E 20 masina lea ua faasala ai e le faamasinoga maualuga i le toese i Tafuna le susuga a Punefuolemotu Tuaolo, ina ua ta'usala o ia i le moliaga mamafa e tasi o lona umia faasolitulafono vaega o le pauta faasaina o le aisa, atoa ai ma le moliaga mama o lona umia fa'asolitulafono o se fana e le'i lesitalaina.

Na tolopo e le faamasinoga mai le masina na te'a nei le fofogaina o lana faasalaga faasaga ia Tuaolo, ona o se talosaga sa faaulu e le loia a le ua molia o Karen Shelly, mo se avanoa e auina atu ai Tuaolo i Hawaii mo ni togafitiga fa'asaga i lona soifua maloloina.

Na taulima e le faamasinoga i le aso Faraile na te'a nei se ripoti e fa'atatau i le tulaga o lo o i ai le soifua maloloina o Tuaolo, atoa ai ma le manaoga e fia malaga i le faaiuga o le masina nei i Hawaii mo le tau fa'atulagaina o ni talavai mo lona soifua maloloina.

E ui e le i teena e le faamasinoga lea talosaga, peita'i na faailoa e le alii faamasino sili ia Michael Kruse i le loia a Tuaolo e fa'apea, e tatau ona toe i ai ni isi fa'amatalaga e tuu atu i luma o le faamasinoga e faatatau i le polokalame lea e mana'omia e malaga atu i Hawaii mo ana talavai, ina ia mafai ai ona fai se faaiuga maumaututu a le fa'amasinoga.

Na faailoa e Kruse ia Shelly e fa'apea, e ui e taua le talosaga ua taoto i luma o le fa'amasinoga, ae tatau fo'i ona silafia e le itu tete'e, e matuia moliaga lea ua nofosala ai Tuaolo.

Saunoa Kruse e faapea, o le mataupu e pei ona faasala ai Tuaolo e le faamasinoga, na afua mai ina ua maua e leoleo se ripoti mai ni isi o molimau, fai mai o lo o tulei atu e le ua molia fualaau faasaina i ni isi o tagata lautele o le atunuu, ma talosagaina ai loa e leoleo se poloaiga a le faamasinoga, e mafai ai ona latou sailia le fale ma meatotino a le ua molia, ina ia mafai ai ona faamaonia ripoti faasaga ia te ia.

O le poloaiga a le faamasinoga e faataga ai leoleo ona latou sailia le fale a Tuaolo, na maua mai ai vaega o fualaau faasaina, o pulufana, o se fana, atoa ai ma mea e fa'aaoga e tagata latou te tulei ma umia fualaau faasaina, lea foi sa tuuina atu uma i luma o le faamasinoga, ma faia ai loa le faaiuga a le faamasinoga ina ia fa'aleagaina uma mea nei e le Ta'ita'i Leoleo, ae molimau ai le Masela a le Fa'amasinoga.

I le ulua'i taimi na faatulaga ai le fofogaina o le faasalaga a Tuaolo, e le gata sa ia faatoese i le faamasinoga e tusa ai o lana solitulafono, ae sa ia talosagaina foi se isi avanoa mo ia, se'i faaauau ai pea ona mafuta i lona to'alua ma le fanau.

Sa talosaga fo'i lona faletua i le fa'amasinoga, mo se avanoa e fa'aauau ai pea ona latou mafuta ma le tama o le aiga.

E 5 tausaga i le toese ma le salatupe e $5,000 na manatu le faamasinoga e faasala ai Tuaolo mo le moliaga o lona umia faasolitulafono o vaega o le pauta o le aisa, ae tasi le tausaga e taofia ai o ia i le toese mo le moliaga o le umia faasolitulafono o se fana e le i lesitalaina, peita'i ua manatu le fa'amasinoga e fa'amalumalu lona tuliina o lea fa'asalaga, ae o le a nofovaavaaia o ia mo le 5 tausaga i lalo o poloaiga e ao ona ia usita'i i ai.

O ni isi o ia poloaiga e aofia ai lona tuliina o masina e 20 i le toese, e aunoa ma le tatalaina o ia i tua, se'i vagana o se tulaga matuia i lona soifua maloloina, e aofia ai ma le polokalame lea o lo o agava'a ai o ia mai Hawaii, pe tatala fo'i ona o se poloaiga na avatu e le fa'amasinoga.

O isi poloaiga a le faamasinoga e le gata ia totogi le salatupe e $5,000, ae ua faasa foi ona ia toe tagofia le ava malosi po o fualaau faasaina, faasa ona latou toe mafuta pe eva foi ma tagata o lo o tagofia le ava malosi po o fualaau faasaina.

Ua poloaina foi le tatau lea ona faia se suega i lona tino i so o se taimi ina ia mautinoa ai, na te le o toe fa'aaogaina fualaau faasaina, faapea ai ma le sailia o ana meatotino e aofia ai le fale ma le ta'avale e se leoleo po o se sui o le Ofisa Fa'anofovaavaaia, ina ia mautinoa o lo o ia tausisia uma tuutuuga a le faamasinoga ua tu'uina atu ia te ia.

O le aso Faraile na te'a nei na taofia ai Tuaolo i le toese i Tafuna, mo le amata tuliina o lana faasalaga.