E to'atele ni isi o le aufai fa'atoaga a le atunu'u ua fa'aalia lo latou le fiafia i le aumai fua o fua o fa'aeleeleaga mai Samoa ma Tonga, e faalauiloa i le Fa'aaliga a le Aufai Fa'atoaga a le atunu'u, lea sa faia i le malae o le Su'igaula a le Atuvasa i Utulei i le vaiaso na te'a nei.

Na taua e ni isi o le aufai fa'atoaga i le Samoa News e fa'apea, e leai se mea aumai ai fua ia fua o fa'aeleeleaga mai Samoa ma Tonga, atoa ai ma fualaau 'aina e fa'alauiloa i tauvaga a Amerika Samoa, o mea ia e patino lava ia Amerika Samoa latou ia.

"Aisea e aumai ai fua talo, kapisi ma isi mau fualaau 'aina mai Samoa ma Tonga e faalauiloa i le Farm Fair a Amerika Samoa, ae o le tauvaga latou e fa'apitoa mo tagata fai fa'atoaga a le atunu'u", o le ma'ema'ea lea a se tasi o ali'i fai fa'atoaga a le atunu'u, susuga Filisounu'u Mauga o Iliili.

Na taua e le susuga a Mauga e fa'apea, pau tagata e agava'a i le Farm Fair a le aufai fa'atoaga, o le tagata ua uma ona lesitala lona igoa e tauva, o ia fo'i lena e aofia ana fa'atoaga i le tauvaga, ae le o le aofia atu ai ma talo ma isi mau fualaau 'aina mai Samoa ma Tonga, ae leai se igoa o se fai fa'atoaga o lesitalaina.

"O le aufai fa'atoaga a le atunu'u lea e galulue punoua'i i le tautuaina o le atunu'u i aso uma ma le tausaga atoa, e timuia ma laina i le tau totoina o fa'atoaga, totogi vailaau taugata, atoa ai ma le tele o isi mau lu'itau, ona o le manatu ia selesele ma le manuia, ae fa'afefea ona aumai fua o fa'aeleeleaga mai Samoa fa'alauiloa iinei ae le o i ai se sao o le aufai fa'atoaga mai Samoa i totonu o le malo", o le saunoaga lea a Mauga na lagolagoina e le tina a Taimane Johnson.

Saunoa Johnson e fa'apea, o le Farm Fair lava ia e mo tagata fai fa'atoaga i Amerika Samoa nei, ae leai se mea e aofia atu ai ma isi fai fa'atoaga i fafo atu o le atunu'u.

Na taua e isi fai fa'atoaga e fa'apea, afai e le o maua se avanoa e avatu ai fua o fa'aeleeleaga a le atunu'u e fa'alauiloa i Farm Fair a Samoa po o Tonga, e le tatau fo'i la ona aapa fua Amerika Samoa e fai lea tulaga.

I le aso o le Farm Fair, na fa'aalia ai e le susuga a Pati Mata'u, o se ali'i fai fa'atoaga mai Tafuna lona le fiafia ina ua ia vaaia fua o fa'aeleeleaga mai Samoa ma Tonga, o lo o fa'alauilo i le Farm Fair, o le mafua'aga lena na fesiligia ai loa se finagalo o le ali'i fa'atonu o Faatoaga i le mafua'aga o le aofia ai o fua o fa'aeleelega nei mai fafo atu o le atunu'u.

Na taua e le Fa'atonusili o le Ofisa o Fa'atoaga a le malo ia Lealao M. Purcell i le Samoa News i le aso o le Farm Fair e fa'apea, o le taua o le aofia ai o fua o fa'atoaga mai Samoa ma Tonga i le tauvaga o lenei tausaga, sei aumai e fa'atusatusa le tulaga ola lauusiusi o faatoaga nei ma fa'atoaga a le atunu'u.

Saunoa Lealao, e leai se manatu e aumai fua o fa'aeleelaga mai Samoa ma Tonga, ina ia fa'a le aoga ai le tautiga a le aufai fa'atoaga a le atunu'u, ae o le agaga autu, ia mafai ona fa'atusatusa le tulaga o lo o i ai le lelei o fa'atoaga i Amerika Samoa nei ma fa'atoaga i fafo atu o le atunu'u.