I se fa’aaliga fa’alaua’itele sa tu’uina mai e le Komesina o le Ofisa Palota a le atunu’u, i tagata palota uma i Tutuila ma Manu’a, e le gata o lo o fa’amanino ai ituaiga tagata e agava’a i lalo o le tulafono lea e mafai ai ona faia a latou palota i le taimi nei, ona e le auai i latou i le aso o le palota (local absentee ballot), ae ua fa’ailoa ai ma le aso e amata faatino ai le faataunu’uina o palota mo i latou nei.

O le aso Faraile nei, Oketopa 10, 2014 ua fa’atulaga e amata faia ai palota a i latou nei, ma le fa’amoemoe e fa’amuta i le aso Gafua, Novema 03, 204, a o lumana’i ai le aso o le palota o lo o sosoo ai.

O ituaiga tagata e to’alima na taua e le tofa Tuaolo Manaia Fruean i lana tusi sa tu’uina aut i le au palota i le aso 8 Oketopa, 2014, e aofia ai:  i latou uma o lo o taofia i so o se falema’i; i latou o lo o taofia i so o se nofoaga i le teritori; i latou uma o lo o fa’ataotolia i gasegase o le tino i maota ma laoa; i latou e le mafai ona o o atu i fale palota mo le faia o a lato palota ona o tulaga tau tapuaiga po o ni fa’aiuga a le fa’amasinoga; ma i latou o le a avea ma tagata fai palota i le aso o le palota.

Na fa’amanino atili e Tuaolo e fa’apea, ina ia tusa ai ma le tulafono, ua mafai ai ona tu’u atu le malosi i le Komesina o Palota na te fa’alauiloa se aso po o ni aso, e mafai ai ona fa’ataunu’u faiga palota mo i latou nei.

“Ina ia tusa ai ma le vaega o le tulafono e pei ona taua, ua ou tuuina atu ai lenei fa’asilasilaga i tagata palota uma e le mafai ona o o atu i nofoaga palota mo le faia o a latou palota i le aso o le palota, ona o gasegase, tulaga tau tapuaiga, po o ni isi lava mafua’aga le ma’aalofia, ina ia tuuina atu a outou talosaga i le pulenu’u o la outou afioaga”, o se vaega lea o le saunoaga a Tuaolo.

O le Pulenu’u na te tu’uina atu le talosaga i le Ofisa o Palota, ma amata ai loa le faia o a latou palota i le aso Faraile nei.

O le a malaga atu i tua i maota ma laoa o i latou ua agava’a i lalo o lenei vaega o le tulafono sui o le Ofisa Fai Palota, mo le fa’ataunu’uina o palota a i latou nei.

“So o se tagata palota e agava’a i lalo o le vaega [o le tulafono] e pei ona taua ae ua le mafai ona tuuina atu lana talosaga i le Pulenu’u, e mafai ona tu’u sa’o atu lana talosaga i le Ofisa o Palota”, o le saunoaga lea a Tuaolo, ma ia fa’atula’i mai ai loa le itula e 4:30 i le afiafi o le aso Gafua, 03 Novema, o le aso lea e fa’amuta ai le toe faia o palota mo i latou e le avanoa i le aso o le palota.

“E le mafai ona toe faia se palota mo i latou nei i le aso o le faiga palota tele a le atunu’u”, o le saunoaga lea a Tuaolo.