TETE’E APRIL PERIC I TU’UAIGA A LE MALO

O le masina fou o Fepuari lea ua fa’atulaga e faia ai le ulua’i iloiloga a April Peric i luma o le fa’amasinoga maualuga, i le mae’a ai lea o lona tula’i ma teena moliaga mamafa e lua o lo o tu’uaia ai o ia e le malo, e mafua mai i le fa’alavelave lea na maua ai fualaau fa’asaina i totonu o le ta’avale sa la malaga ai ma se isi alii, i le aso 27 Tesema 2014.

A o le i tofu atu le mataupu a Peric i luma o le fa’amasinoga maualuga, sa fa’ataunu’uina sana iloiloga fa’apitoa i luma o le fa’amasinoga fa’aitumalo, e iloilo ai e le fa’amasinoga pe lava mau a le malo e lagolagoina ai moliaga mamafa ua tu’uaia ai o ia.

E ova ma le 20 minute le umi o lea iloiloga, lea na molimau ai le ali’i leoleo kapeteni ia Cpt. Muagututia John Cendrowski mo le itu a le malo, pau fo’i lea o le molimau sa valaauina mo lea iloiloga.

Na taua e Muagututia i lana molimau e fa’apea, o vaega o le pauta sa maua i totonu o straw na maua ia Peric, sa ia faia i ai suesuega ma fa’amaonia ai, o vaega ia o le pauta fa’asaina o le aisa.

Sa ia taua fo’i e fa’apea, e le gata i vaega o aisa na maua e leoleo ia Peric, ae sa maua ai fo’i mea e fa’aaoga e tagata o lo o latou tuleiina atu le aisa i isi tagata e pei o straws e tipi tulimanu, o paipa e ula ai le aisa faapea ai ma se afi.

O lo o tuuaia Peric e le malo i moliaga mamafa e lua o lona umia faasolitulafono o vaega o le fualaau faasaina o le aisa, atoa ai ma lona umia faasolitualfono o le aisa ma le fa’amoemoe e tulei pe fa’atau atu i isi tagata.

Na finau le loia a Peric i luma o le ali’i fa’amasino ia Elevis P. Patea e fa’apea, o vaega o fualaau faasaina sa maua ia Peric, o vaega e mafai ona fa’aigoaina, o fualaau e fa’aaoga mo ia lava, ae le o ni fualaau sa ia fa’amoemoe e tulei pe fa’atau atu i isi tagata.

Sa finau fo’i le ali’i loia ia Doug Fiaui i le le sa’o o le mafua’aga na taofia ai fua Peric e leoleo, ae le o ia na aveina le ta’avale, e leai fo’i se mafua’aga na taofia ai fua o ia e leoleo.

Saunoa Patea e fa’apea, o mafua’aga uma e pei ona finau i ai Fiaui, e mafai ona tu’uina atu i luma o le vaega iloilo iuga latou te filifili i ai i le taimi e faia ai sa latou fa’aiuga i lenei mataupu i luma o le faamasinoga maualuga.

O lo o taofia pea Peric i le toese i Tafuna e fa’atali ai le isi ana iloiloga lea ua fa’atulaga mo le masina fou.

SOLOFUA MOLIAGA FA’ASAGA IA JERMAINE MAYBIR

O le ali’i e 23 tausaga le matua lea na tu’uaia e le malo i lona faia o uiga fa’afeusuaiga i se teineititi e 13 tausaga le matua na sola ese mai i lona aiga, ua solofua nei e le fa’amasinoga maualuga moliaga mamafa na ulua’i tu’uaia ai o ia e le malo.

Na taua e le itu a le malo i le aso Faraile na te’a nei i luma o le fa’amasinoga e fa’apea, talu ai o lea ua sauni le malo e sainia sa latou maliliega ma le ua molia, e pei ona malie ai le ua molia e tali ioe i le moliaga mama o lona faia lea o ni gaioiga e ono a’afia ai le saogalemu o fanau laiti, ua manatu ai loa le malo e solofua moliaga mamafa sa latou ulua’i faila fa’asaga ia Maybir.

O le masina o Aperila 2014 na tula’i mai ai lenei fa’alavelave, ina ua sola ese le tamaitai na aafia mai lona aiga, ae o ma momoe ma le ua molia i lona fale, ma tula’i mai ai loa gaioiga fa’afeusuaiga e pei ona ulua’i molia ai o ia i le tulafono.

O lo o taofia pea le ua molia i le toese i Tafuna e fa’atali ai le aso lea ua fa’atulaga e toe fofogaina ai lana mataupu o lo o totoe i luma o le fa’amasinoga fa’aitumalo, ma fa’amautu ai loa le maliliega ua latou sainia ma le malo.

IOE SOPI SENIO I LE MOLIAGA O LE FA’ALEAGA MEATOTINO

O le aso 19 Fepuari lea ua fa’atulaga e lau ai le fa’asalaga a le ali’i o Sopi Senio i luma o le fa’amasinoga maualuga, ina ua ta’usala o ia i le vaiaso na te’a nei i le moliaga mamafa o le fa’aleaga meatotino i le tulaga muamua.

I le tali ioe ai o le ua molia i le moliaga lea ua ta’usala ai o ia, sa ia ioeina ai i luma o le fa’amasinoga lona fa’aleagaina o meatotino a le aiga sa a’afia i lenei mataupu.

O lo o taofia pea Senio i le toese i Tafune e fa’atali ai le aso lea ua fa’atulaga e lau ai lana fa’asalaga.