O le aso Faraile o le vaiaso na te’a nei na tu’uina atu ai e le Komesina le tumau o le Matagaluega o Leoleo ia Save Liuato Tuitele sana tusi i le Ofisa Su’esu’e a le Feterale i Hawaii, le FBI, e talosagaina ai sa latou fesoasoani e tusa ai o le mataupu tuga se lua o lo o galulue le Ofisa o Leoleo a le atunu’u e su’esu’e i le taimi nei.

Na fa’amaonia e Save i luma o le Komiti o le Puipuiga o le Saogalemu Lautele a le Senate ananafi e fa’apea, e ui o lea ua ia talosagaina le fesoasoani a le FBI, peita’i e le o taofia ai le fa’aauau pea o su’esu’ega a le Matagaluega o Leoleo a le malo, i le tau tu’u fa’atasia lea o fa’amatalaga uma o lo o maua mai i le atunu’u, e fesoasoani ai i le tau foiaina o lenei mataupu.

O ia fa’amatalaga sa mafai ona fa’alauiloa i se iloiloga sa faia i luma o le maota maualuga ananafi, ina ua talosagaina e le Senate sa latou feiloaiga ma le Matagaluega o Leoleo, e tusa ai o se tulaga ua o o i ai suesuega i le mataupu lea na manu’a ai se ali’i leoleo i se pulufana i le faaiuga o le tausaga na te’a nei, atoa ai ma le isi mataupu lea fo’i na tafana ai le ofisa o leoleo i Leone i le masina o Novema 2014, lea lava e o o mai i le taimi nei e le i maua lava se tagata po o ni tagata sa latou fa’atinoina lea solitulafono.

O le agaga o le maota maualuga na mafua ai ona valaau le iloiloga, se’i fofola mai e le matagaluega o Leoleo sa latou fuafuaga ua i ai e tusa ai o nei mataupu matuia ua a’afia ai soifua ma le saogalemu o leoleo.

Na fa’amanino e Save i luma o le komiti e fa’apea, i le tuana’i ai o le lua vaiaso talu ona ia nofoia le nofoa o le Komesina, o lo o latou galulue soosoo tauau pea lava ma Leoleo i le taimi nei, ina ia mautinoa e i ai sona iloa i su’esu’ega ma mataupu o lo o tula’i mai.

“O le la’asaga muamua na ou faia talu ona ou nofoia le nofoa, o le tofia lea o se Vaega Su’esu’e Fa’apitoa (Task Force Team) e leoleo, e gafa ma le tu’u faatasia o faamatalaga uma atoa ai ma le su’esu’eina o tulaga uma e uiga i mataupu nei e lua”, o le saunoaga lea a Save.

O le Task Force e pei ona saunoa le ali’i komesina tofia, e to’aono leoleo o lo o i ai e aofia ai ma le latou ta’ita’i.

Sa ia taua fo’i lona nofo fa’atali pea i se tali mai le vaega a le FBI, e tusa ai o lana talosaga ua mae’a ona tu’uina atu i ai e tusa ai o le fa’alavelave e pei ona galulue i ai le matagaluega o leoleo.

Na taua e Save le to’atele o tagata o lo o mafai ona talanoa i ai leoleo talu ona amata mai a latou su’esu’ega, o i latou fo’i ia o lo o fa’asoa maia fa’amatalaga eseese e fesoasoani ai i su’esu’ega o lo o fa’agasolo i le taimi nei.

Sa ia taua fo’i lona talosagaina o le ali’i kovana ia Lolo Matalasi Moliga, mo se vaega tupe e fesoasoani ai i su’esu’ega a leoleo o lo o fa’agasolo i le taimi nei, o lo o taumafai malosi pea e tu’u fa’atasi fa’amatalaga eseese o lo o maua mai i le atunu’u, ona o ni isi o tagata o lo o lagona lava le fefe e fa’asoa mai fa’amatalaga o lo o latou iloa e tusa ai o lenei fa’alavelave.

Na fa’afetaia e le afioga i le ali’i senatoa ia Galea’i M. Tu’ufuli le fa’aiuga ua faia e Save, e tofia ai se vaega faapitoa o leoleo e gafa ma le suesueina o lenei mataupu, peita’i o lona fa’anoanoaga o lo o i ai, ua fai si tuai o le tali atu a leoleo i le su’esu’eina o le mataupu lenei.

Saunoa fo’i Galea’i, o mea ia ua tutupu mai e le o ni mea fou, o mea ua leva ona tutupu, o i latou fo’i o lo o a’afia ai, o le tupulaga fou lea mai le vaega matutua ua leva ona faia lenei solitulafono, ona o mea nei o lo o ola ma saili ai a latou tupe, o fualaau faasaina.

Na fa’ai’u fautuaga a le komiti i lo latou talosagaina lea o Save ma le Fa’atonusili o le Matgaluega o le Puipuiga o le Saogalemu Lotoifale ia Utuali’i Iuniasolua Savusa, ina ia fa’aauau pea ona galulue ma Save i le suesueina o lenei mataupu.