TO’ATELE FANAU MALILIU I TAUA MA OSOFAIGA

I totonu o le atunu’u o Yemen i Sasa’e Tutotonu, ua fa’aalia ai i ni ripoti i le aso ananafi le to’atele o tamaiti ua maliliu i totonu o le 10 vaiaso talu ona fa’aauau pea taua ma osofaiga i totonu o le taulaga o lea atunu’u. I se ripoti sa fa’asalalauina e le vaega o le “United Nations Children’s Fund” o loo taua ai e fa’apea, e to’a 279 le aofa’i tamaiti ua faamaonia le maliliu ai i osofaiga nei, talu ona amata mai i le masina o Mati 2015, pe a fa’atusatusa i le to’a 79 tamaiti na maliliu i le taimi lava fo’i lenei i le tausaga e 2014. I se vaega o lea ripoti o loo taua ai e fa’apea, e to’a 318 tamaiti na fa’aaoga e fitafita tete’e i Yemen e fesoasoani i a latou autau ma i’u ina maliliu ai i latou.

TAOFI LE FA’ATAUNU’UINA O LE FAASALAGA O LE OTI

O le vaiaso nei na tuuina mai ai se faaiuga mai le Fa’amasinoga i totonu o le aai o Cairo i Aikupito, e fa’amalumalu ai le fa’ataunu’uina o le fa’asalaga o le oti fa’asaga i le ali’i sa avea muamua ma Peresetene o Aikupito, ae ua poloaina le fa’asala o ia e soloatoa i le falepuipui. O le ali’i o Mohamed Morsy, 63 tausaga le matua, fa’atasi ai ma isi e to’a 16 mai le vaega e fa’aigoaina o “Muslin Brotherhood leaders”, ua fa’asalaina uma i latou e soloatoa i le falepuipui, e mafua mai ina ua ta’usala i latou e le fa’amasinoga i lo latou taupulepule lea e lagolago le faalavelave lea na mafua ai ona sosola i tua pagota mai se tasi o falepuipui tele i totonu o le atunuu i le 2011. E ese mai ia i latou ia ua solo atoa i le falepuipui, e to’atolu isi sui o le vaega lava lea ua mae’a ona fa’asala i le oti, lea na ta sisi o latou ua e fitafita o le malo. O le toilalo popo o le vaega a le Muslin Brotherhood mai le ta’ita’iina o le malo, ua talosagaina ai loa e le atunuu lautele le tatau lea ona fa’amuta pulega saua ma le le alofa sa faia i tagata i le tele o tausaga ua mavae.

MOLIAGA FA’ASAGA KOMESNA O LEOLEO PAPUA NIU KINI

Ua ta’usalaina nei e le Fa’amasinoga Maualuga i Papua Niu Kini le ali’i sa avea ma Komesina o Leoleo o le malo, i le moliaga o lona le fa’amaoni e fa’atino ona tiute, e mafua mai i le mataupu lea na musu ai le ali’i Komesina e fa’ataunu’u se poloaiga a le fa’amasinoga i le tausaga na te’a nei, e ala i le tuuina atu o se tusi saisai e pu’e fa’apagota mai ai le Palemia o le malo o Peter O’Neil, ina ua fa’atino e le ali’i Palemia se fa’aiuga sa le tusa ma tulafono a le malo. O le tausaga na te’a nei na mana’omia ai e le fa’amasinoga le ali’i Palemia, e mafua mai i lona faataga lea o le totogiina atu o le tupe e US$29 miliona e totogi ai pili a se tasi o setete i le atunu’u, ma e le o tusa ai ma ala o le tulafono. Fai mai le fa’amasinoga, sa poloaina le pu’e fa’apagota o le ali’i Palemia i lea taimi peita’i sa musu le ali’i Komesnia o Geoffrey Vaki e fa’ataunuu lea poloaiga, ma i’u ai loa ina fa’amalolo o ia mai ona tiute. E le o iloa manino mai se aso e lau ai le fa’asalaga a le ali’i o Vaki.

“FA’AMUTA LE FA’AIPOIPOINA FA’AMALOSI O TAMA’ITA’I”

I le fa’amanatuina ai o le aso mo Fanau i Aferika i Saute (Day of the Aferican Child) i le aso ananafi, ua talosagaina ai loa e le Faalapotopotoga e taua o le “Girls Not Brides” (GNB) le malo, ina ia taofia loa se faiga faapologa ua leva ona faia mai i totonu o aai eseese o Aferika i Saute, i le fa’amalosia lea o tama’ita’i talavou e fa’aipoipo ae le o manana’o ai i latou. O le tele o tama’ita’i o loo fa’aipoipo fa’amalosi i le ta’i 15 tausaga, i le mae’a lea ona latou fa’atinoina o siva eseese e faaaliali ai o latou tino sa i luma o le Ta’ita’i o le aai. O tu ma aga masani a vaega eseese o Aferika, e pei o le fa’atinoina e tamai’ta’i talavou o siva e fa’aaliali ai o latou itutinosa i luma o Ta’ita’i, o nisi nei o faiga ua talosagaina e le Faalapotopotoga o le (GNB) le malo ina ia taofia loa.