Ua i luma nei o le Fono Fa’apitoa a le ali’i kovana o lo o nofoia nei, se pili mo se suiga i le tulafono e mafai ai ona sponsor e kamupani faipisinisi tagata mai fafo, ina ia faia ai se teuteuga i le tulafono o lo o i ai nei ma aveesea ai le fa’aletonu o lo o maitauina i le tulafono lenei, i le le manino lea o le aumaia e pisinisi o tagata mai fafo e galulue i totonu o pisinisi.

O se vaega o le tulafono,  o lo o taua ai le mafai e tagata Amerika Samoa uma, Nesionale o le Iunaite Setete fa’apea ai ma so o se kamupani e faipisinisi i Amerika Samoa ona latou sponsor tagata mai fafo, peita’i i le fa’atomuga o le suiga o le tulafono ua i luma nei o le fono faapitoa, o le faaupuga o lo o i totonu o le vaega lea o le tulafono, o lo o atagia mai ai se vaega laititi e le o manino lelei e faatatau i le aumaia o tagata mai fafo e se pisinisi o lo o galue faipisinisi i le teritori.

O lea tulaga le manino ua fai ma auala ua aumaia ai e pisinisi tagata mai fafo i se tulaga ua le o gatasi ma le tulafono, lea o lo o fa’apea mai ai se vaega, “ ...i le fa’atupulaia ai o le faitau aofa’i o le atunu’u i le taimi nei, pau le auala e mafai ai e Amerika Samoa ona puipui lana aganu’u ma le soifua lelei o tagata, ma mafai ai e Amerika Samoa ona iloilo tulaga manuia mo lana faigamalo aemaise ai o lona tamaoaiga i le lumana’i, o le taofia lea o le toe aumaia o tagata e le o ni Amerika Samoa i totonu o Amerika Samoa ...”

O le suiga la o le tulafono e pei ona fuafuaina, o le a manuia ai le teritori mai se faaupuga faapitoa e sili atu ai ona pulea lelei ma faatapula’a ai le aumaia e pisinisi o tagata mai fafo.

O le suiga la lenei o le tulafono e pei ona taua i le pili tau faaofi, e mafai e se kamupani ua fai pisinisi i le teritori ona ia aumaia se tagata mai fafo, “pe afai e fa’amaonia e le Loia Sili e mafai e lea kamupani ona ia tausia tagata mai fafo e ala i lona ausia o ni isi o vaega taua e pei o le, lava le tulaga tau tupe; faamaonia e mafai ona totogi vave lafoga ma isi lava totogi e faatonu atu e le malo; ia mautinoa tulaga lelei o le pisinisi pe afai o se pisinisi fou, ia lelei fo’i i le faagaioiina o tulaga tau pisinisi”.

O nei manaoga uma e pei ona taua i le tulafono, e mafai ona fa’alautele atili mai lea taimi i lea taimi, e ala i tuutuuga e faia e le loia sili.

E le mafai e se kamupani ona ia sponsor se tagata mai fafo, pe afai o lea tagata e a’afia i le faatautaiga o le pisinisi, e aofia ai ma tagata mai fafo o lo o inivesi tupe, po o le aufai sea i tulaga tau pisinisi.

Na taua e le loia sili ia Talauega Eleasalo Ale i sana molimau i luma o le Fono Faitulafono i se taimi e le i mamao atu, o le vaega o le tulafono lea e mafai ai e pisinisi ona sponsor tagata mai fafo, o le isi lea itu o lo o mama ai tulafono tau femalagaaiga, ma ua sauni le faigamalo e fa’aulu se pili mo se suiga o le tulafono.

O le taeao nei lea ua fa’atulaga e faia ai le iloiloga a le maota o sui ma le afioga i le loia sili ia Talauega i le itula e 8:00 i le taeao, e tusa ai o lenei tulafono taua, i lalo o le taitaiga a le afioga i le tamaitai faipule ia Vui Florence Saulo o le taitai komiti, ae mo le maota maualuga, e le i fa’atulagaina le aso e faia ai le latou iloiloga i lenei mataupu.