TOE FO’I LE ALI’I AMIO VALEA PE A MAGALO

O le ali’i mai Samoa lea na ia faia uiga mataga i se teineititi e 13 tausaga le matua, ua poloaina e le fa’amasinoga maualuga o ia ina ia ona tuua le teritori ae toe fo’i atu i lona atunu’u na sau ai, pe afai ae mae’a ona tuli lana fa’asalaga fa’a falepuipui e 20 masina le umi, o se tasi lea o tu’utu’uga o lana nofova’ava’aia e 5 tausaga, ina ua ta’usala o ia e le fa’amasinoga i le moliaga mamafa o lona tagofia lea o itutinosa o se teineitiiti e le i fa’aipoipo i ai.

O isi tuutuuga o le nofovaavaaia a le alii o Lokeni Tausilinu’ue aofia ai le faia o se suega i lona tino ina ia fa’amaonia ai, na te le o tauaveina siama o le fa’ama’i o le HIV, e pei ona mana’omia e le tulafono.

Na fa’atoese le ua molia i le fa’amasinoga e tusa ai o lana solitulafono sa fai, ma ia talosagaina ai se isi avanoa se’i fo’i atu ai i lona aiga e mafuta ma ona matua, ma tautua lona nu’u ma lana ekalesia.

Na taua e le ali’i loia sa tula’i mo Tausilinu’u ia Michael White i luma o le fa’amasinoga e fa’apea, o taimi uma lava la te talanoa ai ma le ua molia ao lumana’i ai le lauina o lana fa’asalaga, sa ia fa’ailoa atu ia te ia lona matua salamo e tusa ai o lana solitulafono sa faia.

E ui i le matuia o le gaioiga sa fa’atino e le ua molia, peita’i na talosaga lana loia i le fa’amasinoga, e fa’asala o ia i se fa’asalaga nofova’ava’aia, ina ia maua ai le avanoa e fa’atasi atu ai o ia i ni aoaoga e fesoasoani ai i le fa’afitauli o le ‘ava malosi o lo o a’afia ai lona olaga.

Na finau le loia a le malo ia Russel Smith i le fa’amasinoga ina ia fa’asala Lokeni i le falepuipui, ona e matuia le gaioiga sa ia faia.

Na taua e Smith e fa’apea, o le gaioiga sa faia e le ua molia ua suia ai le olaga o le tama’ita’i na a’afia, e ui o lo o talavou lava lona olaga.

Na taua e le afioga i le ali’i fa’amasino ia John L. Ward II e faapea, ina ia mautinoa e le mafai ona toe maua e le ua molia se isi avanoa e toe feso’ota’i ai i le tama’ita’i na a’afia, o le a fa’asala ai o ia i le falepuipui, a magalo mai tua i le toese, ona ia tuua lea o le teritori ae toe fo’i atu i le atunu’u na malaga mai ai, e le fa’atagaina ona ia toe ulufale mai i le teritori mo le umi e 5 tausaga o lana nofovaavaaia.

Ua poloaina fo’i e Ward le tuuina atu o se kopi o le fa’aiuga a le fa’amasinoga i le Pulesili o le Ofisa o Femalagaaiga atoa ai ma le ta’ita’ifono o le Komiti Fa’afoe, ina ia latou silafia ai le fa’aiuga ua faia fa’asaga ia Tausilinu’u.

SAMEL WRIGHT

O le aso 8 Fepuari 2015 lea ua fa’atulaga e le fa’amasinoga e fa’ataunu’u ai le iloiloga a Samuel Wright ma le malo, mo le fa’alauiloaina lea e le itu a le malo o fa’amatalaga e lagolago ai tu’uaiga fa’asaga ia Wright.

O le ali’i loia fautua ia Michael White na fa’auluina lea talosaga, lea fo’i na talia e le fa’amasinoga i le aso Faraile na te’a nei, ina ua leai se fa’atuiese a le malo fa’asaga i le talosaga.

O Wright o lo o tu’uaia fa’atasi ma ni isi ali’i se to’atolu i le fa’alavelave lea na latou osofaia ai le faleoloa o le Gold Gonda Store i Fagaalu i le masina o Me 2014, ae fao fa’amalosi se vaega tupe sa i totonu o se tama’i atigi pusa sa i le vaega na i ai le faatauoloa, i le mae’a lea ona ia fa’alala o se fana i le fa’atauoloa, e pei ona taua i fa’amaumauga a le fa’amasinoga.

Na taua e White e fa’apea, o le taua o fa’amatalaga o le a fa’alauiloa e le malo i lea iloiloga, o le a fesoasoani ai i le finauina o le le nofosala o Wright i tusa ai o lenei mataupu.

O lo o taofia pea Wright i le toese i Tafuna ina ua le mafai ona ia totogi le $100,000 ua uma ona fa’atulaga e tatala ai o ia i tua.

SO’OSEMEA TINAE

O le aso 30 Ianuari lea ua fa’atulaga e toe tula’i ai le sa avea ma pulenu’u o le afioaga o Fagatogo i luma o le fa’amasinoga maualuga, ina ua talia e le fa’amasinoga maualuga le talosaga na fa’aulu e lana loia fautua Matailupevao Leupolu Jr i le vaiaso na te’a nei, e toe tolopo le mataupu a le ua molia mo le lua vaiaso.

Na taua e le loia a le malo ia Jessica Bargman, ua mae’a ona latou tu’uina atu fa’amaumauga maumau tutu e lagolago ai tu’uaiga fa’asaga ia Tinae i lana loia atoa ai ma se ofa, ma ua fa’amoemoe e tatau ona o o atu i le isi iloiloga o lo o soso’o nei, ua malie le ua molia i le ofa ua tu’uina atu ia te ia, ma sauni loa e tu’uina atu lana tali ioe i luma o le fa’amasinoga.

O lo o taofia pea Tinae i le toese i Tafuna i le taimi nei, e fa’atali ai le isi ana iloiloga lea ua fa’atulaga mo le fa’aiuga o le masina nei.