O le taofia ai e leoleo i le toese i Tafuna o se ali’i sa poloaina e le fa’amasinoga maualuga, e aua ne’i toe ulufale mai i totonu o Amerika Samoa mo le umi e 7 tausaga, ua poloaina ai e le fa’amasino sili le Ofisa o le Loia Sili, ina ia fa’ailoa mai i le fa’amasinoga pe na fa’apefea ona toe ulufale mai lea ali’i i le teritori, ma ia aami fo’i se sui o le Ofisa o Femalagaaiga e fa’amanino i le fa’amasinoga fa’afitauli o lo o tupu i le Ofisa ua mafua ai ona tutupu soo nei fa’aletonu.

O le aso Lua na te’a nei na taofia ai e leoleo le ali’i o Pelenato Maiava ina ua masalomia lona le usitaia o tuutuuga o lana nofovaavaaia, o le aua lea ne’i toe ulufale mai i le teritori mo le umi o lana nofovaavaaia.

O le taeao ananafi na tula’i ai Maiava i luma o le fa’amasinoga maualuga mo sana iloiloga fa’apitoa, ma toe tolopo ai loa e le fa’amasinoga lana mataupu e toe valaau i le aso 18 Fepuari 2015, lea fo’i o le a maua ai ma le avanoa o se sui o le Ofisa o Femalagaaiga na te fa’amanino i le fa’amasinoga ni isi o mataupu o lo o atugalu i ai le finagalo o le fa’amasinoga.

E tusa ai o fa’amaumauga a le fa’amasinoga, o ni isi o tuutuuga o le nofovaavaaia a Maiava mo le umi e 7 tausaga, talu mai le mataupu na molia ai o ia i le 2010, a mae’a ona ia tuliina masina e 28 i le toese i Tafuna, ona ia tuua lea o le teritori ma aumau ai i fafo mo le umi e 7 tausaga o lana nofovaavaaia, e fa’asa ona ia taumafai e toe ulufale mai i totonu o le taimi o lana nofovaavaaia.

“E tusa ai o tala ua ou fa’alogo i ai, ua fa’afa ona sau Maiava i totonu o le teritori, ae o lo o i ai fo’i sana mataupu i luma o le Fa’amasinoga Fa’aitumalo, lea o lo o molia ai o ia i le solitulafono o le fa’atupu vevesi i nofoaga faitele”, o le saunoaga lea a le fa’amasino sili ia Michael Kruse i le loia fautua a Maiava o Douglas Fiaui.

Sa fa’ailoa fo’i e Kruse ia Fiaui, e tatau ona ia toe sailiili i fa’amaumauga e fa’atatau i le mataupu a Maiava, aua, pau le fa’aiuga o lo o i le finagalo o le fa’amasinoga, o le loka loa o ia mo le 7 tausaga.

“E tatau ona e su’esu’e pe na fa’afefea ona fa’ataga a le Ofisa o Femalagaaiga Maiava e toe ulufale mai i le teritori”, o le isi lea saunoaga a Kruse ia Fiaui, ma ia poloaina fo’i le sui o le Ofisa Faanofovaavaaia ina ia fai fo’i sana ia su’esu’ega e fa’atatau i le mataupu lenei.

“E i ai fo’i fesili e tatau ona e tali mai ai i le fa’amasinoga, o le tagata solitulafono sa poloaina e tuua le atunu’u, a o lea ua toe maua ua ulufale mai i le atunu’u”, o le saunoaga lea a Kruse i le loia a le malo o Tiffany Oldfield.

“O lea ua ou maua le tala, o Maiava na ulufale mai i totonu o le teritori i le pemita e 30 aso, e sa’o lea Ofisa Fa’anofova’ava’aia”?, o le fesili lea a Kruse i le sui o le Ofisa Fa’anofova’ava’aia, ma tali ai le sui o le Ofisa, “sa’o lelei lau afioga”, ma vaaia ai le soisoi o le ali’i fa’amasino sili.

“Ou te fia iloa po o le a le fa’afitauli o lo o tupu i le Ofisa o Femalagaaiga”, o le saunoaga lea a Kruse ia Oldfield, lea na fesili ai le tama’ita’i loia i le fa’amasinoga, pe finagalo e aami le Pulesili o le Ofisa o Femalagaaiga e o o mai i le fa’amasinoga e fa’amanino le mataupu lenei, ae na saunoa Kruse, “ou te mana’o e tu’u i fa’amaumauga a le fa’amasinoga po o le a tonu le mea o lo o tupu i le Ofisa o Femalagaaiga”.

Ua toe taofia nei Maiava i le toese i Tafuna e aunoa ma se tupe ua fa’atulaga e tatala ai o ia i tua, e fa’atali ai lana iloiloga lea ua fa’atulaga i le aso 18 Fepuari.