O lo o taofia pea i le toese i Tafuna se tagata faigaluega a le Matagaluega o Aoga a le malo, ona o tu’uaiga i lona gaoia lea o se siaki a se faiaoga mai le aoga le Lupelele Elementary ae alu ma tala i se faleoloa i Tafuna.

O le tina ia Selapi Tuiteleleapaga, lea sa galue o se failautusi mo le aoga a Lupelele, ua tu’uaia nei e le malo i moliaga mamafa e lua o le gaoi atoa ai ma lona ave fa’agaoi o se vaega tupe sa tu’uina atu i lalo o lana va’ava’aiga, ma fa’atulaga ai loa le tupe e $15,000 e totogi, ona fa’atoa mafai lea ona tatala o ia i tua mai le toese.

O le mataupu lenei na tofu atu i le Ofisa o le Loia Sili a le malo, ina ua fa’afeso’ota’i e le Fa’atonusili o aoga le ofisa o le loia sili mo se fesoasoani e tusa ai o lenei mataupu, ma tofia ai loa le ali’i su’esu’e ia Faauaa K. Elisara na te su’esu’eina lenei mataupu.

E tusa ai ma fa’amaumauga a le fa’amasinoga o lo o taua ai e fa’apea, o le siaki lea ua tu’uaia Tuiteleleapaga na ia gaoia, sa tu’uina atu i se tasi o faiaoga a Lupelele i le aofa’i e $1,131.97 i le aso 22 Setema 2014.

O Tuiteleleapaga ma le sui puleaoga a le aoga a Lupelele na o e piki mai siaki a le latou aoga, mai le ofisa autu o Aoga i Utulei e pei ona taua i fa’amaumauga a le fa’amasinoga.

Ina ua sauni le sui puleaoga ma le ua molia la te tuua le ofisa autu o aoga ae toe fo’i atu i Lupelele, na fa’atonu ai loa e le sui puleaoga ia Tuiteleleapaga e tago e piki mai siaki a faiaoga o lo o i totonu o se ‘folder’, ae ina ua toe fo’i le sui puleaoga i le ofisa autu o Aoga, sa ia iloa ai ua leai le siaki a le faiaoga i totonu o le ‘folder’ sa tu’u fa’atasi ai ma isi uma siaki a tagata faigaluega a Lupelele.

Ina ua atoa le vaiaso e le i maua lava le siaki na leiloa, na toe talosagaina ai loa e le Ofisa o Aoga le Ofisa o Tupe a le malo, ina ia toe saini mai se isi siaki fou e sui ai le siaki ua leiloa, ma tu’uina atu ai loa le poloaiga e taofi ai le talaina i tua o le siaki na leiloa, numera #1891450, peita’i o le taimi lea ua mae’a ai ona tala e le ua molia le siaki i se faleoloa i Tafuna, e pei ona taua i fa’amaumauga a le fa’amasinoga.

I fa’amaumauga a le malo o lo o taua ai e fa’apea, o le siaki na leiloa na tala e le ua molia i le fale oloa i Tafuna i lalo o lona igoa, i le aso 22 Setema 2014, o le aso lava fo’i lea o lo o tu’uaia na ia gaoia ese mai ai le siaki mai le ofisa o aoga i Utulei.

I le aso 10 Oketopa 2014, na tusia ai e Tuiteleleapaga se tusi fa’atoese ma tu’uina atu i le Fa’atonusili o Aoga ia Vaitinasa Dr. Salu Hinkin-Finau, ma ia ta’utino i ai o ia na gaoia le siaki, lea na alu ma tala i se faleoloa i Tafuna i lalo o lona igoa.

Ae ina ua fesiligia le ua molia i le aso 12 Novema 2014 e tusa ai o lenei mataupu, sa ia ta’utino ai o ia na gaoia le siaki na leiloa, lea na ia gaoia ese mai i le taimi na tufatufa ai siaki a le aufaigaluega a le aoga a Lupelele.

Na ta’utino fo’i Tuiteleleapaga i lona sainia o lona igoa i luga o le siaki, ae tala i le faleoloa, ma fai ai le fa’atau mo meaai a lona tausoga na toe fo’i atu i Niu Sila i le taimi lea i le aofa’iga e $200.

O le isi $400 sa ia tu’u i le lima a lona tausoga e alu ma ia, ae o le tupe na totoe ai sa ia fa’aaoga mo ia lava.