[E toe fa’atalofa atu i uo ma paaga masani a le tatou polokalame i le amataga o lenei vaiaso, malo le onosa’i i faiva ma tiute, ae alo ma loa, o le toe soso’oina lenei o le tatou polokalame fa’asolo o le Olaga Pologa, lea na gata mai i le vaiaso na te’a nei i le taimi lea ua toe to manatu ai le tamaititi o Lami i fa’atonuga masani a le fafine o Sei e fai atu soo lava ia te ia.]

E fai lava tala a le fafine o Tara ma faliu, ona la toe savavali lea ma Lami e aga’i atu i le latou fanua fai popo lea e le mamao ese atu ma le vaega sa la talanoa ai, ona ia fa’asino loa o le fa’aputuga popo o lo o i ai ia Lami e fai mai ai sana avega. E na o le 16 popo ma pulu na mafai e Lami, peita’i na fa’atonu o ia e Tara e sili pe a o’a ese pulu e faigofie ai ona ave, e lelei fo’i lena e tele ai popo e mafai ona alu ma ia. E tu lava le fafine o Tara ma fa’asino lona lima i faaputuga popo e fai ai le avega a lenei alualutoto, ae o lona loto i le taimi lea, ua momomo lava i le alofa, pei uma lava ua toe vaai atu isi ana fanau laiti o lo o aooga i le aoga tulaga lua a le nu’u. Na ona uma lava ona fa’atulaga o le avega a Lami, ona valaau loa lea i le fafine la te toe fo’i lea i tai i le aai.

O Tara, o le fafine mai le atu Asau ae nofotane i le tamaloa mai Amouta, le nu’u lea fo’i ua nofo ai le tamaititi o matua oti o Lami. E taufa’afia uiga o Tara i totonu o le nu’u atoa, e le gata e loto alofa ae o se fafine fo’i e agamalu ma amio fa’aaloalo. Sa galue o se faiaoga i le aoga tulaga lua a le nu’u, ae ina ua lavea si ona to’alua i se fana i’a ma mumutu uma ai ona vae, na fa’amavae ai loa Tara mai lana galuega ae nofo i le fale tausi si ona to’alua. O lana galuega e masani ona fai i le la atina’e e aofia ai le momoe ma lona uso laititi lea fo’i e nonofo ma le isi tama o le nu’u i uta i le talaloa i fa’aiuga o vaiaso, e tapena mai ai le la uta e la’u i le maketi i Salelologa e fa’atau ai e maua ai se tupe mo ia ma si ana fanau, e faapena fo’i isi ona uso ma si ona ia aiga. E fetaui la le usupo ane o Tara ma lona uso laititi o le a fo’i i tai i le aai i le vaveao o le aso Faraile lea, ae latou fetaui ai ma le tamaititi o Lami lea ua lotulotu atu e fai mai ni popo a ana pua’a.

“Lami, a i ai lava se mea e ke maga’o ai, alu aku i le faleoloa o Apelu o lo o i luma o le aai, e soso’o lava ma le matou fale, ona faitalia lea o a’u ma fai soo se mea ete mana’o i ai, ua e fa’alogo mai”, o le tala lea a Tara i le tamaititi o Lami ina ua afe le fafine ma lona uso i le auala e alu i le latou fale, ae fa’aauau pea le savaliga a le tamaititi ma lana amoga. Na avea o se vaaiga faamomoi loto i taulele’a o le nu’u sa latou fetaui ma lenei tamaititi laititi le vaaiga na latou iloa, ina ua tete’i e lei taitai le taeao ao lea ua fo’i atu le faiga popo a Lami. “Makua vave lau faiga popo ali’i Lami, o le fagua o ai lega sa e gaoi mai ai”, o le tali lea a le fafine o Sei ina ua ia vaaia le tamaititi ma lana amoga popo, e aunoa ma sona fa’afetai o le galuega lelei sa ia faia.