ia Manu Lefatia ...

O le taeao ananafi na tu’uina mai ai se poloaiga mai le afioga i le ali’i fa’amasino ia Elvis P. Patea, e fa’ataga ai le fa’alauiloaina o fa’amaumauga a le malo o lo o i totonu o le pepa o tagi sa latou fa’aulu fa’asaga ia Manu Lefatia ma Tuliese Taliu, i le taimi o le isi ana iloiloga i luma o le fa’amasinoga.

O le aso Faraile na te’a nei ina ua fa’atoa tutula’i Lefatia ma Taliu i luma o le fa’amasinoga fa’aitumalo, na tu’uina mai se poloaiga a Patea e taofia ai le fa’alauiloaina o fa’amaumauga o le tagi ua fa’aulu fa’asaga ia i laua nei, i le mae’a ai lea ona faila e le malo o se talosaga e taofia ai le fa’alauiloaina o fa’amaumauga o lo o i totonu o le pepa o tagi sa latou fa’aulu, ona o le puipuiga i le saogalemu o ali’i matama’ita’i leoleo.

I le toe tula’i ai o Lefatia i luma o le fa’amasinoga i le taeao ananafi, na talosagaina i loa lana loia fautua o Sharron Rancourt i le fa’amasinoga, mo sana poloaiga e tu’uina mai e fa’alauiloa ai faamaumauga o lo o i totonu o le pepa o tagi sa fa’aulu, lea fo’i sa talia e le fa’amasinoga ina ua leai se fa’atuiese mai le itu a le malo.

Na taua e le loia a le malo ia Russel Smith i tusitala e fa’apea, na mafua ona ia talosaga i le fa’amasinoga e taofi le fa’alauiloaina o fa’amaumauga, o le manatu e puipui i le saogalemu o leoleo, aemaise ai o le puipuiga i le ono salalau atu i tua o fa’amatalaga e fa’atatau i le osofaiga a leoleo sa fuafua e fa’ataunu’uina i se nofoaga e feso’ota’i ma i laua e to’alua ua molia nei.

I le pepa o le tagi e 10 itula, o lo o taua ai le to’atele o molimau na fesiligia e leoleo, mo le tu’uina mai o ni isi o fa’amatalaga e feso’ota’i ma le fa’alavelave lea na fana ai le Ofisa o Leoleo i Leone.

I le pepa o tagi, o lo o tu’uaia ai e molimau e fa’apea, o le ali’i talavou ua molia nei sa ia fa’apaina le fana na fana ai le Ofisa o Leoleo i Leone.

Pe tusa o le itula e 2:30 i le po o le aso 1 Novema 2014 e pei ona taua i fa’amaumauga a le fa’amasinoga, o le taimi lea o lo o tu’uaia na fana ai e se tagata le ofisa o leoleo, a o i ai ni leoleo se to’alua i totonu, peita’i o le itu e laki ai, e leai ma se isi o i laua na a’afia pe na manu’a fo’i.

O se molimau e nofo latalata i le nofoaga na tula’i mai ai le fa’alavelave, sa ia fa’amatala i leoleo lona te’i i luga ao moe ina ua ia fa’alogoina le pa o se fana, e le’i umi ae ia fa’alogoina le pa o le fana lona lua, soso’o atu ai ma le pa lona tolu.

Na taua e le molimau i leoleo, na te lei vaaia se tagata po o ni tagata na fa’atinoina le gaioiga i le po lea.

Na taua e le isi molimau i leoleo e faapea, o ia sa i ai i le nofoaga a ‘Le Aute Sports Bar’ i le po na tau pulepule ai ni ali’i se to’afa e osofa’i le ofisa o leoleo i Leone.

O ali’i e to’afa sa taua e le molimau e aofia ai Manu, o le ali’i o Tuliese Taliu lea na taofia fa’atasi mai i laua e leoleo i le vaiaso na te’a nei, ma isi ali’i e to’alua o lo o tau sailia e leoleo i le taimi nei.

Na taua e le molimau i leoleo e fa’apea, na mafua ona taupulepule le osofaiga ina ua le fiafia ali’i nei e to’afa i le mataupu na loka ai e leoleo le tuafafine o le ali’i ua molia nei, ona o tu’uaiga i lona umia o fualaau fa’asaina.

