I se pepa o fa’amatalaga sa tu’uina mai i le Matagaluega o le Soifua Maloloina i le vaiaso na te’a nei, o lo o taua ai le fa’atupulaia pea lea o i latou o lo o a’afia i le gasegase pipisi o le ‘fa’ama’i mata’ ma le ‘flu’, ae ua fa’aitiitia i latou e a’afia i le gasegase ua taua o le ‘chikungunya’.

Na taua e le Matagaluega o le Soifua Maloloina le fa’aitiitia malie ese atu o le toe pipisi o le fa’ama’i le ‘chikungunya’ mai totonu o le atunu’u.

Talu mai le taimi na fa’atoa pipisi mai ai lenei fa’ama’i i le atunu’u seia o o mai i le aso 14 Tesema 2014, e tusa ma le to’a 1,193 le aofa’i o i latou sa masalomia le a’afia i ‘auga o le fa’ama’i lenei o le ‘ckikungunya’, e to’a 19 na taofia i le falema’i mo togafitiga, ae leai se soifua na ma’imau ai.

“O le taimi nei, pe a ma le to’a 20 i le vaiaso le aofa’i o le mamalu o le atunu’u o lo o aga’i mai ma faia a latou siaki ona o a’afiaga i ‘auga o le fa’ama’i lenei, o se numera lea ua pau maualalo, pe a fa’atusatusa i le ova atu i le to’a 80 i le vaiaso sa matou vaaia ina ua fa’atoa pipisi lenei fa’ama’i i le teritori”, o se vaega lea o le pepa o fa’amatalaga sa tu’uina mai i le Matagaluega.

E ui o se tala fiafia mo Amerika Samoa le aga’i malie ese atu o lenei gasegase, peita’i o lo o maitauina le fa’atupulaia ma le saosaoa o le fa’ama’i lenei i Samoa, lea e pei ona o o atu i le to’a 3,135 le aofa’i o tagata sa vaaia i le falema’i, talu mai le taimi na amata pipisi ai lenei fa’ama’i seia o o mai i le aso 30 Novema 2014.

Pau fo’i le itu taua mo le motu tuaoi o Samoa, e leai se isi ua fa’amaonia na maliu i lenei gasegase mata’utia.

Ae mo le gasegase o le ‘fa’ama’i mata’ ma le ‘flu’, o lo o maitauina pea le fa’atupulaia pea i ni isi o vaega o le atunu’u.

I le o o atu ai i le to’a 8 tagata e vaaia i le falema’i i le vaiaso ona o le fa’ama’i mata, ua alaga tatau ai ona fautuaina pea le mamalu o le atunu’u, ina ia tausisi pea i puipuiga mo le saogalemu, e pei o le fufulu mama lea o aao i so o se taimi ma taumafai e aua le pa’i soo i le mata o lo o a’afia i le fa’ama’i mata.

Talu mai le aso 14 Tesema na te’a nei, e tusa ma le to’a 170 gasegase ua fa’amauina sa asia le falema’i, pe tusa lea ma le to’a 145 e asia le falema’i i le vaiaso.

O lo o talosagaina e le Matagaluega o le Soifua Maloloina le atunu’u o lo o a’afia i ‘auga o lenei gasegase, ina ia taumamao ese ma i latou e le o a’afia ina ia fa’atumauina pea puipuiga mo le atunu’u atoa.

Ua fautuaina fo’i le mamalu o le atunu’u o lo o femalagaa’i i fafo atu o Amerika Samoa, ina ia fa’aeteete i so o se taimi e malaga ai, ina ia mautinoa e tausisi i auala uma mo le puipuiga, aemaise lava o lea ua o o mai aso fiafia, ua to’atele fo’i tagata e femalagaa’i i fafo atu ma totonu o le atunu’u.

Ua fautuaina le atunu’u ina ia fa’afeso’ota’i le Matagaluega o le Soifua Maloloina mo ni isi fa’amatalaga.