AGA’I INA UMA LE PUSA ONOSA’I O TAGATA

Fa’alogologo ma le toto’a taliga o si Fafige Faikakala i le fa’aauau pea lea ona fa’asea ma tomumumu le to’atele o le atunu’u, i le tuai lea ona maua siaki o lafoga, ma ua atagia mai ai le tauau ina uma atu ai ma le pusa onosa’i o le to’atele i le fiu lea e fa’atali siaki o lafoga. E tofu atu si Fafige Faikakala i totonu o le maketi i le isi aso, e na o le mataupu lava i lafoga o loo talanoa mai ai le aufai fa’atoaga, e oso atu i luga o le pasi, o le mataupu lava fo’i i lafoga o lo o pisa ai fafine o le kamupani, ae te’i ina ua taunu’u atu i le EOB, oka se laina o tagata o le atunu’u o lo o nofonofo ai e fa’atalitali, pe le ‘fiki’ se laki o le lafoga. Fai mai le isi uo a le Fafige Faikakala, “o le iku o loo piko sili oga le fiafia iai kagaka, o le fiu e fesili i le ofisa pe aisea ua kuai ai oga maua lafoga, ae sau le kali, lakou ke le iloa i le malo, afai e le o i ai se kupe a le malo e kokogi ai lafoga, ma faafekaui ai kupe mai fafo, loga uiga ua le faamaogi le malo”, ae fai mai le isi uo ave pasi a le Fafige Faikakala, “o le isi lea mafua’aga e ala ai oga faila e kagaka a lakou lafoga i fafo, o le pi’opi’o o le malo”. Ua le iloga se mau faasea mai le atunu’u i le tuai lea ona maua lafoga. O le fautuaga a le Fafige Faikakala i le au faila lafoga, fai malu pea le faiva, atonu lava e tuai ae iai le taimi e maua ai, ona manuia uma fo’i lea o le atunu’u.

“FA’AILOGALANU SAMOA IA AMERIKA SAMOA”

E le iloa e si Fafige Faikakala pe ata pe tagi ina ua taia i lana fa’alogo, e to’atele le atunu’u e le o fiafia i le gaioiga a le Palemia ma le malo o Samoa o lo o faia i le taimi nei, o le manaomia lea o pemita e ulufale atu ai tagata Amerika Samoa uma o lo o umia tusi folau Amerika i Samoa, ae a malaga atu tagata sitiseni o Amerika o lo o umia le tusi folau lava lea ona le mana’omia lea o se pemita. O le itu e malie ai i le fa’alogo a le Fafige Faikakala, e foliga mai ua leva tele ona pologa mafaufau o tagata Amerika Samoa i faiga a le ali’i o ‘STUI’ ma lona malo o loo fai nei, ae leai ma se isi na fa’asea pe faitio i na taimi, ina ua toe alia’e le mataupu i le vaiaso na te’a nei, na fa’aaoga ai loa fa’aupuga o le ‘FA’AILOGALANU’ fa’asaga i si malo sulu ie ona o le gaioiga o lo o latou faia. Na fa’amatala e le isi uo loomatua a le Fafige Faikakala e lava si ona iloa i le mataupu lenei, e foliga mai na mafua ona faia e Samoa le fa’aiuga lea, “o le ita” i se gaioiga sa faia fa’asaga i ana tama fanau i i tausaga ua mavae, ina ua malaga mai se au lakapi ae na toe fa’afo’i e le Loia Sili i lena vai taimi i le leai o se pemita e ulufale mai ai. O le fautuaga a le isi toeaina sa aumai i le Fafige Faikakala, “o ai lava le kagaka Amelika Samoa e ika i le gaioiga a le Palemia o loo fai, aua ge’i koe alu fua i Samoa ma le kiga o le ulu”. Ae o le fautuaga a le Fafige Faikakala, fai fai malu pea le faiva, o Samoa lava ia e lolo lava mea uma i le fa’aaloalo ma le feavata’i, ae moni ai le fautuaga a se tasi o tamali’i o le atunu’u, e tatau lava ona fautuaina le malo o Samoa, e le o talafeagai le fa’aiuga o lo o fai, o le le amanaiaina lea o le tusi folau a Amerika o loo umia e Tagata Nesionale o lo o aumau i Amerika Samoa e avea ma visa e ulufale ai i Samoa. Talofa e, e tagi ai le fatu ma le eleele i le alofa ia Amerika Samoa, ae paga lea, o le upu e masani ai le tupulaga, e pule lava le kama a le olomatua i lana mea e fai. Fai aku ai fo’i.

“MASINI ATM AE LEAI NI TUPE MA NI LISITI”

Gugulu fo’i le to’atele o le atunu’u i le fa’aletonu o le auaunaga a le Faletupe o le ANZ i le taimi nei, e i ai masini ATM, ae o le tele o taimi e leai ni tupe e maua ai i totonu, ae o isi fo’i taimi, ua maua tupe, ae leai ni lisiti. Tagi talatala le isi fafine fai mai, “ua le iloga se mea e pagakia ai le akugu’u, a o mai e kalosaga gi loan ae fai mai e le mafai, a o aku fo’i i le masigi ae fa’alo mai e leai se kupe, koeikiiki loa eli se pu o lo’u fagua ae keu ai a’u kupe ...” o le fautuaga a le Fafige Faikakala i le atunu’u o lo o fa’asea, ia lava pea le onosa’i, ae afai loa e tupu soo le fiu e o i le masini ATM e le maua ai se tupe, fai loa le gaioiga a le vaega a “Le Aute”, teu loa tupe i totonu o le fale ma le ta’avale e sefe ai ma le tiga o le ulu.