Na fa’afetaia e le Sui Failautusi o le Ofisa o le Initeria ia Esther Kia’aina tulaga uma sa i ai tapenaga o le ‘ava na fa’afeiloaia le taimi na taunu’u mai ai le latou aumalaga i le atunu’u i le aso Gafua na te’a nei, i le mataina ma le maualuga o le aganu’u a Samoa.

“E i ai fo’i la’u aganu’u i lo’u atunu’u, ae ou te iloa e maualuga atu la outou aganu’u, ma o se aganu’u fo’i o te vaai maualuga i ai”, o le saunoaga lea a Kia’aina i le taimi na ia tauaaoina ai lana ipu ‘ava, o ia fo’i lea na muamua taumafa i le taimi na tufa ai le ‘ava i le aso Lua.

“O se avanoa lelei lenei ua mafai ona ou molimauina le aganu’u a Samoa i lo’u olaga, ua tele tala ua aave e fa’atatau i le maualuga ma le fa’aaloalogia o le aganu’u a Samoa, peita’i o lea ua ou molimauina, ma ua ou talitonuina ai le maualuga o le aganu’u a lo outou atunu’u”, o le isi lea saunoaga a Kiaaina na pati pati ai ta’ita’i o le atunu’u na auai e molimauina lenei sauniga taua.

Na taua e le afioga i le ali’i kovana ia Lolo Matalasi Moliga, lea na sosoo ma Kia’aina i le saofaiga i totonu o le Fale Tele, so o se taimi e feiloa’i ai Samoa ma ni malo fa’aaloalogia, o auala nei e fa’ailoa atu ai le maualuga ma le fa’aaloalo o Samoa i ana malo asiasi mai, o le fa’atinoina lea o le ‘ava o feiloaiga.

Ina ua tauaao e le afioga i le Maoputasi ia Mauga Tasi Asuega lana ‘ava, na tomua lana saunoaga i lona fa’afetaia o Kia’aina ma lona manatu e asia Amerika Samoa i lenei taimi o le tausaga, le taimi o lo o pito sili ona mana’omia ai e ta’ita’i o le atunu’u, se auala latou te feso’ota’i ma fa’asoa ai i auala eseese e fa’amausali ai tulaga manuia i le atina’e ma le tamaoaiga o Amerika Samoa.

Na fa’atusa e Mauga ia le tama’ita’i sui failautusi i le tala e fa’atatau ia Eseta o lo o i le Tusi Paia, lea na filifilia faapitoa e avea ma masiofo a le tupu ona o taimi faigata na feagai ma le nu’u o Sa Iuta.

“Afai ua filifilia oe e fai ma ta’ita’i i lenei itu o le tatou galuega, o la matou tatalo, ia manatua Amerika Samoa i so o se taimi”, o le saunoaga lea a Mauga.

Ina ua fesiligia e le Samoa News le afioga a Satele Galu Satele, lea fo’i sa i ai i le taimi o le feiloaiga ma le sui failautusi, i sona finagalo fa’a tama, fa’ata’ita’i o le atunu’u i le taua ma le aoga o le feiloaiga ma Kia’aina, na saunoa ai Satele e fa’apea, o le asia e le sui failautusi o Amerika Samoa i lenei taimi o le tausaga, aemaise ai o le taimi o le faigamalo a Lolo ma Lemanu, o se tulaga lelei lea mo le atunu’u ma ona ta’ita’i, e fetufaa’i ma latou fa’asoa ai i auala eseese e manuia ai le faigamalo a Amerika Samoa, aemaise ai o le tele o isi mataupu e fa’atatau ia Amerika Samoa o lo o talanoaina pea i le taimi nei.

Ae na saunoa Mauga e fa’apea, talu ai o Amerika Samoa o lo o i lalo o le vaavaaiga a le Failautusi o le Initeria, o le malaga mai la o Kiaaina, o se avanoa lelei lea mo ta’ita’i o le atunu’u e talanoa ma fa’amasani ma ia, ina ia manino lelei le tulaga e aga’i ia i le Sa o Tutuila ma Manu’a.