Vaega: 130

Taeao manuia i le alafa’i mai o le atunu’u i fanuga lelei, tatou momoli ai la’au i foga’a ma sula le alofa o le Atua Soifua, ona o Ana fa’amanuiaga lea o lo’o tatou ‘oa’oa ai i faleseu ma o tatou sa’a ai i ma’a o malie i aso uma o lo tatou ola. Ae alo maia, o le a toe fa’aauau atu la tatou tala e pei ona masani ai, “Lupe o le Filifili. Ae ia manuia le alo atu o le atunu’u i faiva ma tiute o lo’o feagai ai i lenei aso.

Ua ma’ea le fausiaina o fale a nofo ai Petelo ma Losalia, o le faletali malo fo’i o le aiga, ua ma’ea lelei. O le fale e nonofo ai matua o le tama’ita’i o Vaitimaleata Caroline ua ma’ea lelei, o lea la ua nofoia nei e Salamasina ma Larry, fai mai, ua toe fa’afou le malosi o Sala ma Larry, ina ua nonofo i le la fale lea. Aua fai mai, o se ‘ele’ele ua sili ona matagofie e lumale i le sami, ae tuafale i la’au o le vaomatua. O se nofoaga e maua pea le ea lelei ma le ea mama i aso ma taimi uma.

Ua alo nei Petelo e fai lana tautua i le tuafafine o si ona tama, fai mai, o se tautua e le fa’atuaoi, e le gata i a Salamasina, ae sa tautua fo’i i auauna a le Atua, o lo’o i totonu o le afio’aga. O lo’o ia manatua pea a’oa’oga lelei na fai e ona matua a’o ola ma soifua mai, o lea lava e fa’aauau e Petelo. O le lua a’i o tausaga talu ona nofo Petelo i le suafa matai o lo latou aiga, na malolo mai ai loa Sila ma Su’e mai le galuega a le Atua, ina ua matutu i la’ua.

Ae e le i malolo mai Sila ma Su’e, sa galulue fo’i Vaitimaleata ma Petelo, ae maise o le fanau a Sila ma Su’e, e fau le fale e nonofo ai Sila ma Su’e, i le isi itu o le fanua o Alava’a. Fai mai le tala, e uiga lava o Su’e na i ai mai i le amataga o lea lava e fai, e moni lava le upu, ana o se amio e mafai ona tu’u, ae leaga ua masani ai Su’e i ona uiga fa’amaualuga ma le fia tagata. Ua leai Eseta sa ia fa’afetaui Su’e, o lea la ua i ai le manatu o Su’e, o le a sisi’i lana fu’a i le va lea, peita’i, e le i sao i a Vaitimaleata ma Petelo.

O a’oa’oga a Paulo ma Eseta, ae maise lava o le lo’omatua na fai i lana tama o Petelo, ia ‘aua ne i amanaia fua tala a Su’e ma ona uiga, ae alo ane e tausi lelei le aiga, ma ia maua lo latou nonofo fealofani ma nai ona tei uma lava, e aofia ai ma le fanau a Sila ma Su’e.

O lo’o tausi pea e Petelo ia fautuaga a ona matua, ae ina ua taunu’u ane Sila ma Su’e i le aiga, na va’aia ai e Petelo, uiga fa’ataulaitu o le lo’omatua o Su’e, e pei o se tagata e le i alu i le galuega a le Atua. Ae sa maua pea le onosa’i ma le fa’apalepale o Petelo, ae maise ai o si ona to’alua o Losalia. Fai mai ua pei Losalia o se tavini a Su’e, o mea uma o le fale o Sila ma Su’e e teuteu uma e Losalia.

Ae ina ua iloa mulimuli ane e Salamasina, le tuafafine o Sila, na o’o ane ai loa i le fale o Sila ma Su’e e le i toe fa’atali. “Sila, ua ou o’o mai e ta’u atu i a te oe le tuagane le sese tele o le mea lea e fai nei e lou to’alua, va’ai oe, o lo’o i ai le fanau a Petelo ma Losalia, o lo’o tau tausi tamaiti, a’o lea ua sau si fafine e pei o se tavini i a oulua, Sila, pau lava lea o le mea ou te matua’i le mana’o lava i ai, fai i lou to’alua, e tu ia i luga e gaioi, ua la, ua ‘ai, ‘ai ua a, tu’u loa  Sila, ‘aua ne i toe pupula mai o’u mata i uiga ia, ou te le mana’o ai.”

Fai ia Su’e, e tau teuteu mai ona uiga, ou te ofo, ua lo’omatua lava o fai lava nei uiga fa’apea, uiga tufanua ma le fia tagata, Sila, o la’u tala lea i a te oe le tuagane, se fai ma se alofa, va’ai i si tama ua lailoa Petelo, i le tausiga o tatou, fai ma le alofa Sila, sa i ai lo’u manatu sa oulua o i le galuega a le Atua, o le a i ai ni uiga lelei e tutupu mai ai, a’o lea la, oka, Sila tu’u loa, ou te le fia pupula atu lava i ai.”

Na tali filemu Sila i lona tuafafine, ma ua malie fo’i le loto o Salamasina, o lea na tu’u ai loa, a’o Su’e, se sa’o lava le upu, e sili lo ta fa’afesaga’i ma le vale, na i lo le tagata e fa’afesaga’i ma Su’e.

E faia pea…