Na taua e le molimau lona fa’alogoina o Taliu o fa’apea atu ia Manu, “e tatau ona fuafua se osofaiga ona o lea ua loka ia RINA”, ae sa tali atu i ai Manu, “e sa’o, o se mea ua tatau ona tatou faia”.

Pe tusa o le itula e 1:30 a le 2:00 i le vaveao o le aso 1 Novema 2014 e pei ona taua e le molimau i leoleo, sa ia vaaia se ta’avale lanu uliuli e leai se laisene o aga’i atu i le nofoaga a le Aute, ona nofo ai lava lea o le ave ta’avale i totonu o le ta’avale, e lei leva ae ona vaaia Taliu ua savali aga’i atu i le ta’avale ma se fana o lo o uu i lona lima, ona ia vaaia lea ua oso Taliu i totonu o le ta’avale, sosoo atu ai loa ma Manu ma le isi ali’i.

Pe tusa o le itula e 3:00 i le vaveao o le aso lava lea e pei ona taua e le molimau i leoleo, sa ia toe vaaia ai le ta’avale na malaga ai ali’i nei e to’afa ua toe fo’i atu i le nofoaga o le Aute, ma vaaia ai ali’i e to’afa ua tuli oso i fafo ma le ta’avale ae aga’i atu i le fale o le Aute.

Na taua e le molimau lona lagonaina o le tala a Taliu sa fai i le isi ali’i sa latou o i le osofaiga, e aua nei faia lava sana tala e fa’atatau i le mea lea na fana ai e Manu le ofisa o leoleo i Leone.

O le ali’i o Taliu ma isi ali’i e to’alua o lo o tau sailiina nei e leoleo, o tagata faigaluega i latou a le Aute, e nonofo uma fo’i i le fale o MAMA - o le igoa lea o le fafine e pulea le Aute.

Na taua atili e le molimau i leoleo e fa’apea, o Taliu ma isi ali’i e to’alua o lo o tau sailia e leoleo, e faigaluega i latou i le tulei ma le fa’atauina atu o fualaau fa’asaina mai le Aute. Sa ia taua atili fo’i e fa’apea, o le tele o fualaau fa’asaina e pei o le aisa ma mariuana, e fa’atau atu e tagata i le Aute, ona o Taliu ma ali’i e to’alua e pei ona taua ua tulei fualaau faasaina, i lalo o le vaavaaiga ma le fa’amalumaluga a MAMA, o le pulea lea o le Aute.

Na taua atili fo’i e le molimau lona vaaia o ni fana i le nofoaga o le Aute, ina ua maua le avanoa e fa’amatamata ai o ia i totonu o le fale o MAMA, ae o ni isi fo’i taimi, na te vaaia ai Manu o fealua’i ma ni fana i totonu o le nofoaga o le Aute.

Na taua e le molimau lona lua i leoleo e fa’apea, e le i tele ni aso talu ona mae’a le fa’alavelave na fana ai le ofisa o leoleo i Leone, ae ona fa’alogo loa o talanoa tagata o le aiga o le Aute e faapea, ua ta’utaua le latou aiga ina ua fana e Manu le ofisa o leoleo.

Ae na taua e le isi molimau i leoleo e fa’apea, i le vaveao lea na tula’i mai ai le fa’alavelave, na te’i ai ina ua savali atu Taliu ma fai atu ia te ia, “fa’atoa uma ona matou tafanaina le ofisa o leoleo i Leone”.

Ae na taua e le molimau lona fa i leoleo e fa’apea, i le po o le aso 31 Oketopa 2014 pe tusa o le itula e 11:00, sa ia fa’alogo ai o fa’apea le tala a le isi tagata o le aiga o le Aute, “ua sauni tama e fa’ataunu’u le osofaiga i le ofisa o leoleo”.

O le isi molimau sa ia fa’ailoa i leoleo e fa’apea, e i ai fana sa aveese mai i le nofoaga o le Aute ae ave ma nana i le fanua o le tuagane a MAMA i le isi itu.

O le itula e 8:30 i le taeao o le aso Tofi o le vaiaso nei, lea ua fa’atulaga e toe tula’i ai Lefatia mo le isi ana iloiloga, ma, o lo o taofia pea o ia i le toese e aunoa ma se tupe ua fa’atulaga e tatala ai o ia i tua.