O ali’i e to’alua ia na tu'uaia e le malo i lo la faia o uiga mataga i se teineitiiti e 17 tausaga le matua i le fa tausaga talu ai, ua la sauni e ta'utino i le fa'amasinoga i lalo o le maliliega lea ua latou sainia ma le malo, e sa'o tu'uaiga sa faia fa'asaga ia te i laua.

O le mataupu lenei na sauni le malo ma le itu a i laua ua molia e fa'ataunu'u se fa'amasinoga autu ma fa'amuta ai taualumaga o lenei mataupu, ae o feutanaiga sa fa'aauau pea i le va o le malo ma loia a i laua o lo o molia, lea ua taunu'u ai loa i le maliliega e pei ona sainia e itu e lua ma tu'uina atu i luma o le fa'amasinoga mo ana fa'amaumauga.

E ono (6) moliaga na ulua'i molia ai e le malo le ali'i faipisinisi o Mike Kim, ae 4 moliaga na ulua'i molia ai lana tama faigaluega ia Motau Samani.

O moliaga sa faia fa'asaga ia Kim e aofia ai lona fesoasoani e fa'atino le solitulafono o le  faiaiga fa'amalosi; faaoolima mataga; taumafai e faaleaga mea molimau a le malo; taumafai e ufiufi se solitulafono, atoa ai ma lona faia o ni gaioiga e ono lamatia ai le saogalemu o fanau laiti.

Ae mo le susuga a Samani, na tu'uaia o ia e le malo i le moliga mamafa o le fesoasoani i se isi tagata e fa'atino le solitulafono o le fai'aiga fa'amalosi; moliaga mamafa o le fai'aiga fa'amalosi; faia o feusuaiga mataga, atoa ai ma le moliaga mama o lona faia lea oni gaioiga e ono lamatia ai le saogalemu o fanau laiti.

E tusa ai o tu'utu'uga o le maliliega lea ua mae'a ona sainia e le malo ma i laua nei e to'alua, ua talosaga ai le malo i le fa'amasinoga ina ia talia suiga ua latou faia i le moliaga lona tolu, ina ia fa'ailoa ai le moliaga fou o le tagofia lea o itutinosa o se teineititi e laititi i lalo o le tulafono, o lea solitulafono, o le vaega D lea o solitulafono mamafa, lea e mafai ona fa'asala ai se tasi i le toese mo le umi e le sili atu i le 5 tausaga, pe fa'asala fo'i i le salatupe e le sili atu i le $5,000, po o fa'asalaga uma fo'i ia e lua.

I le tali ioe ai o Kim i le moliaga e pei ona taua i le maliliega, ua ia ta'utino ai e fa'apea, i se taimi o le aso 29 Iuni 2010 i Amerika Samoa, sa ia tagofia ai itutinosa o se tama'ita'i e aunoa ma le malie i ai o lea tama'ita'i' i gaioiga sa ia faia.

O le gaioiga sa faia e Kim e aofia ai lona tagofia o le fatafata o le tama'ita'i na a'afia a o faia pea laei o lea tama'ita'i, ma o lea gaioiga sa ia faia sa aunoa ma le malie i ai o le loto o le tama'itai na a'afia.

Ae i le tali ioe ai o Samani i le moliaga e pei ona taua i le latou maliliega ma le malo, ua ia ta'utino ai e fa'apea, i se taimi o le aso 29 Iuni 2010, ma le fa'amoemoe na te fesoasoani i se isi tagata i le fa'atinoina o se solitulafono, e pei o lona fesoasoani lea ia Kim i le fa'atinoina o le solitulafono lea ua la tali ioe ai nei.

Na tautino Samani e fa'apea, i se taimi o le aso e pei ona taua, sa ia fesoasoani ai i le alii o Kim e ala i lona aumaia o se tama'ita'i e 17 tausaga le matua ma ave i le nofoaga o lo o i ai Kim, ma le fa'amoemoe e fa'atino ai e Kim se solitulafono e aunoa ma le mafai e lea tama'ita'i ona toe alu ese.

Na ta'utino Samani e fa'apea, ina ua mae'a ona ia aumaia le tama'ita'i na a'afia ma tu'uina atu ia Kim, sa sau loa ma tutu i fafo o le faitoto'a a o tagofia e Kim itutinosa o le tama'ita'i na a'afia i le taimi a o faia pea laei o lea tama'ita'i.

Afai loa e talia e le faamasinoga le maliliega, ona talosaga loa lea o le malo ina ia solofua isi moliaga uma o lo o totoe ai i le pepa o le tagi sa latou fa'aulu fa'asaga ia Kim ma Samani.

O le isi ali'i e to'atolu i ai latou o lo o tu'uaia i lenei mataupu, o le ali'i leoleo ia Apisai Atoe, lea o lo o tu'uaia i lona taumafai lea e ufiufi le solitulafono sa faia e Kim ma Samani, e ala i lona fa'atonu lea o le tama o le teineititi na a'afia, ina ia alu i le ofisa o leoleo e toe ave i tua lana tagi sa fa'aulu fa'asaga i lenei mataupu.

O lo o tuuaia Atoa i moliaga mamafa e lua o lona fa'aleagaina o mea molimau a le malo, atoa ai ma lona taumafai e faia se gaioiga e ufiufi ai se solitulafono sa faia.

Na taua i mau fa'amaonia o lenei mataupu e fa'apea, o Samani na alu ma aumai le teineititi na a'afia ma ave i se fale i Tafuna, ma lana tala sa fai i ai, e maua ai iina lana galuega, peita'i ina ua taunu'u le teineititi i le fale na faamoemoe e maua ai lana galuega, sa ave e Samani i totonu o le potu, o iina lea na taua na faia ai loa e Kim uiga mataga ia te ia, ma ia tu'u i ai le $100 ina ua mae'a ona ia faia nei uiga mataga.

O le tama'ita'i loia ia Mitzie Jessop o lo o tula'i mo le itu a le malo i lenei mataupu, ae o loia mo i laua ua molia e aofia ai le susuga ia Fiti Sunia lea o lo o tulai mo Kim, ae o Joel Shiver mai le Ofisa Loia Fautua mo tagata lautele o lo o tule'i mo Samani.