“A MALOLO, MALOLO FA’ATAMALI’I”

E ofo si fafige faikakala i le to’atele o tagata palota o lo o pisa ma talatalanoa i tagi e lua lea ua faila i luma o le fa’amasinoga fa’asaga i mataupu o le palota na mae’a atu nei. O isi latou te lagolagoina le tatau lea ona faila tagi fa’asaga i mataupu o le palota, ae o isi sa fa’aalia lo latou teena o le tuuina atu o nei mataupu i luma o le fa’amasinoga, ona o le talitonuga, “afai lava ua malolo le sui tauva, malolo fa’atamali’i”.

Ta’atia la le tagi na faaulu e se sui tauva o le itumalo #14, ae o le tagi e pito sili ona malie i le fa’alogologo a le fafige faikakala, o le tagi lea na fa’aulu mai le itumalo o le maoputasi e aofia ai le afioaga o Pago Pago, ona o lo o fesiligia ai le fa’amaoni o le Komesina o Palotaga ma le auala na ia iloiloina ai le pepa sa faatumu e le sui tauva sa manumalo, lea e i ai fesili sa tatau ona tali sa’o i ai le sui tauva, ma o lea fo’i fesili e manino sa’o ai lava le agava’a o le sui e tauva mo le tofi a le itumalo pe leai fo’i, i le fa’ailoa pe na a’afia lona igoa i se solitulafono i fafo.

Ae o le finau mai o le itu tagi e faapea sa nofosala le sui ua manumalo i ni solitulafono i ni setete o le Iunaite Setete, ua fesiligia ai le amiotonu o le faaiuga a le Komesina o Palota e agava’a ai le sui manumalo e palota. Fai mai le isi uo toeaina a le fafige faikakala, “afai lava ua malolo le ali’i faipule, ia malolo fa’atamali’i, e toe oso fo’i le la i se aso o i luma”.

“FAI MAI FO’I O LE SIAMUPIGI MAI FIKI”

Tomumumu le to’atele o tagata sa matamata i fusuaga sa faia i le fa’aiuga o le vaiaso na te’a nei, ina ua gao aano tupe na totogi e ulufale ai e matamata, ina ua salalau tala o le siamupini mai Fiti lea ua sau e fa’ato’ilalo le sui o Amerika Samoa ia Alapati Aasa, ae o se itu e fa’anoanoa ai, na lava a le tu mai a le ali’i Fiti na iloa atu ai, e le o ia o se siamupini, ma ua atili ai fo’i ina ua fa’ato’ilalo e Aasa i le ta’amilosaga muamua, ma alalaga ai loa isi tagata matamata fai mai, “fai mai fo’i o le siamupigi mai Fiki” E taape le fusuaga i le po lea ae sese’e atu le isi uo faiaoga a le fafige faikakala ma musumusu atu i ai e fa’apea, “e makua pepelo lava kala ia ga fa’alele e le faiaoga a Aasa fai mai o le siamupigi le po’a lea ga sau, ia a oso fo’i a siamupigi se’i vaai ga oga saviligia lava i le kaumakau a Aasa pakaku loa i lalo”.

O ripoti na maua e le fafige faikakala mai laga uaealesi mososoi o lo o taua ai e fa’apea, o le alii mai Fiti lea na fusu iinei, e fusu i le auaga o le curiserweight, ae o lana fusuaga muamua lea i le aupaga mamafa lea o loo fusu ai Aasa, ua atoa ai fo’i i lana fusuaga lea ana fusuaga e 21, 7 malo ma ana faiaina e 14. O le fautuaga a le fafige faikakala i le faiaoga ma le asosi o fusuaga a le atunu’u, amata nei ona aumai ni tama fusu iloga e fa’afetauia le aasa ua i ai le ali’i o Aasa, ina ia mautinoa e la’a pea i luma le atina’eina o lana taleni.

“MAFUA GA KELE LE MA’I O LE KELE O LE ‘AI”

Fa’alogo ma le toto’a si fafige faikakala i auala o lo o fetufaa’i ai sui o Samoa e lua i le fonotaga na mae’a ananafi, i auala e foia ai ma puipuia ai le tele o ituaiga fa’ama’i eseese lea ua a’afia ma maliliu ai le to’atele o tagata Samoa.

E ui la e le o se foma’i tipitipi po o se fa’atosaga fo’i le fafige faikakala, ae o le mea lilo lea ua vavala mai i lona mafaufau, e mafua ona tele ituaiga gasegase eseese e a’afia ai tagata soifua, o le tele o le soona tausami i meaai le tatau, tusa lava pe faitau miliona ma miliona tupe e aumai e le malo feterale e fa’atupe ai polokalame e tete’e atu ai i fa’ama’i le pipisi, atoa ai ma le puipuiga o isi fa’ama’i matuia, o le mea moni le atunu’u, o le ‘ai lava le fa’apogai o mea tiga uma e o o i le tino. O le fautuaga a si fafige faikakala i le atunu’u fa’apea ai le to’atele o ana uo mama’i o lo o i ai, ‘ai ia ola ae le o le ola e ‘ai”. Manuia Samoa.