O le aso 1 Me, 2015 lea ua fa’atulaga e fofogaina ai le fa’asalaga a le fa’amasinoga maualuga fa’asaga ia Stephania Sulusulu, i le mae’a ai lea ona ia ta’utino i le fa’aasinoga, e fa’amaonia tu’uaiga fa’asaga ia te ia, i lona fa’aaoga fa’agaoi lea o le silia i le $11,000 mai le kamupani o le GHC Reid Company sa galue ai o se tali tupe.

E lua moliaga mamafa o le fa’aaoga fa’agaoi o tupe mai le kamupani a le GHC Reid na ulua’i tu’uaia ai e le malo ia Sulusulu, ae i lalo o le maliliega lea na latou sainia ma le malo i le aso Faraile na te’a nei ma talia e le fa’amasinoga, ua tali ioe ai Sulusulu i le isi moliaga ae solofua e le fa’amasinoga le isi moliaga mamafa.

I le tali ioe ai o Sulusulu, 37 tausaga le matua i le solitulafono e pei ona ta’usala ai o ia e le fa’amasinoga, sa ia ta’utino ai e fa’apea, i le va o le masina o Aperila e o o atu ia Me 2010, sa ia fa’aaoga fa’agaoi ai se vaega tupe e tusa ma le $11,842.27 mai le kamupani sa galue ai.

O le mataupu lenei, na alia’e i luga ina ua masalomia e le Su’etusi a le kamupani ni isi o fa’amaumauga tau tupe e le o talafeagai ma fa’amaumauga a Sulusulu, ma poloaina ai loa e le Peresetene a le kamupani le faia o se su’esu’ega i lenei mataupu.

I suesuega sa faia, na maua ai le fa’aaoga e le ua molia o siaki mai isi kamupani e totogi ai pili o lo o aitalafu ai isi kamupani i le GHC Reid, i le mae’a ai lea ona ia fa’aaoga o tinoitupe sa totogi atu e kamupani ia mo a latou aitalafu.

Mo se fa’ata’ita’iga, na fa’aaoga e Sulusulu le siaki na totogi atu e le North West Company e totogi ai le aitalafu a le Cost U Less.

O le masina o Me 2010 na fa’amalolo ai loa Sulusulu mai lana galuega a o fa’agasolo ai su’esu’e mo ni isi vaega tupe o lo o a’afia i gaioiga a le ua molia, peita’i ina ua tuana’i aso e fa talu mai le aso na fa’amalolo ai Sulusulu mai lana galuega, sa ia tuua ai le teritori ae malaga ese atu i fafo, e aunoa ma lona logoina o le kamupani.

I le aso 30 Novema 2010, na logo ai e se sui o le kamupani le tina o le ua molia, ma fa’ailoa i ai le masalomia e le ua molia o se vaega tupe e tusa ma le $3,447.27, ae i su’esu’ega sa fa’auau na manino ai, e silia i le $11,000 le vaega tupe na gaoi e le ua molia.

I le aso 1 Tesema, 2010, na tusi ai e le ua molia se tusi i luga o le ‘Facebook’ ma ave i le Peresetene o le kamupani, e fa’atoese i ai e tusa o lana gaioiga sa faia, ma ia talosagaina ai se avanoa na te toe totogiina ai le tupe.

I le tuana’i ai o masina e fa, sa toe fo’i mai ai Sulusulu i le teritori ma ia sainia ai se maliliega ma le kamupani, ma ia malie ai na te totogiina le ta’i $500 i le masina seia atoa le tupe na ia ave faagaoi, ae i le va o Aperila 2011 ma Novema 2012, e na o le $1,050 sa ia toe totogi i le GHC Reid.

Na ta’utino Sulusulu i le fa’amasinoga e fa’apea, o le gaioiga sa ia faia, sa faia e aunoa ma se fa’atanaga fa’aletulafono mai le GHC Reid, e le i fa’atagaina fo’i o ia e le kamupani na te fa’aaoga a latou tupe mo ia lava.

Ua sauni loia e finau i le fa’amasinoga mo se fa’asalaga mama mo le ua molia, peita’i ua malamalama le ua molia, e tusa lava pe finau loia i le fa’amasinoga mo se fa’asalaga mama mo ia, e pule le fa’amasinoga pe talia pe teena ia fa’afinauga.

Ua ia malamalama fo’i, e le mafai ona toe suia lana tali ioe ua tu’uina atu i le fa’amasinoga, pe afai e tu’uina mai se fa’asalaga a le fa’amasinoga ae le tusa ai ma lona mana’o.

O lo o tumau pea poloaiga o lo o tatala ai Sulusulu i tua, e fa’atali ai le aso lea ua fa’atulaga e lau ai lona fa’asalaga.

O le solitulafono o le ave fa’agaoi o tupe sa tu’uina atu i lalo o lana va’ava’aiga, o se solitulafono C i le fa’atulagaina o solitulafono mamafa, lea e mafai ona fa’asala ai se tasi i le toese mo le umi e le silia i le 7 tausaga, po o le fa’asalaga i se fa’asalaga tupe e le silia i le $5,000, pe fa’asala fo’i i fa’asalaga uma ia e lua.