I le fonotaga a le Falelima i Sisifo na usuia i le potu fono o le Ofisa o Mataupu Tau Samoa ananafi, na fautuaina ai e le afioga i le Alo o Salamasina ia Satele Galu Satele fa’auluuluga o afioaga ta’itasi sa auai atu i lea fono, ua tatau ona toe fa’amalosia atili tulafono a nu’u ta’itasi, ina ia mafai ai ona malu puipuia fa’afitauli ma mea o lo o tutupu mai i totonu o nu’u ma le atunu’u.

O le fonotaga sa faia ananafi, na afua mai lea i se talosaga mai le afioga i le ali’i kovana ia Lolo Matalasi Moliga i se fonotaga faapitoa a le Kapeneta i le vaiaso na te’a nei, lea na ia talosagaina ai le tatau lea ona fono Falelima i Sasa’a ma Sisifo, i le sailia o ni auala e foia ai fa’alavelave ua tutupu mai i le atunu’u, e pei o le fa’alavelave lea na manu’a ai se ali’i leoleo i se pulufana i Lepuapua i le fa’aiuga o le tausaga na te’a nei.

Saunoa Satele e fa’apea, o se tasi o mea ua masani ai Samoa, fa’atoa gaioi lava e saili le fofo o se fa’afitauli i le taimi e mae’a ai ona tupu se fa’alavelave.

“E le tatau lava ona tatou fa’amasani pea i lea ituaiga amioga, o le pisi mulimuli ina ua tula’i mai se fa’alavelave*, o le saunoaga lea i sui o le Falelima sa auai atu i le fonotaga.

“E lelei lava e tula’i mai o se fa’alavelave matuia i le afioaga ma le itumalo, ae ua mautu ma malosi tulafono e puipuia ai soifua o tagata, o le mafua’aga lena e taua ai le toe fa’amalosia o tulafono a nu’u ta’itasi, ina ia malupuipuia ai tagata uma o le atun’u”, o le isi lea saunoaga a Satele.

Na taua e se tasi sui usufono sa i ai e fa’apea, afai e finagalo Satele ma lona Ofisa e toe fa’amalosia tulafono a nu’u taitasi, e tatau la ona fai ni a latou asiasiga pe ta’i masina ina ia mautinoa o lo o lelei ma maopoopo afioaga taitasi i totonu o le Falelima, ae na fa’auilavea le Kovana o le Falelima i Sisifo ia Lualemaga E. Faoa ma saunoa e fa’apea, e le o se tiute lena o Satele ma lona ofisa o le fa’aleleia o nu’u, o le tiute lena a ali’i ma faipule o afioaga ta’itasi.

Saunoa Satele e fa’apea, o se tasi o itu ua maitauina i le taimi nei, ua amata ona mou ese atu le mamalu o pulega a ali’i ma faipule i nu’u ta’itasi, ma, o iina la lea ua mafai ai ona ofi mai fa’alavelave matuia ua aafia ai le atunu’u, ina ua lape le pito laau a matai.

Mo se fa’ata’ita’iga e pei ona saunoa Satele, o aso ua mavae sa tasi le leo e usita’i ma fa’alogo uma i ai le nu’u e oo i tupulaga ma taulele’a, e na o le leo lava o matai, e faapena fo’i i matua ma fanau, sa tasi lava le fa’atonuga ma usita’i.

“Ae o suiga ua maitauina i le taimi nei, ua fiu lava matai e fa’atonu atu i tupulaga ma taulele’a ae ua le fa’alogo ma usita’i, ua solomusa fo’i isi matai ona tete’e mai i fa’aiuga a le nu’u, e o o lava i fanau ua le fa’alogo i matua, ma ua tauau ina mou ese atu le mamalu sa i ai le aganu’u a Samoa i tausaga e tele ua mavae”, o le saunoaga lea a Satele, ma ia talosagaina ai le pulega a ali’i ma faipule ina ia toe fa’amalosia tulafono i totonu o nu’u.

Na lagolagoina e ni isi o matai mai le Falelima i Sisifo lo latou lagolagoina o le finagalo o Satele, e tatau ona toe silasila toto’a pulega a ali’i ma faipule a nu’u taitasi i auala e toe fa’amalosia atili ai a latou tulafono, ina ia taofia ai le tutupu so’o mai o fa’alavelave e pei ona maitauina i le taimi nei.

Na taua e se tasi o matai e fa’apea, “o le taimi lava e aofia ai matai i uiga mataga ma faiga faasolitulafono o lo o tutupu i totonu o nu’u ma le atunu’u, ona faigata fo’i lea ona fa’amalosia tulafono a ali’i ma faipule o nu’u taitasi”.