Ua fa’aalia e le Vaega Apili o le Fa’amasinoga Maualuga a Amerika Samoa lo latou fa’amautuina lea o le fa’aiuga sa tu’uina mai e le Komesina o Palota, e aloaia ai le agava’a o le afioga i le tama’ita’i faipule ia Vui Florence Saulo e avea ma sui tauva mo le Itumalo o Tualauta, i le faiga palota o lo o loma nei ina ua fa’amaonia, o Vui o se Nesionale o le Iunaite Setete o Amerika.

O le aso Gafua o le vaiaso nei na tu’uina mai ai e ali’i fa’amasino le latou fa’aiuga, e fa’ailoa mai ai le le mafai lea ona latou suia o le fa’aiuga ua mae’a ona tu’uina mai e le Komesina o Palota ia Tuaolo Manaia Fruean.

O le mataupu lenei na tofu atu i luma o le Vaega Apili, ina ua faila e Lusia Sua Bartley sana tagi, e fesiligia ai le fa’aiuga ua faia e Tuaolo, e aloaia ai le avea o Vui ma sui tauva Tualauta, mo le nofoa i le Maota o Sui, e pei ona taua i le fa’aiuga a le fa’amasinoga.

O le aso 2 Setema 2014 na faia ai e Tuaolo le fa’aiuga e agava’a ai Vui e avea ma sui tauva mo le Tualauta i le palota ia Novema 4, 2014, ae o le aso 5 Setema na faila e Bartley lana tagi e fesiligia ai le agava’a o Vui, e mafua mai i lona fesiligia lea o le pepa fanau a Vui, peita’i i le aso lava lea, na tuuina mai ai e Tuaolo  lana fa’aiuga e faamaonia ai, o Vui o le Nesionale o le Iunaite Setete, peita’i na avea lea ma itu na faila ai loa e Bartley sana tagi i le fa’amasinoga e fesiligia ai le fa’aiuga a le Komesina o Palota.

O le aso 2 Oketopa na fa’afofoga ai le fa’amasinoga i fa’afinauga a loia e tusa ai o lenei mataupu, fa’atasi ai ma le isi talosaga a Bartley mo se poloaiga a le fa’amasinoga e toe fa’aopoopo ai isi fa’amaumauga e tu’uina atu i luma o le fa’amasinoga e lagolago ai lana tagi, peita’i o lea talosaga sa teena e le fa’amasinoga.

I lalo o le tulafono e pei ona taua e le fa’amasinoga i lana fa’aiuga, e mafai ai e se sui tauva ua aloaia le tauva mo le palota ona ia fesiligia le agava’a o se isi sui e tauva ai i le palota, i le tuana’i ai o aso e tolu talu ona fa’alauiloa e le Komesina o Palota le lisi o sui tauva ua agava’a mo le palota.

E tele mataupu tau fa’amasinoga na siitia mai e le fa’amasinoga i lana fa’aiuga, o ni isi ia o mataupu na mafai ona toe asiasi i ai ali’i fa’amasino, mo le tau sailiina o se fa’aiuga mautu e uiga i lenei mataupu, e le gata i lea, na auiliili fo’i e le fa’amasinoga vaega o le tulafono e feso’ota’i ma le mataupu ua latou iloiloina nei, ina ia mautinoa e mausali sa latou fa’aiuga e tu’uina mai, e pei o ta’iala o lo o fa’ataoto mai e le ‘Administrative Procedures Act’ (APA).

Na teena e le faamasinoga apili le talosaga a le Komesina o Palota, ina ia fa’aleaoga le tagi sa fa’aulu e Bartley e tusa ai o lana fa’aiuga ua tuuina mai mo Vui.

I se vaega o le fa’aiuga a le faamasinoga o lo o taua ai e faapea, i se vaega o le talosaga a Bartley e manaomia ai le Komesina o Palota, na te faia se suesuega faapitoa i faamaumauga o le pepa fanau a Vui lea na fa’aaoga e talosaga ai lana tusi folau Amerika, e faamaonia ai o ia o se Nesionale o le Iunaite Setete ae le o se Sitiseni o le Iunaite Setete, “e le o lagolagoina e le tulafono”.

O tiute tauave o le Komesina o Palota, e gata lona malosi i lalo o ta’iala e pei ona fa’amanino mai e le tulafono.

I le tulaga o le taimi ua i ai mo le faiga palota aemaise ai tulaga uma o lo o siosiomia ai lenei mataupu, ua manatu ai le fa’amasinoga e pei ona taua i lana fa’aiuga, le le toe manaomia lea ona faia e le Komesina o Palota ni isi suesuega e ese mai i le fa’aiuga ua ia faia.

“E tusa ai i iloiloga uma ua matou faia e uiga i lenei mataupu, ua matou faaiuina ai, e leai se mafuaaga matou te toe liliu pe toe faia ai ni suiga i le faaiuga ua tuuina mai e le Komesina o Palota e tusa ai o lenei mataupu”, o se vaega lea o le fa’aiuga a le vaega apili o le fa’amasinoga.

“O le fa’aiuga a le Komesina o Palota e faailoa mai ai, o Vui o le Nesionale o le Iunaite Setete i le mae’a ai lea ona iloilo o le kopi o lona tusi folau Amerika, e le o se faaiuga e le o tusa ma le tulafono”, o se vaega lea o le faaiuga a le faamasinoga.

“Ona o ia tulaga uma, ua matou faamausaliina ai le faaiuga sa tuuina mai e le Komesina o Palota, e tus ai o le tagi a Bartley fa’asaga i le agava’a o Vui e avea ai ma sui tauva”, o se vaega lea o le faaiuga a le faamasinoga, ma teena ai loa e le faamasinoga le tagi a Bartley e tusa ai o lenei mataupu.

O le tu’uina mai ai o le fa’ai’uga a le Vaega o Apili, na faamaonia mai ai loa e le Komesina o Palota i sana tusi i tagata palota i le aso 7 Oketopa 2014, sui tauva e to’afa ua mae’a ona lesitalaina o latou suafa mo le faiga palota a le Itumalo o Tualauta, lea e aofia ai Lusia Sua Bartley; Larry S. Sanitoa; Leomiti Faitama’i Leomiti ma Vui Florence Tuaumu Saulo.

O lenei mataupu sa iloiloina e afioga i ali’i fa’amasino e aofia ai John L. Ward II; fa’amasino sili ia Michael Kruse, ma afioga i fa’amasino lagolago ia Mamea Sala Jr ma Fa’amausili Pomele.