Ua fesiligia e le Fa’atonusili o Aoga a le malo le gaioiga ua faia e ni isi o faipule o le maota o sui, i lo latou fesiligia lea o suiga ua faia i le isi lala o le Ofisa o Aoga o le SPED, atoa ai fo’i ma lo latou savalia o le ali’i kovana ina ia taofia suiga ua faia e le Matagaluega i le vaega a le SPED.

E le gata na taua e Vaitinasa Dr. Salu Hunkin-Finau i sana imeli sa tu’uina mai i le Samoa News lona fa’anoanoa i le gaioiga ua faia e ali’i faipule nei, ae sa ia taua fo’i le mafua’aga ua latou toe fesiligia ai le mataupu i le taimi nei, ae ua 6 masina talu ona taoto le ripoti i le Ofisa o le kovana e fa’atatau i suiga nei talu mai le masina o Iulai 2014, mo le fa’aleleia o le tautua a le Ofisa e puipuia aia o fanau aoga e i ai manaoga fa’apitoa o le tino.

Na fa’aigoa e Vaitinasa le auala na asia ai e faipule le afioga i le ali’i kovana ia Lolo Matalasi Moliga o le ‘solo tete’e’, ma le mafua’aga na ala ai ona latou asia le kovana, ‘o se mafua’aga e fa’aletagata’.

O faipule na taua e Vaitinasa sa latou asia le kovana e aofia ai Faimealelei Anthony Fu’e Allen, (tuagane o le tama’ita’i o lo o pule i le SPED o Jeanette Vasai Tilo); Vaetasi Tu’umolimoli Saena Moliga; Mulinuu V. Filo Maluia ma Talaimatai Elisara Su’a sa galulue muamua i le Ofisa o Aoga, ma isi faipule e to’alua e aofia ai Meauta Lauoi Mageo ma Vailoata Eteuati Amituana’i.

Saunoa Vaitinasa e fa’apea, e le sa’o le gaioiga sa faia e faipule o le tula’i ma o i le kovana ina ia puipuia ai Ta’ita’i o le SPED, i le mae’a ai lea ona sapaia e le Matagaluega e Pulea Tagata Faigaluega le fa’atonuga ua tu’uina atu i ai, ina ia o i tua i aoga ta’itasi e fesoasoani i aoaoga mo fanau e i ai manaoga fa’apitoa o le tino ma le mafaufau.

E le gata na taua e Vaitinasa mafua’aga na ala ai ona faia e ali’i faipule lenei gaioiga, ona o le isi faipule o lona tuafafine le Ta’ita’i o le SPED, ae o le isi faipule e uo lelei ma le Ta’ita’i o le SPED, ae ua atagia mai fo’i le leai o se latou taumafaiga ina ia fai se auala e puipuia ma fa’aleleia atili ai aoaoga mo nai fanau o lo o i ai manaoga fa’apitoa o le tino ma le afaufau.

O isi sui e to’afa e lagolago i le ta’ita’i o le SPED e aofia ai Fa’anati Penitusi, Tafevalu Aumoeualogo, Frances Allen Leau ma Theresa Atuatasi.

Na taua e Vaitinasa e fa’apea, mai le silia i le to’a 14,000 fanau aoga i le teritori, o le to’a 923 o i latou o fanau aoga e i ai manaoga fa’apitoa o le tino ma le mafaufau, ma, e toeitiiti lava maua le to’a 300 o faiaoga o lo o galulue i le a’oa’oina o nai fanau e i ai manaoga fa’apitoa o le tino ma le mafaufau, lea e amata mai lava i le vaega o Aoga Amata (ECE) seia o o atu lava i aoga maualuluga, i lalo o le paketi e silia i le $6 o lo o maua mai i le fetarale i tausaga ta’itasi e fa’atino ai a latou galuega fa’atino.

Na fa’amanino e Vaitinasa e fa’apea, e le o aofia le SPED i fuafuaga e toe fa’atulaga atoa le Ofisa o Aoga i le taimi nei, ae ua uma lava ona tu’umatamaga galuega a Ta’ita’i o le SPED i vaega e lima ua vaevae i ai a latou galuega, ina ia o i tua i aoga ma fesoasoani i le a’oa’oina o fanau aoga nei i totonu o potu aoga, “ae le o le salaau solo e pei ona i ai i le taimi nei”.

O suiga nei e pei ona saunoa Vaitinasa, sa fa’atalanoa mai i le 2 tausaga talu ona mae’a se iloiloga na afua mai i le ripoti sa tu’ufa’atasia, ae foliga mai e le o i ai lava se suiga lelei o aliali mai i galuega o lo o fa’atino e ta’ita’i o le SPED.