O le alii lea na ia osofaia ni fale se lua i Fogagogo i le masina o Me 2014, ua poloaina e le fa'amasinoga maualuga ina ia toe fo'i i Samoa pe a mae'a ona tuli lana faasalaga faa falepuipui e 12 masina le umi.

O le ali'i o Aukusitino Falanai na molia muamua e le malo i moliaga mamafa e lua o le talepe fale i le tulaga muamua faapea ai ma le moliaga o le gaoi, ae i lalo o se maliliega na latou sainia ma le malo ma talia e le fa'amasinoga, sa ia tali ioe ai i le moliaga muamua lea na toe teuteu e le malo, ina ia fa'ailoa ai le moliaga o le talepe fale i le tulaga lua, ae solofua e le fa'amasinoga le isi moliaga e tasi sa totoe.

Na faatoese Falanai i le faamasinoga maualuga i le taeao o le aso Faraile ua te’a e tusa ai o lana solitulafono sa fai, ma ia talosagaina ai se isi avanoa mo ia.

Sa ia taua e fa'apea, o masina e lima talu ona taofia o ia i le toese i Tafuna, ua mafai ai ona ia aoaoina se isi lesona taua mo lona olaga i le lumanai, ma ua ia lagonaina fo'i le sese o lana gaoioiga sa faia.

Na augani Falanai i le faamasinoga mo se avanoa sei toe fo'i atu ai i tua e tausi ona matua ma fa'aaoga aso o lo o totoe o lona olaga e auauna ai i le nuu ma le ekalesia.

Na talosaga fo'i ma loimata si ona tina i luma o le fa'amasinoga maualuga, mo se avanoa e toe tatala atu ai lana tama i tua latou te mafutaga, ma sei toe ave i ai se isi fautuaga mo ia.

Na taua e le tina e faapea, o Falana'i, o se alii e vaivai lona mafaufau, o nisi foi taimi e telegese ai lona mafaufau atoa ai ma lana tautua, ma o uiga ia e mafua ai ona manaomia le mafuta pea ma si ana tama, ina ia mafai ona ia fesoasoani i le gasegase o lo o a'afia ai o ia.

Na finau le alii loia fautua ia Joel Shiver na tula'i mo Falana'i i le faamasinoga, ina ia faasala le ua molia i se faasalaga nofovaavaaia, ina ia mafai ai e le fa'amasinoga ona mataitu tulaga uma o lana nofovaavaaia, peitai na finau le loia a le malo ia Tiffany Oldfield ina ia faasala o ia i le toese i Tafuna mo le umi e 28 masina, o se tasi lea o tuutuuga o lana nofovaavaaia e 7 tausaga.

O se tasi o itu e le i nofo lelei i le finagalo o le faamasinoga e pei ona saunoa le alii' fa'amasino sili ia Michael Kruse, o le taimi na tula'i mai ai le fa'alavelave lea ua ta'usala ai Falana'i, o le taimi lea e le o tulaga lelei ai ona pepa nofomau i le Ofisa o Femalagaaiga.

I faamaumauga a le faamasinoga o lo o taua ai e fa'apea, o le aso 21 Novema 2012 na mae'a ai le aoga o le ID a le ua molia, ma malaga atu ai i Samoa, peita'i na toe ulufale mai o ia i le teritori i lalo o se pemita e 30 aso, ma aumau ai lava i le atunuu seia oo mai i le taimi na tulai' mai ai le fa'alavelave e pei ona a'afia ai o ia.

E talitonu le faamasinoga, ana le toe ulufale mai le ua molia i le teritori, ailoga e tula'i mai le fa'alavelave e pei ona ta'usala ai o ia e le fa'amasinoga.

Na taua e le malo e faapea, o le mataupu e pei ona tausala ai Falana'i, na tula'i mai ina ua aga'i atu leoleo e suesue le mataupu fa'asaga i se fale na talepe ma osofaia e se tagata i Fogagogo, ae maua ai ia te ia mea totino sa ia aumaia fa'agaoi mai le isi fale e sosoo lava ma le fale lea sa ia osofaia muamua.

O mea totino na aveese ai e aofia ai se tino i tupe, o se telefoni faapea ai ma ni seevae.

E 7 tausaga na manatu le faamasinoga e faasala ai Falana'i i le toese, peita'i ua fa'amalumalu lona tuliina o lea faasalaga, ae o le a faanofovaavaaia ai o ia mo le umi e 7 tausaga i lalo o poloaiga a le faamasinoga e ao ona ia usita'i i ai.

O ni isi o ia poloaiga e aofia ai lona tuliina o masina e 28 i le toese, peita'i, e na o le 12 masina e taofia mo'i ai o ia i le falepuipui, a mae'a ona tatala lea o ia ma toe fa'afo'i atu i le atunu'u na malaga mai ai.