ALII LEOLEO MA LE TULAFONO

E ofo fa’amaga le Fafige Faikakala ina ua ia maua i ana uaealesi mosooi se tala mata’utia, e fa’atatau i le ali’i leoleo lea na loka i le falepuipui i le faaiuga o le vaiaso na te’a nei, ona o tu’uaiga i lona fa’amalosia lea o se tama’ita’i talavou sa alu e momoli, ua toe tatala i tua ina ua le mafai e le tulafono ona fa’amaonia lana gaioiga sa faia. E ui i le lavelave o le mau fa’amatalaga e fa’atatau i lenei mataupu, peita’i o le mea manino e pei ona maua e le Fafige Faikakala i ana uaealesi mosooi, e i ai se feteenaiga i le va o lenei mataupu ma leoleo sa tuuina atu i ai le suesueina o le mataupu. Fai mai le tomumu a le isi olomatua sa faalogo i ai le Fafige Faikakala, “afai ua le mafai e leoleo ia ga suesueiga le makaupu oga faamaogi i lo la kiuke, ua kakau oga fa’amalolo i laua fa’amalolo aku ai ma le komesina o Leoleo.” Na te’i le Fafige Faikakala ina ua ia fa’alogo, e fai lava si to’atele o le atunu’u e le fiafia i le ali’i leoleo lea na loka i le falepuipui mo le 48 itula, ona o ona uiga e fa’aali i le atunu’u i le taimi e fa’atinoina ai lana galuega. O le fautuaga a le Fafige Faikakala i si uso leoleo lea, e sili ai loa pe a e fa’amavae mai lau galuega manu o lelei.

“TULAGA VAIVAI PEA LE TAMAOAIGA O LE MALO”

Tau pe le fatu o si Fafige Faikakala ina ua taia lana fa’alogo i se saunoaga a le alii kovana sa fai i lana kapeneta i se latou fonotaga i le vaiaso na te’a nei, fai mai o loo tulaga vaivai pea le tamaoaiga o le malo i le taimi nei, fa’atasi ai ma le masalosaloga, afai e fa’aauau ai peai le tulaga lea, e ono nofo aitalafu le malo i le fa’aiuga o le tausaga tupe i le aofaiga e lata i le 5 miliona. E tofu atu loa le Fafige Faikakala i totonu o le ofisa a le isi ana uo ae faapea mai loa ma le fesili a le ula lea, “e fa’afefea oga kupu legei mea, e vaivai le kamaoaiga ae fa’aauau pea e le kovana ma le faigamalo oga faa faigaluega kagaka i galuega fou, akoa ai ma le saigi o kogekalake e faikau afe ma afe le aofa’i.” Te’i le fa’alogo a le Fafige Faikakala i lea molimau, ae na atili ai ona toe te’i ina ua toe oso mai lana uo ofisa lea ma fai mai, “Eke le’i fa’alogo i le kupe lea ga maua a le kovana i le Ofisa o Kaui o Fa’alavelave Fa’afuase’i?” na lulu le ulu o le Fafige Faikakala na te le iloaina se mea e fa’atatau i lea tupe, ae na te’i ina ua toe oso mai lana uo ofisa lea, “E ke magakua fo’i le Ofisa lea ga maua ai fo’i le silia i le 60 afe a le isi alii sa sui faakogusili i le isi ofisa a le malo, o le ofisa fo’i lega o lea ua fa’amaguiaiga ai le kakou kovana, ae o le iku e ofo ai, o kupe lava a si o kakou akuguu lea e kafili saugoa ai le au ula ia.” Fesili le Fafige Faikakala i lana uo lea poo fea la ua i ai si alii sa sui faatonusili, ae na tali lana uo ofisa lea, “la le ua fealua’i fa’ago’ugo’u solo i le auala, mea lea e leaga ai le ai afu o le akuguu, loga uiga o le iuga fo’i lega e oo i ai kagaka lakou ke iguiga le afu o le akuguu mai le Ofisa lea,” ae oso atu le fafige faikakala, “e a ea, ka’i malie fo’i la oe ia.”

FA’ATONUSILI FA’ATAMALA

Ata ee le Fafige Faikakala ina ua taia i lana faalogo i le ote a le alii kovana sa fai i nisi o ana faatonusili, e le o faamaoni i le faiga o a latou tiute, ae na o le fiafia lava e saini TA e avatu e lana ofisa mo malaga i fafo, e ui o ia TA sa toe teena mai e le ofisa o le alii kovana, ina ua maua ane o loo nunumi atu ai ma le faitau afe ma afe o tupe e le tatau ona totogiina ae ua naunau lava e totogi. O le itu e ofo ai le Fafige Faikakala, o le atamamai o tagata o le malo e saili auala latou te maua ai tupe o loo maua mai i le afu o tagata i ni auala eleelea. Leitioa a tele ofisa a le malo e aofia i lalo o le ‘high risk’ a le malo tele, ona o le le faamaoni i auala e faaaoga ai tupe a le malo. Fai mai le tomumu a le isi uo toeaina a le fafige faikakala, “fu’e pea lava a oukou kaga se’i kukumu.”