Ua fa’amautu mai e le Pule o le lala o le Faletupe a Hawai’i i Amerika Samoa ia EJ Tyley Ozu, e le vave tapunia le tautua a le latou faletupe mo Amerika Samoa, se’i vagana ua mautu gaioiga uma mo le fa’atuina lea o se isi faletupe fou e sui tulaga i le latou faletupe.

O lea saunoaga mai le susuga a Ozu, o ia fo’i lea o le sui peresetene o le Faletupe a Hawaii, na tu’uina atu lea i luma o le komiti o le Tamaoaiga a le maota o sui i se iloiloga sa faia i le aso Faraile ua te’a.

O le fa’ateia o le Fono i fa’amatalaga e faatatau i le vave fa’amuta lea o le tautua a le Faletupe a Hawaii i le masina o Iuni 2015, na mafua ai loa ona valaau lenei iloiloga.

Na fa’amanino e Ozu i luma o le komiti e fa’apea, e ui e le toe suia le fa’aiuga a le Faletupe a Hawaii, i le sauni lea e fa’amuta lana tautua mo le teritori, peita’i o le mea mautinoa, e le o mautinoa se aso tonu e fa’amuta aloaia ai lea auaunaga.

“Fa’atoa matou o ese lava pe afai ua matou talitonu atoatoa ua mautu fuafuaga uma mo se isi faletupe fou e fesoasoani i le tautuaina o le atunu’u”, o le saunoaga lea a Ozu.

O le susuga a Ozu, na amata mai lana tautua i Amerika Samoa i le 2006, ma ua ia silafia lelei manaoga o lo o fetaia’i ma le atunu’u faapea ai le malo, e pei ona ia fa’ailoa i luma o le komiti.

Na fa’amanino atili e Ozu i le komiti e fa’apea, o lo o fa’aauau pea a latou feutanaiga ma le malo i le tau fa’amautuina o fuafuaga uma, mo le amataina o le faletupe fou lea ua taumafai le malo e fa’amautu i se taimi o le tausaga nei, ina ia mautioa e leai se vaega e lape ai la latou auaunaga mo le tautuaina o le atunu’u.

Ua tusa nei ma le lua tausaga talu ona toe tolopo e le faletupe a Hawai’i le taimi latou te tuua ai Amerika Samoa, talu mai le ulua’i taimi sa latou manatu e tula’i ese ai, e pei ona fa’ailoa e Ozu i le komiti.

“Talu mai lea taimi umi, sa fa’aauau pea talanoaga ma feutanaig ai le va o le malo ma le pulega o le faletupe, i ni isi o auala e mafai ai ona toe nofo le faletupe, ma, e leai se ma’a e le’i fulia i le tele o nei talanoaga sa faia, ma fa’amautuina ai lava le manatu, e tumau pea le fa’aiuga ua faia ina ia fa’amuta le tautua a le faletupe i le teritori”, o le isi lea saunoaga a Ozu.

Na fa’afetaia e ni isi o faipule le susuga a Ozu e tusa ai o le tautua a le faletupe a Hawaii mo Amerika Samoa i le tele o tausaga.

Na fesili le sui fofoga fetalai ia Fetu Fetui Jr ia Ozu, pe i ai lava se isi avanoae mafai ai ona toe sui le fa’aiuga a le faletupe a Hawaii, ae toe nonofo e fa’aauau la latou tautua, ae na tali Ozu e leai.