Vaega: 115

Ua magalo vai ae suamalie ‘ava i le alofa o le Atua, e ala lea i le alafa’i mai o le atunu’u i fanuga lelei o lenei aso fou. Tatou momoli ai la’au i foga’a ma sula le alofa o le Atua, e ala i Ana fa’amanuiaga i aso uma o lo tatou ola. Ae ia fa’asilisili pea i a i tatou le alofa o le tasi i le isi, o le ta’iga lea ua sili ona maoopoopo ma silisili ona lelei i totonu o aiga, nu’u ma ekalesia. ia alofa le Atua ma fa’amanuia mai i feau ma galuga o lea feagai ai i lenei aso.

Ae alo maia, o le a toe fa’aauau atu la tatou tala mo lenei aso, ae ia manuia lava le alo atu o le atunu’u i faiva ma tiute o lenei aso. Na muta mai la tatou tala, i le fa’asolosologa o mafaufauga o Petelo e uiga i lana manamea o Losalia, a’o le taimi lea o lo’o fai lava le ta’elega a Misi ma pesepese mai i totonu o le vai.

Fai mai ua le iloa le ituaiga ta’aga ua fai nei e Petelo, a uma ona tu i luga, ua saofa’i ifo i lalo, ua o’o ai lava ina ta’oto ifo i le mea na nofo ai. Ua le maua se mapusaga o lona loto ma lona mafaufau e uiga i a Losalia. Ua ulu le alofa, ua le toe mafai lava ona toe taofia, ae o le mea ua tupu nei, o lo’o i ai lava le mea o lo’o fa’aletonu ai ona manatu, ona e fai o lona popole i lona uso o Samuelu, ae o le isi itu, e le i iloa e ona matua.

Ua uma ona ta’ele le ali’i o Misi, ma na fa’ate’ia ina ua savali mai i totonu o le fale o’o o lo’o nofonofo ai nei ma Petelo ma Samuelu, o lo’o ta’atia atu Petelo. Ua lagona le popole o le loto o Misi, ona ua iai lona manatu ai ua tupu se mea i a Petelo, o lea na savali ai loa ma taufanu. “Petelo, Petelo, Kelo, sole, sole, o le a le mea ua tupu na ou alu nei fo’i ou te ta’ele, a’o lea fo’i ua e fa’apea mai. O le a lemea ua tupu?”

Ua tau nofo a’e i luga Petelo,“Oi Misi, ua, ua uma ona e ta’ele, ua mama ou lafa? Ua ‘ata Misi, “Se soia e te tautala i na mea, a fa’alogo i ai tagata ona fa’apea lea e mo’i, e atili ai lava ona le maua se teine a lau tama se, pe afai e te faia so’oa le na tala.”

Ua ‘ata Petelo ma tilotilo ane i a Misi i lea taimi, “E se o tala lava ta te toe ai, ua a, ua uma ona e ta’ele, ia sau loa e fai sou ‘ofu, ona fai ai lea o le ta mea’ai, ma ta talatalanoa, e i ai lava le mea o lo’o mamafa i lo’u mafaufau Misi.”

E le i uma atu tala a Petelo, ae fa’apea mai Misi, “Now you’re talking man….ia se i tope lo’u ofu ona ta a’ai ai lea ma ta talatalanoa, ou te iloa lelei lava le mea o lo’o i ai lou mafaufau.” E fai fai le gaioi a le tama o lo’o ta’alo i le ‘au a le Manu Samoa, e le taitai tutusa ma le gaioi a Misi i lea taimi, e le i umi lava, ae soafa’i ifo Misi i talane o Petelo. O le taimi lea ua uma ona laulau ane e Petelo le la mea’ai.

“ia afio maia lau susuga Maluiatoga mo lau meatausami, o lea ua uma ona laulau atu lau meatausami.” Ua ‘ata fa’amaela Misi, “ia a lailoa lava lou fofoga lau afioga Puipuifatu, ia o ai Maluiatoga, na o le Ailapola lea e nofo atu.”

E faia pea