O le vaiaso ua te’a sa fa’amaonia mai ai e le tamaitai foma’i ia Dr. Annie Fuavai i le falema’i o le LBJ i Fagaalu ua i ai se tasi ua maliu ona o le faama’i o le dengue fever ma ua atoa ai nei le to’atolu o le atunu’u ua maliliu i le dengue i lenei tausaga.

Taua e Dr. Fuavai e faapea o le ua maliu o se tamaitai e 23 tausaga ma o le tamaitai sa maliu i le silia nei ma le vaiaso.

O lea tamaitai talavou mai le afioaga o Faganeanea ma sa auina atu i le falema’i ma taofia ai loa i le ICU, ma maliu ai o ia. E oo mai i le aso Tofi o le vaiaso ua te’a e masalomia nisi e toalua ua maua i le dengue ma o lo’o taofia i le ICU. Ua le gata i lea, o lo’o tau faamaonia foi e le LBJ  se tasi na maliu i le aso Lulu o e vaiaso ua te’a pe o le dengue le mafuaaga.

Saunoa Dr. Fuavai e faapea o le faapopolega tele o lo’o i ai ona o le malosi o le dengue ua tulai mai, e pei o le dengue fever lea na pepesi i Amerika Samoa i le tausaga 1996.

Ua talosaga Dr. Fuavai i le atunu’u lautele ina ia vave oo atu i le falema’i o le LBJ e vaaia le foma’i pe a maua se tagata i ‘auga o le dengue, se maise ai lava pe a alu malosi i luga le fiva o se tagata ua masalomia i le aaafia i le dengue.

Mo i latou ua aafia i le dengue fever, ua fautua mai Dr. Fuavai, ina ua malolo lelei ma inu ia le vai.

O lo’o tumau lapataiga mai le Matagaluega o le Soifua Maloloina ma le LBJ mo le atunu’u atoa ina ia tausisi i le tumama e ala i le fa’amama o le otaota i tafatafa o maota ma laoa, aemaise lava i vaega e ono faigofie ona to’a ai le suavai, ina ia mautinoa e fa’amama ma aveese, ina ia mautinoa e saogalemu aiga ma le atunu’u atoa i a’afiaga o le gasegase o le ‘dengue fever’ lea fo’i ua toe fo’i mai i le atunu’u.

O ni isi o fautuaga mo le latou silafia, e aofia ai le tatau lea ona fa’aeteete i auala e feavea’i ai e namu le siama o le dengue fever, aemaise lava taimi e masani ai ona u e le namu le tagata ma a’afia loa, e pei o le lua itula ao le’i goto le la, ma le lua itula talu ona oso a’e le la i aso ta’itasi, o taimi ia e tatau ai lava ona fa’aeteete le atunu’u mai le ono a’afia i le namu o lo o feaveaia siama o le fa’ama’i, e tatau fo’i ona mataala ai i laei e tatau ona ofu i le taimi lea.