O ni isi o suiga a le Ofisa o Femalagaaiga o lo o fesiligia e ni isi o le atunu’u, aemaise lava i le taofia lea o tusi folau o tagata mai fafo i le taimi e ulufale mai ai i le teritori, na taua e le afioga i le Loia Sili o le malo ia Talauega Eleasalo Ale, o ia fo’i lea o le Pule o le Ofisa o Femalagaaiga e fa’apea, o suiga nei ua leva ona i ai ae le i filifilia o ia e avea ma loia sili.

Na matua sapaia e le tofa a Talauega fa’aiuga o lo o faia e le Ofisa o Femalagaaiga, o ia fa’aiuga o lo o faia ina ia mautinoa le malupuipuia o tuaoi o Amerika Samoa, i so o se taimi e ulufale mai ai tagata mai fafo i le teritori, ina ia mautinoa e mafai ona maua e lona Ofisa fa’amaumauga o lo o mana’omia i le taimi e ulufale mai ai tagata i le teritori, atoa ai ma le taimi e toe ulufafo ese atu ai ma le atunu’u.

“E le o i ai ni fa’aiuga o faia e lo’u ofisa i o’u tua e aunoa ma lo’u iloaina, o fa’aiuga uma o lo o latou faia, o lo o faia ma le talitonuga e puipuia ai le saogalemu o le atunuu, ae fa’avae fo’i i luga o le tulafono”, o le saunoaga lea a Talauega i se fa’atalatalanoaga ma le Samoa News.

Na mafua ona fesiligia le loia sili i le mataupu lenei, ona o ni isi o fa’asea i le taofi lea e le Ofisa o Femalagaaiga o tusi folau a ni isi sa malaga mai i Samoa, e ui e le o tagata uma sa malaga mai i le va’alele i lea aso na taofi a latou tusi folau.

Ae i lalo fo’i o le tulafono e pei ona fa’amanino atili e le loia sili, o lo o taua ai le tatau lea i so o se tagata mai fafo ona fealua’i ma se pepa fa’ailoilo e fa’amaonia ai lona tagata i taimi uma e i ai i totonu o le teritori, ma, pau le pepa fa’amaonia e mafai e se tagata mai fafo ona alu ma feavea’i, o lona tusi folau, peita’i o le fa’afitauli, o lea ua taofi e le Ofisa o Femalagaaiga le tusi folau.

Na taua e Talauega e fa’apea, e le o tagata uma e ulufale mai i le teritori e taofi e lona Ofisa a latou tusi folau, se’i vagana ai lava ni mataupu e mana’omia le fia maua i ai o ni fa’amaumauga a le Ofisa, ona fa’atoa fai lea o le fa’aiuga e taofi se tusi folau.

Mo se fa’ata’ita’iga e pei ona saunoa le loia sili, so o se taimi e taunu’u mai ai le va’a mai Samoa i le uafu i Fagatogo, e taofi uma e le Ofisa o Femalagaaiga tusi folau o tagata sa malaga mai, mo le faia i ai o a latou fa’amaumauga i le Ofisa, fa’atoa maua ai lea o le avanoa o tagata malaga ina ia toe piki a latou tusi folau.

Ae mo i latou uma e ulufale mai i le teritori i le malae va’alele, e le o tagata uma e taofi a latou tusi folau.

“E le o tagata uma e ulufale mai i le malae va’alele e taofi a latou tusi folau, se’i vagana lava se mataupu e tula’i mai i se tagata e ulufale mai ae leai se pemita, ona fai lea o le fa’aiuga e taofi lona tusi folau, ina ia mautinoa lelei ai le aso e toe fo’i ese atu ma le atunuu, nai lo le faia o le faaiuga e toe fa’ati’eti’e lea tagata i le va’alele ma toe fo’i atu ai i lona atunu’u sa malaga mai ai”, o le saunoaga lea a le loia sili.

I le mataupu e fa’atatau i le tatau lea ona fealua’i le tagata mai fafo ma lana ID i so o se taimi, na taua ai e le loia sii e fa’apea, e mafai lava ona fa’aaoga e le tagata mai fafo lana laisene ave ta’avale e fai ma ana ID e feavea’i, a le o lena fo’i, ia toe vave piki lana tusi folau mai le Ofisa o Femalagaaiga.