PASIA I’UGAFONO FA’ATUMAU AI OGASAMI FAGOTA ATUNU’U

Ua pasia nei e le Fono Faitulafono le i’ugafono malilie fa’atasi a le Senate, e talosagaina ai le Fono Fa’afoe o Faiga Faiva i le Pasefika ina ia fa’atumau pea i le 50 maila le mamao o ogasami puipuia o Amerika Samoa mai fagotaga, ina ua pasia e le maota o sui lenei i’ugafono i le vaiaso na te’a nei i le palota e 12-2.

E ui i ni finagalo mai ni isi o faipule sa atagia mai ai le le lagolagoina o lenei i’ugafono, peita’i na pasia lava le i’ugafono e lagolagoina ai le fa’amoemoe o le kovana ma le atunu’u atoa, ina ia fa’atumauina pea le mamao o ogasami fa’asao o le atunu’u o lo o i ai.

O le lua vaiaso talu ai na faia ai le fa’aiuga a le Fono Fa’afoe o Faiga Faiva a le Pasefika, i sana fonotaga sa faia i Hawai’i, e suia ai le mamao o ogasami fa’asao a Amerika Samoa mai le 50 maila o lo o i ai, i le 12 maila e pei ona latou suia i ai.

E tele finagalo fa’ase’a mai ta’ita’i o le fono e aofia ai afioga i Senatoa ma ni isi o faipule, i le le talafeagai o le fa’aiuga ua faia e le Fono Fa’afoe o Faiga Faiva a le Pasefika, e ui o lea o lo o tete’e malosi Amerika Samoa i lea suiga.

O le agaga o le i’ugafono a le senate, ia fa’atumauina pea le 50% o ogasami fa’asao a le atunu’u, o iina o lo o fa’alagolago i ai faiga faiva a va’a fagota alia.

PASIA MAOTA SUI PILI FA’AE’E AI LAFOGA 5% I FALETALIMALO

E ui i le tete’e o le aufai pisinisi faletalimalo i le lafoga e 5% a le malo, peita’i o le vaiaso na te’a nei na pasia ai e le maota o sui la latou pili e pasia ai le lafoga fa’ae’e mo faletalimalo, ma ua taoto atu nei i le Senate lea tulafono taufa’aofi mo sa latou fa’aiuga.

O le agaga o le faigamalo e pei ona saunoa le Teutupe ia Ueligitone Tonumaipe’a e fa’apea, o le tupe lea ua fa’amoemoe e maua mai i le lafoga e 5%, o le a fesoasoani e fa’aleleia ai manaoga i le malae va’alele i Tafuna, lea e mumu lava i tausaga tupe ta’itasi lana tupe fa’asoasoa, ma aumai ai loa e le malo tupe mai le teugatupe lautele a le malo e tau fa’atumu ai le paketi a le malae va’alele.

A o le i pasia e le maota o sui la latou tulafono lea i le vaiaso na te’a nei, sa fa’aalia e ni isi o faipule lo latou popole tele, ina ne’i avea le lafoga lea ma itu e afaina ai le atina’e tau turisi i Amerika Samoma, peita’i na fa’amalamalama e molimau a le malo e fa’apea, o le to’atele o tagata o lo o malaga mai ma aumau i faletalimalo i le atunu’u, o tagata faigaluega a le feterale, sui o le militeli atoa ai ma tagata faipisinisi, ae to’aitiiti lava tagata turisi.