Vaega: 143

Fa’atalofa atu i lou alafa’i mai i le manuia i lenei taeao fou, i le alofa ma le agalelei o lo tatou Matai oi le lagi, e ao ai ona o tatou fa’apea ifo, “Le Ali’i e, ia E alofagia lo matou vaivai ma lo matou fa’atauva’a, aua o matou lava o ni tagata e le aoga, ae matou te fa’atuatua pea ma talitonu, o lo’o soifua pea Oe le Tama alofa, ia E mafuta mai ma i matou i lenei aso, ina ia i’u manuia a matou fuafuaga uma, a’o le vi’iga matou te fa’afo’i atu i Lau Afio e fa’avavau, fa’avavau lava, amene.”

Na muta mai la tatou tala, ina ua talatalanoa ma fetufa’ai Vaitimaleata  ma lo’omatua, o ta’ito’alua ia o tuagane o lona tina. Ua to’a le tai, ma ua le toe i ai se mea e ga se i totonu o le aiga. O le mea ua tupu e le i iloa e le lo’omatua o Salamasina se mea e tasi, e o’o fo’i i le Sa’o o le aiga, e le i iloa se mea lava e tasi o tupu. Na magoto ifo ai lava i le ‘ele’ele e le i toe aliali a’e se tala.

E moni lava le upu, e aoga mea e tutupu e a’oaiga ai le mafaufau o le tagata, e aoga fo’i mea e tutupu e lagona ai e le isi tagata ia mea tiga o lo’o ia faia i le isi tagata. O totonu lava o aiga, e amata mai ai fa’afitauli, ae o le mea e sili ona taua, ia fo’ia vave ae e le i sosolo ma a’afia uma ai le aiga atoa. O le tulaga lea na tu malosi ai le tama’ita’i o Vaitimaleata ua pei o se foma’i o fa’afitauli, ae le o se loia. Ae sa lagona lava le fiafia o le loto o Vaitimaleata, aua ua ia va’aia nei le tulaga lelei ua i ai si ona aiga. O lo’omatutua fo’i sa le i masani ona o ane e asi si ona tina, o lea ua amata ona fa’atino.

O aso uma fo’i e alu atu ai Vaitimaleata i lona aiga, o lo’o potopoto mai lava lo’omatutua ma si ona tina, o se va’aiga fa’afiafia loto, ae o le taimi lea, o lo’o pisi mai i tua Losalia ma Susana i le faiga o meataumafa a lo’omatutua. Ua va’aia ataata o ta’uleleia, ua va’ai fo’i foliga alofa o le Atua e ala i ana auala ‘ese’ese e maua ai le nonofo fealofani o aiga.

Fai mai, ua matua’i sui lava uiga o le lo’omatua o Su’e, mai i tausaga e tele sa mafuta ai ma le aiga o Sila, o lea fa’atoa va’aia suiga lelei o le lo’omatua. Manatua fo’i, o Paulo e ulumatua o le fanau, ona soso’o ai lea ma Sila, o lona uiga e tatau i a Su’e ona tumalosi e fai mea lelei mo le aiga, aua ua maliu le lo’omatua o Eseta fa’apea ma si toeaina o Paulo.

Ua va’aia e Vaitimaleata suiga lelei ua taoto ai nei si ona aiga, ae maise fo’i o le malosi ua i ai nei si ona tina o Salamasina. E moni lava le upu, o le ola fiafia o le tagata, e vave lava ona ave’ese ai ma’i o le tino. Fai mai le tala, na fa’ate’ia le aiga i le isi afiafi, ua o ane uma nei i le fale o lo’o i ai Petelo ma lona to’alua o Losalia, ua fai ai le latou fa’atasitasiga. Ua to mai nei kitala ma ukulele sa sili lelei i luga o le fale, ma ua amata ai nei le fa’ili.

O le kitala a si toeaina o Paulo sa teu lelei e Petelo, o lea ua fa’aaoga  nei, ina ua tago Petelo i le kitala, na tu mai i ona luma foliga o si ona tama, ae maise o si ona tina. Fai mai, na iloa uma lava e uso o Paulo le mea ua tupu i a Petelo, na a’apa ane nei Falaniko ua fusi atu si ona tei, ma po po lona ulu. Ua ‘ata Petelo ma tilotilo ane i uso o lona  tama, ua matutua lava, na toe tilotilo ane nei i le tuafafine e to’atasi o si ona tama, le lo’omatua o Salamasina, na  savali ane nei ma nofo i talane o le lo’omatua.

Ua amata le fa’ili, ae ua amata fo’i ona pisi  mai i tua Losalia ma Susana i le faiga o le suaalaisa ma le ti falaoa e salani ai le au fai pese lea ua amata nei. Fai mai o le tatagi a le meatuligi a le toeaina o Sila, e matua’i  selau pasene. Ua fuli fo’i Eteuati latou e salu le ukulele, o le si kitala o lo’o ta ai nei le toeaina o Falaniko. Ua pei o se koneseti lea ua ta nei i totonu o le fale o le aiga. Ua tumutumu ane nei tagata o le nu’u e fa’alogologo, ae o le taimi lea, o lo’o fa’asolosolo lava mafaufauga o le lo’omatua o Salamasina i si ona tuagane o Paulo, fa’apea ma le lo’omatua o Eseta.

Na fa’ate’ia le fa’afiafiaga le totogia lea, ina ua va’ai mai, o alu atu le ta’avale a le tama’ita’i o Vaitimaleata, ua tu tonu nei i luma o le fale. Na fai si umi o fa’atalitali mai, ae o lo’o alu pea le fa’ili e le i taofia. Na iloa mamao mai lava e Sila le oso i fafo o le tagata i le isi itu, ma le va’ai mai o le tama lea ua o atu ma Vaitimaleata.

E faia pea…