O le tama’ita’i  lea na ulufale fa’amalosi i totonu o se fale o se aiga i Tafuna i le po, ma gaoi ni mea totino sa i totonu, ua molia nei e le malo i moliaga mamafa o le talepe fale i le tulaga muamua atoa ai ma le gaoi.

O le vaiaso na te’a nei na faila ai e le malo moliaga fa’asaga ia Elega Sauaso i luma o le fa’amasinoga fa’aitumalo, ae o le taeao ananafi na tula’i ai le ua molia i luma o le fa’amasinoga maualuga ma teena moliaga fa’asaga ia te ia.

I lona teena ai o tu’uaiga fa’asaga ia te ia, ua fa’atulaga ai loa lana ulua’i iloiloga mo le masina fou o Ianuari 2015, lea o le a iloa ai pe faia sa latou malileiga ma le malo e fa’amuta ai lenei mataupu, po o le fa’atulaga loa o se aso e faia ai sana fa’amasinoga autu i luma o tagatanu’u o le atunu’u.

O le mataupu lenei na tofu atu i le ofisa o leoleo i Tafuna i le aso 19 Me, 2014, ina ua logo e se molimau le ofisa o leoleo mo se fesoasoani, i le fale o lona uncle ua masalomia le osofa’i e se tagata.

E tusa ai ma fa’amaumauga a le fa’amasinoga, e osofa’i e le ua molia le fale ae o le taimi lea o lo’o  malaga i fafo le tama o le aiga, sei vagana ai lona to’alua sa fa’amuli i le fale.

Na taua e le tina e ana le fale i leoleo e fa’apea, na fa’ateia o ia ao moe i le vaveao o le aso 18 Me 2014 pe tusa o le itula e 5:00 ina ua ia maitauina se tagata sa ulufale fa’amalosi i totonu o lona fale i le po.

O meatotino sa i totonu o le fale na maitauina e le tina ua aveese e aofia ai tupe sa i luma o le potu malolo o le fale ua aveese, o le fagu sa i ai tupe siliva e $40 ua aveese, o ipu keke sa i luga o le laulau ua ‘ai e le tagata, faapea ai ma pea seevae sa i totonu o le potu a lona to’alua ua aveese.

Ao taumafai leoleo e saili ni mau faamaonia e fesootai ma se tagata na ulufale i totonu o le fale na a’afia, ae maua mai loa se telefoni mai se fafine e tuaoi ma le fale na a’afia, lea sa ia fa’amatala i leoleo lona vaaia o le ua molia o oso mai totonu o le fale na aafia i le vaveao e pei ona taua.

Na taua e le molimau lona vaavia o Sausao ma se pea seevae o lo o uu mai i lona lima, atoa ai ma taga o lona ofu o lo o fai o lo o tumu i tupe siliva.

E tusa ai ma fa’amaumauga a le fa’amasinoga, e nonofo fa’atasi le molimau ma le ua molia i le fale e tasi, ma, i se taimi o le taeao lava lea, na fai ai loa le ua molia i le molimau, e aua ne’i ona ta’uina i se tagata, o ia lea sa alu i totonu o le fale na a’afia ma gaoi mai ai ni mea totino mai totonu.

Ina ua maua e le molimau le pea se’evae i totonu o le latou fale, sa ia toe fa’afo’i i se tagata o le aiga e ana le fale na a’afia, ma fa’amaonia mai ai e lea tagata o se’evae tonu lava ia sa i totonu o le fale a lona uncle na gaoi e le tagata.

Ina ua fesiligia e leoleo le ua molia e tusa ai o lenei mataupu, sa ia ta’utino ai e fa’apea, i le po o le aso 17 Me, 2014, sa inu pia ai, ae ina ua toe fo’i atu i lona aiga, sa muamua ulufale fa’amalosi i totonu o le fale na a’afia e aunoa ma se fa’atanaga, ma ia gaoi mai ai se pea se’evae ma ni tupe siliva.

Na fa’amaonia e le ua molia i leoleo lona fa’aaogaina o tupe siliva sa ia gaoi mai totonu o le fale mo ia lava.

E $10,000 lea ua fa’atulaga e le fa’amasinoga e totogi, ona fa’atoa mafai lea ona tatala le ua molia i tua e fa’atali ai taualumaga o lana mataupu lea ua fa’agasolo i luma o le fa’amasinoga maulauga i le taimi nei.

Afai ae mafai ona tatala o ia i tua mai le toese, ua fa’asa ona toe taumafai e ulufale fa’amalosi pe toe latalata foi i le fale na tula’i mai ai le solitulafono ua molia ai o ia.