E toe fa’atalofa atu i le aufaitau i le fa’aiuga o lenei vaiaso, ae alo mai loa i le toe sosooina o le tatou tala fa’asolo, lea na gata mai i le vaiaso na te’a nei i le taimi lea na fa’atonu ai e Kati le ali’i loia e soia na te taumafai e tauanau le tamaitai o lo o la talanoa la te o.

Na nofo le ali’i loia mo sina taimi puupuu, ao tau to manatu i le gaioiga e tatau ona fai, peita’i na toe oso ae ona manatu, e le te’i te’i fai atu le tagata lenei ia te ia, e foliga mai e i ai se sootaga o le tagata lenei ma le tama’ita’i lea o lo o ia tauanauina la te o, ae o le tamaitai i le taimi lea, na ona tu a’e lava i luga, piki ma lana ato o lo o ta’atia i luga o le laulau, fa’asaga loa i luma o le a savali ese, ae na toe faliu lava i le itu lea o lo o tu mai ai le alii o Kati ma fa’apea atu i ai, “fa’afetai mo le fa’asaoina o lo’u ola i lenei afiafi, e le galo lou agalelei ma le to’a o lou loto i le fa’asaoina o lo’u ola,” na ona uma lava o tala ia a le tama’ita’i ia Kati, liliu atu loa i le ali’i loia ma fa’apea atu i ai lana tala, “lau susuga a le loia, faamalulu atu ona o lenei po, ae atonu ta te toe feiloa’i ai foi i se isi taimi” Na ona uma lava o le tala lea a le tamaitai fa’asaga loa i luma ma savali loa aga’i i le itu o lo o i ai le la potu ma le ali’i na fa’asaoina lou olaga, a o le ali’i loia i le taimi lea, na ona tu sasa’e a’e lava i luga, ato ese le laulau sa la nonofo ai ma le tama’ita’i i luga ae ua valaau atu ia Kati pe i ai se mea e mana’o ai, ae o le a fo’i lana feau e taumafai ai fua e fa’alavelave i le tamaitai sa la talanoa.

“Vaai oe uso, o la’u galuega tonu lava lea na mafua ai ona fa’a faigaluega a’u o se leoleo nana i totonu o le malo o Italia, ae o lo’u i ai i totonu o Aferika i Saute nei, o au o se tasi o sui usufono a lo’u atunu’u, ma ou te iloa e fa’apena fo’i oe, o oe o se sui usufono a le atunu’u lena e te malaga mai ai, ae ua lelei, o le a ou alu ese leaga ua to’atele tagata lea ua aga’i mai i totonu o le fale kalapu, ma ua tau fai au tilotilo uma mai fo’i i le vaega lea ta te tutu ma talanoa atu ai, po o ai taua ae o a fo’i ta galuega o lo o faia iinei”, o le talanoa atu lea a Kati i le alii loia lea ma savali ese loa mai luga o le laulau lea o lo o nofo to’atasi atu ai le ali’i loia, ma ua fa’asasa’o loa i le itu lea e i ai le la potu ma lana paga lea na semanui e a’afia i le gaioiga faafuase’i a le ali’i loia lea sa la talanoa. E alu ese atu fua Kati mai le vaega o lo o nofo ai le loia, ae o lona mafaufau ua taamilo solo i se gaioiga e ono muamua tula’i mai i totonu o le fale kalapu, ona o lea ua ia vaaia le tau fai autilo uma ane o isi tagata o lo o laulau tutu solo i totonu o le fale kalau, e foliga mai e i ai so latou sootaga ma le alii loia lea o lo o nofo mai pea i luga o le laulau na o ia. E fetaui lava le taumafai o Kati e fesootai i totonu o le potu lea o lo o faatali mai ai lana paga, ae tau atu loa ma lana vaai i le tau fai geno geno solo o lima o le vaega Saina lea o lo o lau lau tutu e pei oni Sikulaki i vaega eseese o le fale.