Vaega: 114

Fa’atalofa atu i le mamalu o le atunu’u, i le alafa’i mai i le manuia i lenei taeao fou, malo le onosa’i, malo fo’i le tau i lenei aso, e ala i lou alo faiva i tiute ma galuega o lo’o feagai ai. Tatou vi’ia ai pea le alofa ma le agalelei o lo tatou Matai oi le lagi, e ala i Lana tausiga alofa mo i tatou e le mavae. Tatou manatu ai fo’i nai o tatou uso a tagata o lo’o fia a’ai ma fia feinu o lo’o fia maua se fesoasoani, ina ia o’o atu i ai le alofa o le Atua mo i latou.

Ae alo maia, o le a toe fa’aauau atu la tatou tala fa’asolo mo lenei aso, ae ia manuia lou alo atu i feau ma galuega o le a feagai ai i lenei aso. Na muta mai la tatou tala, i le fa’amuli a Petelo ma Misi, ona o lea ua o uma le toeaina o Paulo ma le lo’omatua o Eseta i le Fa’amasinoga a le aiga, o lea fo’i ua manuia mea uma e ala i le fa’atasi mai o le Agaga o le Atua.

Fai mai ina ua uma ona ta’ele Misi, na iloa lelei lava e Petelo, e i ai lava le mea o lo’o naunau mai i ai le loto o Misi, ma ua iloa lelei fo’i e Petelo, o lo’o mana’o lava Misi ia maua se avanoa e talatalanoa ai ma Losalia. Ua nofonofo nei Petelo ma fa’asolosolo ona mafaufauga, e fai lava ae popole lava i lona uso o Samuelu. Manatua fo’i ua fai le tala a Samuelu i a Petelo, o le taimi lava e toe fa’alogo ai ona taliga pe va’ai ai fo’i o toe talatalanoa ma Losalia, o le taimi fo’i lea e kolosi ai ma lana laina.

Ua avea la upu ma tala ia a Samuelu ma ala ua fai ai ma avega mamafa i le loto o Petelo, ae o le upu moni lava, o lo’o i ai lava manatu ma fa’alogona alofa o Petelo i a Losalia, ona ua umi fo’i le la faiga uo. O nei mea uma e le o iloa e matua o Petelo, e le i iloa fo’i e matua o Losalia.

Manatua fo’i o le po lava lea na alu ai Petelo o le a fa’ailoa i matua o Losalia o ia o lo’o fai le la faigauo ma Losalia, o le po lava lea na iloa ai e Petelo, sa fai le evaga a Losalia ma Solo, lea na maua atu e le tuagane o Losalia, ma na futi ai loa e le tina o Losalia le ulu i lea lava po. Fai mai ua fa’asolosolo nei mafaufauga o Petelo, a’o le taimi lea, o lo’o fai le ta’elega a Misi i le vai. Fai mai e fa’alogo atu Petelo o sau le pese a Misi, “E le uma lo’u fiafia ma lo’u fa’afetai, ua fai mo a’u o le alofa o le tautai o lenei atunu’u pele sa ou fanau mai ai o Samoa o lona suafa e pele tasi i lo’u agaga…..”

Na amata mafaufauga o Petelo i foliga o Losalia, o se tama’ita’i e lalelei, e u’umi fa’asasa’o lona lauulu, e tau ‘ena’ena, ae le ‘ena’ena tele, o lona faitino, ua matua’i selau pasene, o ona uiga, ua tu’u fo’i ia i e Petelo le isi selau pasene. Fai mai ua atili ai ona tau valea le ulu o Petelo i lea taimi. Ae na fa’ate’ia ina ua fa’alogo atu ua sau le isi pese a Misi, “Losalia o la’u pele, e sili i lo’u fa’amoemoe, pe e te alofa ea, ua te le iloa fuafua, ta te taumate oe e pei o se tupua….”

O a lava upu o le pese lea ua usu mai nei e Misi, ua le to’a ai lava le loto ma le mafaufau o Petelo, fai mai, na i’u ai lava ina maligi ifo loimata o Petelo i lea taimi. Ua tu a’e nei i luga ma taumafai e ave’ese ona mafaufauga mai i a Losalia, ae peita’i, ua le mafai lava. E fai fo’i o lona mana’o, a’o le mea e sili ona faigata, o le le la va ma lona uso o Samuelu, ua mafaufau nei, pe o le a fa’asili ifo Losalia pe sili lona uso, e pei ona fai ane ai i a te ia, ia ‘aua ne i toe faia.

E faia pea….