaaia o lo o taua ai le tulaga lea, ina ua o matua ma le aiga o Naiuli e fa’atoese i le aiga o le ali’i ua maliu i le taimi na fa’atoa mae’a ai le fa’alavelave, ae lei maliu lena o le ali’i na a’afia, e le gata na talia e le Sa’o o le aiga o le ali’i na a’afia le ifoga, ae sa fa’ailoa ane fo’i e le Sa’o i matua o Naiuli e fa’apea, e leai se mea latou te tau fa’atoese ai fua, aua e le gata sa ‘ona le ali’i ua maliu, ae o ia fo’i na amataina le vevesi na mafua ai ona tula’i mai le fa’alavelave.

Saunoa Kruse, atonu o i tonu lea e atagia mai ai se lagona o le faamasinoga e faatatau i le molimau a le toalua o le alii ua molia, i le le fesoasoani atu lea o le aiga a lona to’alua ia te ia ma lana fanau, talu lava ona maliu le tama o le aiga.

O le fa’alavelave e pei ona nofosala ai Naiuli na mafua mai i ni fiafiaga sa faia a tupulaga o le nuu ina ua mae’a atu se ta’aloga kirikiti, ona inu pia lea o Naiuli ma ana uo i le isi itu o le nuu, ae inupia le alii ua maliu ma le uso matua o Naiuli i le fale o Naiuli.

I se taimi o le po ina ua fo’i ane Naiuli i lo latou fale, sa ia fa’atonu ai loa le au alii o lo o inu pia i lo latou fale e aofia ai ma le ali’i ua maliu, e o ese loa, peita’i na avea lea ma itu na tula’i mai ai ni lagona le fiafia o le ali’i ua maliu fa’asaga ia Naiuli, ma i’u ina tu’i ai e Naiuli o ia ma pau ai i lalo ma manu’a lona ulu, peita’i, e le i avea o ia i le falemai i le po lea ae sa toe fo’i lava o ia i le fale, ma molia ai loa e le malo ia Naiuli i le moliaga mamafa o le fa’aooolima i le tulaga muamua.

Mulimuli ane ina ua maliu le ali’i na a’afia, na toe suia ai loa e le malo le moliaga fa’asaga ia Naiuli, lea e pei ona nofosala ai o ia i luma o le fa’amasinoga.

E 20 masina le umi na manatu le faamasinoga e taofia sa’o ai Naiuli i le falepuipui i Tafuna, o se tasi lea o tuutuuga o lana nofovaavaaia e 5 tausaga, peita’i o le a na o le 9 masina e taofia mo’i ai le ua molia i le toese, ae o masina o le a totoe ai o le a faamalumalu lona tuliina, fuafua lava i le usitaia e le ua molia o isi tuutuuga uma o lana nofovaavaaia.

O isi tuutuuga o lana nofovaavaaia e aofia ai lona toe totogi o le tupe e $2,907  mo mea sa faaalu i le maliu o le ali’i na a’afia, lea e aofia ai le pili o le falema’i ma le falemaliu e $1,207, ma le tau o le pusa maliu e $1,700.

O le $1,757 o lea tupe e toe totogi atu i le to’alua o le ali’i ua maliu, mo le tupe sa ia totogi mo le pusa maliu faapea ai le pili a le falema’i, ae o le tupe e totoe ai e totogi atu i le falema’i ma le fale pusa maliu mo le paleni o le aitalafu o lo o totoe ai.

Ua poloaina malosi foi e le faamasinoga ia Naiuli, ua faasa ona ia toe tagofia le ava malosi, faasa foi ona ia toe soli se tulafono a le malo, a ia avea o ia ma tagatanuu lelei e tausisi ma usita’i i soo se tulafono a le malo, ma ia saili sana galuega e galue ai i totonu o le 60 aso e tatala mai ai o ia i tua mai le toese i Tafuna.

Na fa'ai'u le saunoaga a le ali'i fa'amasino sili i lona fa'ailoa i le faletua o le ali'i ua maliu e fa'apea, e ui sa fa'afofoga toto'a ali'i fa'amasino i lana talosaga sa tu'uina atu i tulaga mafatia ua o o i ai lona aiga talu ona maliu lona to'alua, aemaise ai o le leai o se fesoasoani e maua atu i le aiga a lona to'alua mo ia ma si ana fanau, peita'i e le o se tiute tauave lena o le Vaega Iloilo a le Fa'amasinoga Maualuga, pau le tiute tauave a le Vaega Iloilo iuga, o le iloilo lea o fa'asalaga mo soo se solitulafono, ae mafai ona ia talosaga i le Vaega o Fa'amasinoga Savili (Civil Court) pe afai na te mana'omia le totogi e Naiuli o se vaega tupe mo le maliu o lona to'alua.