E maualuga le tulaga lea ua ausia e le au volipolo a tama’ita’i a Amerika Samoa i le taimi nei, i taamilosaga volipolo lea o loo fa’agasolo i le vaiaso mulimuli o Ta’aloga lona XV Pasefika e pei ona talimalo ai Papua Niu Kini.

O le manumalo o le ‘au a tama’ita’i i lana ta’aloga lona tolu i le afiafi ananafi i le va ma le ‘au a Tuvalu, ua tula’i mai ai loa Amerika Samoa i le pito i luga o le Pool A o loo tausinio, i le tolu lea o ta’aloga, tolu manumalo ae leai se faiaina.

E tau feololo mai ulua’i ta’aloga a Amerika Samoa ma le ‘au a Fiti ma Tahiti na finau ‘ai i le aga’i atu i fa’aiuga o seti taitasi, peita’i o le ta’aloga ma Tuvalu na matua vaaia ai le malosi tele o le ‘au a tama’ita’i a Amerika Samoa ia Tuvalu, e ala i le leai o se seti e oo ai ‘ai a Tuvalu i le 8.

O le seti muamua e 25-6, sosoo ai le 25-3, ma le seti fa’aiu e 23-7. E leai se isi o le ‘au a Amerika Samoa e fa’aletonu mai lana ta’aalo, e fai o le osofa’i ae o le puipui fo’i, ma ua valoia ai e le au fa’asalalau o le ta’amilosaga, le tele o le avanoa e maua ai le avanoa o Amerika Samoa e tausinio ai i le pine auro, pe afai ae manuia lana ulua’i ta’aloga o le pau ma nofo lea o le a a sauni atu ai i le aso Tofi o le vaiaso nei (aso Lulu taimi Samoa).

O le tulaga malosi o loo i ai le ‘au a tama’ita’i i ta’aloga volipolo i totonu o le fale (indoor), o le tulaga malosi fo’i lena o lo o i ai le ‘au volipolo i luga o le oneone (beach volleyball), lea fo’i ua tulaga manuia uma ana ta’aloga e lua sa alo atu i ai i le aso Lua na te’a nei.

I se fa’atalatalanoaga a le Samoa News ma le faiaoga o le au ia Junior Keil, sa ia taua ai le tulaga lelei ma le malosi o lo o i ai le ‘au a tama’ita’i i le taimi nei.

“E le fa’apea ua sosoo manumalo e tolu ona tatou manatu lea ua lelei atoatoa le tatou ‘au, o loo i ai lava nai vaega e manaomia le fa’aleleia atili ina ia matua lelei atoatoa ao aga’i atu pea le ‘au i le tausinioga mo se pine auro,” o le saunoaga lea a Keil.

O le to’atele o tama’ita’i o loo ta’aalo i le ‘au a Amerika Samoa i le taimi nei, o le taimi muamua lenei ua ta’aalo ai latou i ni ta’aloga fa’avaomalo, ae o le maualuga lea o loo i ai lo latou tomai i le fa’atinoina o le ta’aloga, e matua tulaga ese lava i le maimoa a le to’atele o tagata eseese o le Pasefika.

“Ou te iloa e to’atele tagata na fa’ateia i le ta’aloga a Amerika Samoa ma Tahiti, ina ua sosoo seti e tolu a Amerika Samoa ia Tahiti, atoa ai fo’i ma le au mai Fiti lea fo’i na faiaina ia Amerika Samoa, peita’i, o loo taumafai lava ina ia oo le tulaga lelei ma le malosi o le tatou au i se tulaga e le toe fesiligia ai le manumalo i le pine auro,” o le saunoaga lea a Keil.

Na taua e le faiaoga o le ‘au tama’ita’i a Tahiti ia Nancy Louvries i le Samoa News e fa’apea, e le faigofie i le latou ‘au ona tatali le faiaina ia Amerika Samoa, aua e le’i mafaufau i latou e tupu se tulaga fa’apea.

“O le tele lava o ta’aloga a le Pasefika ua mavae, e le tulaga maualuga ai fa’apea taumafaiga a Amerika Samoa, o Tahiti, o le au o loo umia le pine auro o ta’aloga a le Pasefika i le 2011, ae ua fa’ateia i latou i le matou faiaina ia Amerika Samoa,” o le saunaoga lea a Louvries.

Ina ua fesili e le Samoa News pe na te talitonu e malosi tele le ‘au a Amerika Samoa, na tali le faiaoga, “e leai, ae pau lava ua tele mea sese a le matou ‘au i le taimi o le ta’aloga, o le mafua’aga lena ua matou faiaina ai.”

O Louvries sa taaalo mo Tahiti i ta’aloga a le Pasefika i le 1983, 1987 ma le 1991, o tausaga sosoo uma fo’i ia sa pine auro ai Tahiti i le ta’aloga volipolo i le vaega o tama’ita’i.

“Pau lo’u popolega, ina ne’i i ai se teine o le ‘au a Amerika Samoa e le o se Amerika Samoa, ona tula’i mai ai lea o se tulaga fa’aletonu i le le tausisia e Amerika Samoa o tulafono a le Pasefika i ta’aloga,” o le fa’asea lea a Louvries, ae na taua e le faiaoga a le ‘au a tama’ita’i ia Keil, “O tama’ita’i uma lava o loo ta’aalo i le ‘au a Amerika Samoa, o tama fanau uma lava a Amerika Samoa, na fananau uma i Amerika Samoa ma tutupu a’e ai, ae ona o aoaoga ma sailiga manuia a aiga i Amerika ma Hawaii, ua mafua ai ona latou tuua le atunuu ae malaga atu i Amerika.”

Na fa’afetaia e le ali’i faiaoga le tapuaiga a le atunu’u i le afioga i le ali’i kovana ia Lolo Matalasi Moliga, ta’ita’i o le atunu’u aemaise ai o le atunu’u atoa, i le latou tu’i mai o le muli papaga a’o alo faiva ai tama fanau a le atunu’u i ta’aloga a le Pasefika.

O le lisi o le ‘au e aofia ai Rahelle Suaava; Norene Iosia; Leilia Toomalatai; Litara Keil; Latoya Marshall; Jane Croson; Noralia Toomalatai; Inutiraha Leau; Saitaua Iosia ma Noa Tuioti-Mariner.

O le faiaoga o le ‘au o le susuga a Keil, o le faiaoga lagolago o le susuga a Max Tuioti-Mariner, ma le ta’ita’i malaga o le susuga a Iose Muasau.

O le aso Tofi o le vaiaso nei (aso Lulu taimi Samoa) e amata aloaia ai le ta’amilosaga o le pau ma nofo, e ala lea i le ta’aalo o le ‘au siamupini mai le isi Pool ma le ‘au o loo tulaga lua mai i le isi Pool.