Ua fesiligia e le afioga i le alii senatoa mai le itumalo o Tualauta ia Magalei Logovi’i tulaga malu puipuia o tupe a le malo, i lalo o le tulafono lea ua toe talosagaina e le faigamalo, e teuteu ai le tulafono o le pone na pasia e le Fono i le tausaga na te’a nei, ina ia fa’agaioi lelei ai le fa’atauina mai o pone e le komiti o Pone a le malo.

O lo o taua i lalo o le teuteuga o le tulafono e pei ona talosagaina e le kovana e fa’apea, o le a malilie fa’atasi le malo o Amerika Samoa ma i latou o lo o umia pone, mo le toe totogiina atu o tupe mo pone, “o le a le suia, pe afaina pe faatulaga fo’i tupe uma ua malilie ma ofo atu mo le toe totogiina o nei pone, e aofia ai ma tupe tului ua fa’atulagaina, e ao lava ina totogi ma fa’amatu’u atu atoa”.

O popolega e pei ona saunoa Magalei, afai ae fa’aletonu le malo i le feagaiga ma tagata fai pone mai fafo, lona uiga o le a afaina uma tupe a le malo i le toe totogiina atu o tupe o pone mo tagata sa inivesi mai a latou tupe.

O le lisi o tupe a le malo na taua e le loia sili o lo o aofia ai i tupe ua fa’amoemoe le malo e tu’uina atu e lagolago ai fuafuaga mo le fa’agaioiina o pone, o lo o aofia ai ma tupe a le vaega o le Litaea a le malo, e ui na taua e le loia sili ia Talauega Eleasalo Ale i le isi iloiloga, e na o tupe o le fa’agaioiga a le litaea o lo o aofia ai i lalo o le tulafono lenei, ae le o aofia ai teugatupe a le litaea o lo o inivesi atu i maketi i fafo.

Na fa’amanino atili e le loia sili e fa’apea, o le agaga o le tulafono e pei ona toe tu’uina mai e teuteu ai le tulafono ua mae’a ona pasia, ia mafai ai ona fesoasoani i le komiti o le Pone i le taimi latou te o atu ai i fafo i kamupani ma tagata o lo o fa’atau a latou pone, ma fa’ailoa atu i ai, o lo o i ai le vaega tupe a le malo e mafai ai ona toe toe totogi atu tupe o a latou pone, pe afai e malilie i latou e fa’atau le  pone a Amerika Samoa.

I luma o le komiti o le Tamaoaiga a le maota o sui i le taeao ananafi, na fa’amalamalama ai fo’i e le loia sili le mataupu lava fo’i lea e tasi, i se iloiloga sa latou molimau ai ma le teutupe a le malo ia Ueligitone Tonumaipea, atoa ai ma le Fa’atonusili o le Matagaluega o Alamanuia a le malo ia Keniseli Lafaele.

Ina ua fesiligia e faipule le loia sili pe fia le maualuga o tupe a le malo o le a tu’uina atu e lagolagoina ai pone, na tali le loia sili, o le 25% o tupe a le malo ua fa’amoemoe e tu’uina atu e fa’amau ai tulaga o pone, o le vaega tupe lea ua sauni le malo e folafola atu i tagata fai pone i fafo, e toe totogi atu ai a latou tupe o pone sa inivesi mai mo Amerika Samoa.

Saunoa le afioga i le sui fofoga fetalai ia Fetu Fetui Jr e fa’apea, pau lona popolega o lo o i ai i le mataupu lenei, ina ne’i avea le maualuga o pasene o tupe a le malo o le a fa’amaonia ai pone ma itu e a’afia ai le itu tau tupe a le malo i le lumana’i.

O le masina o Aperila e pei ona taua i le tino o le tulafono ua sauni le malo e feiloa’i ai ma tagata fai pone, mo le talanoaina atoa ai ma le fa’amautuina o fuafuaga uma mo lenei fa’amoemoe.

E $62 miliona le vaega tupe na taua e le loia sili i luma o le Senate, o lo o va’ava’ai i ai le komiti o le pone a le malo e tatau ona maua mai i le taimi muamua e fa’atau atu ai pone, ma amata ai loa ona fa’atino le fausiaina o atina’e a le malo ua mae’a ona fuafuaina.

O le agaga ua manatu ai le malo e saili ni tupe o pone e fa’atino ai atina’e tetele ma totogi ai aitalafu a le malo o lo o i ai, ona ua maitauina e le malo le anoanoa’i o manaoga tau tupe o lo o i ai, ae o le fa’afitauli numera tasi, e le o lava se alagatupe malosi e mafai ai e le malo ona tali atu i nei manaoga, e pei ona saunoa le loia sili.

Sa ia taua fo’i e fa’apea, afai e fa’atali le malo i tupe fesoasoani mai le feterale, o le mea moni lava, e le taitai gafatia e le malosi o tupe o lo o aumai ona faatupe le tele o atina’e o lo o naunau le malo e vave fa’atula’i, ma ua manatu ai loa le faigamalo, e sili pe a saili se isi auala e mafai ai ona maua se to’omaga mo le atunu’u, ma mafai ai ona tali vave atu i manaoga uma e pei ona fa’ailoa.

O le taeao ananafi na pasia ai e le Senate le pili na talosagaina e le ali’i kovana mo suiga i le tulafono o le pone i le palota e 11-2.

E na o le afioga i le ali’i senatoa ia Magalei ma lona soa tau ia Gaea Perefoti Failautusi na palota leai i le tulafono lenei.

O le taeao nei lea ua fa’amoemoe le maota o sui e faitau tolu ai le latou tulafono e tutusa lelei ma le tulafono a le senate lea na pasia ananafi.