O le masina fou lea ua fa’amoemoe e taunu’u mai ai i le teritori le Sui Failautusi o le Matagaluega o le Initeria i Amerika Samoa, ma ua fa’alauiloa foi e le alii kovana ia Lolo Matalasi Moliga ni isi o fuafuaga a le faiamalo e fa’atali ai le toai taunu’u mai o lenei malaga taua, i le fonotaga a le kapeneta lea na faia i le aso Lua na te’a nei.

Saunoa le kovana e fa’apea, e le gata e “taua tele le ulua’i malaga lenei a le sui o le Initeria i le nofoaiga a le malo o lo o i ai nei”, ae o le isi itu e sili atu ai ona taua lenei malaga, “o lea ua malaga sa’o mai lava le sui o le vaega a le Iunaite Setete o lo o vaavaaia Amerika Samoa”.

Na talosagaina e le alii kovana sui uma o le kapeneta atoa ai ma isi sui sinia o matagaluega ma ofisa tumaoti a le malo, ina ia auai uma i so o se taimi e faia ai feiloaiga ma le au malaga a le Initeria, ina ia silafia ai fo’i e le au malaga le avatu o le fa’ataua a le faigamalo e talia fiafia ai le taunu’u mai o le latou malaga.

O le po o le aso Gafua, 10 Novema 2014 ua fa’amoemoe e taunu’u mai ai le malaga i Amerika Samoa, ma faia ai loa lea o se feiloaiga puupuu i le malae va’alele i Tafuna.

O le aso Lua e sosoo ai e faia ai le ‘ava fa’atali a le malo e fa’afeiloa’i ai le taunuu manuia mai o le faigamalaga, i le Fale Samoa a le malo i Utulei.

O le aso fo’i lea, i le Veterans Memorial Monument i Tafuna, ua fa’atulaga ai le polokalame e aloaia ai soifua o fitafita sa tautua i vaega ‘au a le malo ua maliliu, atoa ai ma i latou o lo o soifua pea e o o mai i le taimi nei, ma ua fa’amoemoe o le Sui Failautusi o le Initeria ia Esther P. Kia’aina e saunoa i le saunoaga autu o lea sauniga fa’apitoa.

E tele fonotaga ua fa’atulaga a vaega taitasi a le faiga malo ma le tama’ita’i sui failautusi, e aofia ai se fonotaga ma ta’ita’i o le tafatolu o le faigamalo a Amerika Samoa, fonotaga ma ni isi o fa’atonusili, atoa ai ma fonotaga ma ofisa tumaoti a le malo e aofia ai ma le falema’i o le LBJ.

O le aso Lulu e sosoo ai, aso 12 Novema ua fa’amoemoe e alu ai le malaga a le tamaitai sui failautusi ma sui o le malo, e asiasi atina’e ma galuega o lo o fa’atinoina i le motu o Manu’a, e aofia ai le fausiaina o uafu ma malae va’alele.

Na fautuaina e le alii kovana sui o lana kapeneta, ina ia pu’e maua le avanoa ua mafai ai ona malaga mai le tamaitai sui failautusi, e le gata e taua mo le alualu i luma o atina’e ma taumafaiga a le malo, ae mafai fo’i ona malamalama i ai tagata uma i fuafuaga a le Initeria mo Amerika Samoa.

“O le tatou tutu faatasi e lagolago fuafuaga faapenei, o se auala foi lea e momoli atu ai se feau o lo o tasi o tatou loto i le unaia ma le atina’eina o fuafuaga mo se manuia o Amerika Samoa”, o le saunaoga lea a Lolo i luma o lana kapeneta.