Na soisoi le afioga i le ali’i kovana, le tofa i le to’oto’o ia Lolo Matalasi Moliga ina ua fa’ailoa atu i ai e le Samoa News le manaoga o le itumalo o le Manu’atele, o lo o manana’o ia i ai fo’i sa latou polokalame lea e fa’atupe ai e le malo gasegase e auina atu i fafo mo togafitiga, pe afai e auina mai tagata Manu’a e togafiti ma talavai i Tutuila nei.

“Fai ia Manu’a ia lava mai pea le onosa’i, o lea e taumafai pea le malo e fa’alelei muamua le tautua a le Matagaluega o le Soifua Maloloina i totonu o le Itumalo, ona mafai ai loa lea ona maua se fesoasoani mo i latou”, o le saunoaga lea a le ali’i kovana i se fa’atalatalanoaga ma le Samoa News i le amataga o le vaiaso nei.

O le manaoga o le itumalo o Manu’a e pei ona fa’ailoa mai e se tasi o a latou faipule i le Maota o Sui o le Fono Faitulafono, le afioga a Vesi Talalelei Fautanu, o le naunau lea o le Itumalo e fa’atupe e le faigamalo a Lolo ma Lemanu se polokalame o le “Off-Island referall program” mo i latou, e pei fo’i ona faia mo le atunu’u o lo o auina atu i falema’i i Hawaii ma Amerika mo togafitiga.

Saunoa le ali’i faipule e fa’apea, afai e fa’atonu e le foma’i se tagatanu’u o Manu’a e malaga mai i Tutuila nei e talavai ai, e tatau ona fa’atupe e le malo le pasese e malaga mai ai le tagata Manu’a i Tutuila nei, fa’atasi ai ma le totogi o le talavai, po o isi uma lava manaoga i le taimi e asia ai le falema’i.

Afai fo’i e leai se aiga o le tagata Manu’a i Tutuila nei, e tatau fo’i ona totogi e le malo i lalo o le polokalame lea, se faletalimalo e nofo ai le tagata Manu’a i le taimi atoa o le a i ai i Tutuila, seia oo atu lava i le taimi e toe taliu atu ai i Manu’a.

Saunoa le afioga i le ali’i kovana ia Lolo, o ia fo’i o se tagatanu’u o Manu’a, “e taua le manaoga o tagata Manu’a”, peita’i, e ese fo’i le silasila a le malo i le auala e tatau ona fa’atino ai lea auaunaga, e ala lea i le fa’alelei muamua lea o le tautua a le Matagaluega o le Soifua Maloloina mo falema’i i Manu’a, ona mafai ai loa lea ona tali manaoga o le Itumalo.

“Se’i tau fa’alelei muamua le auaunaga i Manu’a, ona tali ai loa lea o manaoga uma e pei ona talosaga mai i ai le itumalo”, o le saunoaga lea a Lolo i le Samoa News.

Saunoa le ali’i kovana e fa’apea, e le o vaavaai le malo i le faia o se polokalame e pei ona talosaga mai ai Manu’a, ae afai e mautu le Fale Su’etoto i Manu’a, toe maea ma le fuafuaga e fausia se latou “tama’i Fale Talavai”, ona mafai ai loa lea ona tali le tele o isi manaoga o lo o tula’i mai.

Ae ina ua toe fesiligia le ali’i kovana i se umi o lo o vaavaai i ai le faigamalo mo le fa’atinoina o lea fuafuaga, na toe soisoi le ali’i kovana ma saunoa e fa’apea, “se’i tele ni tatou tupe ona fa’atino lea o manaoga e pei ona fuafuaina, pau le itu e manatu le malo e tatau ona silafia e le itumalo o Manu’a, o lo o naunau le faigamalo e fa’aleleia le atina’eina o le Soifua Maloloina mo tagata Manu’a”.